Read wanga AYUBU 21 Bible Online

AYUBU 21 - wanga bible

AYUBU 21

¹Mana Ayubu nakalusia Zofari naboola ari,

²“Recheresia amakhuwa kanje obulayi, kalaba akokhulemia omwoyo.

³Munzisimilisie nasi embooole, mana nemalile okhuboola mutsiililile okhuunyokhosia.

⁴Okhwiyiniakana khwanje khuli khu Nyasaye, shikhuli khumundu ta. Nishio eshichila nindalesimilisia ta.

⁵Munenjekhwo mana mwisundushe, nimufimba amakhono kenywe khuminwa chienywe.

⁶Nembaraakhwo khukanzikholekhakhwo, ndisundukhanga muno, mana indenga yindiila.

⁷Nishiina eshichilanga Nyasaye nafuchilila abamayanu okhutsiililila okhumenya? Nishiina eshichilanga nibakofula khandi nibatsiililila okhuyindihala?

⁸Balola abaana babwe nibayindihala, khandi balola abetsukhulu babwe nibakhula.

⁹Nyasaye shiareerangakhwo amasila mutsinzu tsiabwe ta, khandi shibamenyangakhwo muburi tawe.

¹⁰Tsing'ombe tsiabwe tsiosi tsiibulananga nitsimeetekha, tsiibulanga nitsilahusakhwo ta.

¹¹Abaana babwe belukhanga nibabaya nibasola shiebimeme biamakondi

¹²Bashinanga tsinyimbo tsiamanyanga nende tsielitungu, nibekhoyela amayoosi kolwika.

¹³Bamenyanga obulamu bwabwe mumulembe, mana batsia emakombe mumulembe.

¹⁴Abamayanu baboolelanga Nyasaye bari, ‘Okhurulekhwo! Shikhwenya okhumanya akokhwenyakhwo khwifwe tawe.

¹⁵OMWAMI Nyasaye niwiina, kho mbu khumukhalabanile? Ne ni inganga shiina eya khwakhanyoola, nikhuba nikhusaaya khuye?’

¹⁶Beyitsialanga mbu, bayindihalanga khulwa amaani kabwe. Nebutswa isie shiefuchilisaninjia namapaaro kabwe ako tawe.

¹⁷Nakhandi khanga obulafu bwabamayanu nibusimibungwa? Nakhandi khanga nibanyoolanga amatinyu? Nakhandi khanga Nyasaye nabahelesinjia eshinyasio mwirumalie?

¹⁸Bayilwakhwo nomuyeka shinga obunyasi obuumu? Kata bayilwakhwo shinga olufu lutuumulungwa nomuyeka?

¹⁹Muboolanga muri, ‘Nyasaye ahelesinjia omwana eshinyasio khulwa obwonooni bwasamwana.’ Mbushiina alamuhelesinjia ye omwene eshinyasio, kho amanye?

²⁰Omwonooni okhuula yetuushe eshinyasio shiobwonoonibwe, okhuula ahulile obululu bweliruma lia OMWAMI Nyasaye.

²¹Okhuba namalile okhufwa eshilamuhendia khubeinzuye olwa tsinyanga tsiobulamubwe tsilaba nitsihwele nishiina?

²²Alikhwoho ounyala okhwechesia Nyasaye, Nyasaye ouyasinjia kata abo abali mwikulu?

²³Omundu afwitsanga nali nemiandu eminji muno, khandi olwa aba natsaatsahale nali nomulembe,

²⁴olwa aba niyakhomera muno, khandi amakumbake nikashilimwo amaani.

²⁵Naye oundi afwitsanga neshibeela eshinji mumwoyokwe, nashili okhubakhwo namalayi koosi.

²⁶Nebutswa boosi bafwitsanga nibayabilwa mulufu, mana tsinyende tsilia emibili chiabwe.”

²⁷“Recheresie, isie emanyile amapaaro kenywe, nende amabi ka murechekhanga okhukholela.

²⁸Okhuba mureebanga muri, ‘Inzu yomuruchi yili heena? Liheema liomumayanu yamenyangamwo lili heena?’

²⁹Mushili okhureebakhwo abandu abachendanga khumihanda, mana mwafuchilila obuloli bwabwe ta?

³⁰Mbu, omumayanu ahonokosibungwa khunyanga yamatinyu, khandi ahonibungwa khunyanga yamasila.

³¹Kho niwiina owinjililanga omumayanu itookho? Kata niwiina oulimukhola okhurunga koosi aka yakhola?

³²Olwa abukulwa nayilwa mushilindwa, ing'aniye yilindungwa obutinyu.

³³Abandu abanji bamulondakhwo inyuma, nabo abandi abanji bamuranjilila imbeli, olwa ayabilwa liloba libukwa mushiloonyo.

³⁴Kho nenywe, mwakhanemia murie omwoyo namakhuwa kenywe amakhaya ako? Amakalusio kenywe namakhaya butswa, khandi akobubeeyi.”