Read wanga AYUBU 20 Bible Online

AYUBU 20 - wanga bible

AYUBU 20

¹Mana Zofari owokhurula Naamatsi nakalusia Ayubu ari,

²“Omwoyo kwanje kunzuubanga okhukhukalusia, ne shindalesimilisia khandi tawe.

³Embulile linyeko elisinyisiye, nebutswa obumanyilisi bwanje bulakhola ekhukalusie.

⁴Toto mwene okhurula khale omanyile amakhuwa kano, okhurula khunyanga yomundu yareebwa khushialo,

⁵mbu obutsaatsahafu bwomumayanu nobwimbichiti, nabwo obusaangaafu bwoyo oularitsanga Nyasaye ta, nobweshise shituutu butswa.

⁶Isungaye yinyala okhuula mwikulu, nakwo omurwekwe kunyala okhuula mumaleesi,

⁷nebutswa alasukunwa ehale shinga amafwike omwene; Abo abali nibamumanya balireeba mbu, ‘Ali heena?’

⁸Alakhamiukha shinga lilooro, ne shialalolekha khandi ta, alahwaho shinga lilolelo liomushilo.

⁹Abo abamulolakhwo shibalamulolakhwo khandi ta, aha yamenyanga shihalamanyikhanakhwo khandi tawe.

¹⁰Abaanabe okhuula basabesabe khu abamanani, okhuba okhuula bakalusie ebia yeeba.

¹¹Kata niyetsulamwo amaani akoluraaka, koosi kalihwela mulufu ninaye.

¹²Obwonooni nobumilamilu mumunwamwe shinga isukari, abufisanga mushinakhuna shiolulimilwe,

¹³shiachamanga okhubulekha ta, habula abubikhanga mumunwamwe.

¹⁴Nebutswa olwa buula mundamwe nibwikhola obululu, bwikhola obululu shinga obufwisi bweinzokha.

¹⁵Omumayanu amilanga obuyinda bwa yeeba, mana khandi abusala. Nyasaye aburusinjia mundamwe.

¹⁶Eshia amilanga nobufwisi bweinzokha, obufwisi bweshilikoma bulamwira.

¹⁷Shialamenyaho oluhoono okhunyoolakhwo tsikhabi ta, kata khulolakhwo emichela echia amalayi nende obuyinda ta.

¹⁸Alilekha obulayi bwosi obwa yanyakhanilanga, ne shialikhoyelakhwo obulayi bwobuyindabwe ta,

¹⁹shichila yasandia abamanani nabalekha, khandi nabukula tsinzu etsia aloombakha ta.

²⁰Khulwa okhubeela obulaangubwe bubula eshiakamo, ebindu biosi ebiayekombaga shibulaho eshiasikalanga.

²¹Olwa alia, shialekhangakhwo eshindu shiosi ta, khulweshio obuyindabwe shibulatsiililila okhubaho tawe.

²²Olwa aba nayindihale muno, nilwo olwa amatinyu kalamukwiila, amatinyu ako kalamwitsilakhwo elala.

²³Olwa alaba niyekure, Nyasaye alamuhelesia eshinyasio nelirumalie lilulu, elilamusundushila shinga eshiokhuliashie.

²⁴Kata nateema okhwihonokosia okhurula khulukanga olweshibia, Eshisele eshiobuyingo bwomukasa shilamufumira mumubilikwe.

²⁵Shilatsomolwa nishirusibwa mumubilikwe, ne obumemu bwashio obung'inang'ina bularulamwo namalasileke, naye alatilwa noburi.

²⁶Buli shindu shiosi eshia yebishila shilasasibwa, omulilo kwomundu alabwanile ta kulamusamba halala nende abeinzuye boosi.

²⁷Likulu lilafwimbula obwonoonibwe, nashio eshialo shilaboola obuloli okhumufukula.

²⁸Emianduchie chiosi chilayaaywa khunyanga yeshinyasio shia Nyasaye.”

²⁹Kano niko amasila ka Nyasaye ahelesia omumayaanu, amasila ka Nyasaye yarecheshela omumayanu.