Read wanga AYUBU 19 Bible Online

AYUBU 19 - wanga bible

AYUBU 19

¹Mana Ayubu nakalusia naboola ari,

²“Mulaasandia okhuula liina? Mulatsiililila okhundubula namakhuwa okhuula liina?

³Mwayanzinjilile namakhuwa okhuula ekhumi, ne shimufimbungwa omurwe okhuukholela akobumayanu ta!

⁴Kata nikali toto mbu ndakholile obwonooni, obwonooni obwo buli khwisie omwene.

⁵Nimuba nimupaaranga mbu muli abalayi okhushila, ne mwikhonyele amanyakhano kanje okhuba eshilolelo mbu endi neshikha,

⁶mumanye mbu Nyasaye niye, oukholeele amabi kano, niye oumbotokhasiye olurimba okhundiila.

⁷Kata nekhupa tsimbungu endi, ‘Esandibungwa!’ Abulaho oumbulilisinjia. Kata nelaanjilisia mbu ekhonywe, abulaho oukhalachilanga habwene.

⁸Nyasaye yekaale tsinjila tsianje tsiosi, kho shienyala okhubira ta, afisile tsinjila tsianje mushiilima.

⁹Yayiniyekhwo oluyali lwanje lwosi, khandi ayiniye olusimbi lwanje khumurwe.

¹⁰Yafunache tsimbeka tsiosi, nasi ehweleleele muno, khandi asiulile abunaayi bwanje shinga lwomundu asiulanga omusaala.

¹¹Yambusiliyekhwo lirumalie, khandi yambukulanga isie okhuba mulala khubasukube.

¹²Arumanga abelihebe ekhuuseera, bakasiye injila yokhwitsa okhuuseera, bakoneshele liheema lianje.

¹³Nyasaye waara abaana befwe ehale ninasi, abetsa banje boosi banziluushe.

¹⁴Abekho banje bandeshile, nabo abetsa banje boosi banzibiliile.

¹⁵Abo abalinji abacheni munzu mwanje banzibiliile, abakholi banje beshikhaana bambukulanga isie shinga omurende. Isie endi omurende mumooni tsiabwe.

¹⁶Elanganga omukholi wanje, nebutswa shiafuchililanga ta, okhuula emusaaye obutinyu kho yakhoonye.

¹⁷Omukhasi wanje shianyala okhwifwila obubolo bwanje ta, kata abasiani befwe shibanyala okhusita ahambi ninasi tawe.

¹⁸Kata abaana abatiiti banjayanga, banzeshelela olwa bandola.

¹⁹Abetsa banje abokhumwoyo banzikaanile, nabo aba ndali nindaheela bangalukhaanekhwo.

²⁰Omubili kwanje kwatong'a butswa amakumba neshikhoba, ndahonokoshela butswa hatiiti.

²¹Mumbelelele, inywe abetsa banje, mumbelelele, okhuba omukhono kwa Nyasaye kukhupile.

²²Mbushiina munondachilanga shinga Nyasaye akholanga? Mbushiina mutsiilililanga okhuuseera?

²³Bwakhabele obulayi amakhuwa kanje nikakhahandikwe! Bwakhabele obulayi nikakhahandikwe mushitabu!

²⁴Bwakhabele obulayi nikakhahandikwe neikalamu yeshibia, mana kasaarwe khulwanda kamenyekhwo inziayo.

²⁵Nebutswa emanyile mbu omununuli wanje ali mwoyo, ne mubumalilishi aliitsa okhunderera.

²⁶Kata likhoba liomubili kwanje niliba niliasasibwa nobulwale, ndililola Nyasaye neshili nomubili kuno.

²⁷Isie omwene ndilimulola, ndilimulola netsimoni tsianje omwene, ne shialiba omucheni khwisie tawe. Omwoyo kwanje kulindilila nobuha.

²⁸Nimuba nimuboola mbu, ‘khulamusandia’, khandi mbu, ‘Eshisina shia amakhuwa ako shili muye omwene?’

²⁹Abeene murie olukanga, okhuba oburuma bulareera eshinyasio shiolukanga. Mana mulamanya mbu aliho ouyasinjia.”