Read wanga AYUBU 18 Bible Online

AYUBU 18 - wanga bible

AYUBU 18

¹Mana Bilidadi owokhurula Shuhi naboolela Ayubu ari,

²“Olalekha okhuboola liina? Yililisia obulayi mana olunyuma khulaboola.

³Mbushiina okhubukulanga ifwe okhuba shinga tsing'ombe? Mbushiina okhulolanga ifwe okhuba abasilu?

⁴Iwe wisalisinjia butswa omwene noburumabwo. Opaaranga mbu eshialo shilalekhwa butswa okhukwa likunda khulwa okhubeela iwe? Noho tsinyanda okhurusibwa mubukono bwatsio khulwa okhubeela iwe?

⁵Toto obulafu bwabamayanu bulasimibwa, nalwo olumenu lwomulilo kwabwe shilulaakha ta.

⁶Obulafu obuli munzu yabwe bulakwa eshiilima, nayo itaha eyili hekulu wabwe yilasimibwa.

⁷Injenda yabwe yamaani yitutuyibwe, akabaloosia kabakalukha abeene.

⁸Ebilenje biabwe bibakwisia mulurimba, ne buli olwa bachenda bakwa mubuko.

⁹Omureko kubatila khubisisilo Omubero kubatila namaani muno.

¹⁰Khwiloba omureko kufisilwe, omubero kurechilwe khutsinjila tsiabwe.

¹¹Amarisia kabasundusia tsimbeka tsiosi, kabalondachilila buli aha batsia.

¹²Inzala yimalile amaani kabwe, amatinyu kerecheshe okhubakwisia.

¹³Obulwale obutinyu butswana mumibili chiabwe, obulwale bwokhubeera bulitsanga ebiungo biabwe.

¹⁴Barusibwa munzu yabesikanga, mana bayilwa khumuruchi wamatinyu.

¹⁵Bulano abandu bandi nibo abalamenya mutsinzu tsiabwe etsio, amalesi akeshibiriti kasalasibwe mutsinzu tsiabwe.

¹⁶Bali shinga emisaala echioma emisi, nako amasaka kachio nikaniala.

¹⁷Abulaho owitsa okhubetsulila mushialo, ne ameera kabwe shikalarumbulwakhwo khandi ta.

¹⁸Balaloondwa okhurula mushialo eshia abali mwoyo, balayinibwa okhurula mubulafu nibayilwa mushiilima.

¹⁹Shibalikhwo nabaana kata abetsukhulu muboluyia lwabwe ta, noho kata omundu yesi owehonokokha ewa bamenyanga.

²⁰Abandu bomumbo besundukha khulwa amatinyu akakwila abamayanu abo, nabo abebukwe obuhendi bwabatila.

²¹Ako niko amatinyu kakwilanga abalaritsanga Nyasaye ta; amatinyu aka abo abalateebanga Nyasaye ta.”