Read wanga AYUBU 2 Bible Online

AYUBU 2 - wanga bible

AYUBU 2

¹Inyanga yindi khandi abamalaika ba Nyasaye betsa imbeli ewa OMWAMI Nyasaye, Setani yesi niyetsa okhwilolesia halala ninabo.

²OMWAMI Nyasaye nareeba Setani ari, “Orula heena?” Naye Setani namukalusia ari, “Ndakhalambuulanga eshialo, nenjendachendakhwo eyi nende eyi.”

³OMWAMI Nyasaye namureeba ari, “Okhuula obe noluutsi omukhalabani wanje Ayubu? Abulaho omundu undi khushialo ouli shinga ye tawe. Ye nomwisikwa khandi omulunjishi. Yambelesinjia isie Nyasaye oluyali khandi yehanyanga okhurula khubwonooni. Wangatilisia mbu ekhufuchilile omusasie halali eshifune shiosi ta, nebutswa ashili butswa omwisiikwa khwisie.”

⁴Setani namukalusia ari, “Omundu alahaana shiosi eshia ali ninashio khulwa okhuhonia obulamubwe.

⁵Nebutswa bulano noba nosalisia omubilikwe, ye alakhunyeka habulafu.”

⁶Kho OMWAMI Nyasaye naboolela Setani ari, “Lola, ali mumakhonoko, nebutswa olamwiira tawe.”

⁷Mana Setani narula imbeli ewa OMWAMI Nyasaye, ne nakhola omubili kwa Ayubu kwosi okhufimba amabure okhurula khubilenje okhuula khulwotosi.

⁸Ayubu nabukula eshikonjio khulwa okhwikhwakura ninashio mumabure ako, ne niyekhala mwikoshe.

⁹Mana omukhasiwe namureeba ari, “Oshili butswa omwisiikwa? Shionyeka Nyasaye mana ofwe?”

¹⁰Nebutswa Ayubu namukalusia ari, “Oboolanga butswa shinga mulala khubakhasi abayingwa. Mbushiina khufuchililenje butswa okhunyoola amalayi okhurula khu Nyasaye, ne nikhulafuchililakhwo amabi okhurula khuye ta?” Mumakhuwa ako koosi, Ayubu shiyaboolakhwo likhuwa libi khu Nyasaye tawe.

¹¹Ne olwa abeetsa ba Ayubu bataru bahulilakhwo amabi kali nikamwikholeshekhwo, betsa buli mundu okhurula ingowe. Bali Elifasi okhurula Temani, Bilidadi okhurula Shuha, nende Zofari okhurula Naamatsi. Bafuchilisania boosi halala okhutsia okhumuhotselesia nende okhumuleemia omwoyo.

¹²Olwa bali nibashilikhwo ehale, balola Ayubu nebutswa shibamumanyilisia tawe. Ne olwa bamanyilisia mbu niye, bachaaka okhwayula nibalila, nibarandula tsingubo tsiabwe mushibeela, nibatuumuula olufu mwikulu, nibepuuka olundi khumirwe chiabwe.

¹³Ne nibekhala hasi halala ninaye khulwa tsinyanga musafu eshilo neshiteere, omundu nalaboolangakhwo likhuwa liosi liosi khuye ta, shichila balola nali mukhutsunwa okhululu muno.