Read wanga AYUBU 22 Bible Online

AYUBU 22 - wanga bible

AYUBU 22

¹Mana Elifasi owokhurula Temani nakalusaia Ayubu naboola ari,

²“Omundu namundu anyala okhubakhwo weinganga khu Nyasaye? Kata omuchesi anyala okhubakhwo wobukhoonyi khuye?

³Ne opaara mbu ochamisinjia Nyasaye khulwa okhuba omulunjishi noho? Kata injendayo niyiba indayi, neinganga shiina eya Nyasaye yakhanyoola?

⁴Opaara mbu Nyasaye akhuhalabilanga nende okhukhuhelesia eshinyasio khulwa okhubela mbu omuhelesinjia oluyali noho?

⁵Shikali kario ta! Akhuhelesinjia eshinyasio khulwa okhubeela obumayanubwo nobukhongo, khandi obwonooni bwokholanga bubula eshiakamo.

⁶Iwe wanuula omusiani wenywe ingubo khulwa okhubula okhurunga amapesa ka yehola khwiwe, wamunuula inguboye ndala mana nomulekha eshiechenye.

⁷Shiwahelesia abachonyile amaatsi kokhunywa ta, khandi shiwahelesia abeinzala yiluma eshiokhulia ta.

⁸Iwe wekhoonyela obunyalibwo nende obukhongobwo okhwibukulila eshialo shiosi.

⁹Iwe waloba okhukhonya abakhasi abalekhwa, khandi wasandia abaana ababisandu.

¹⁰Niko akachilanga emireko nichikhubotokhane tsimbeka tsiosi, khandi oburi nibukhutiilile matetekhana.

¹¹Obulafubwo bwilimibwe ti, kho mbu shionyala okhulola eshindu shiosi shiosi ta, nakwo omuyembo kwamaatsi kukhufuniishe.

¹²Nyasaye shiyamenya mwikulu ikulu? Nebutswa ahenganga hasi khutsing'ining'ini, kata olwa tsili hekulu muno.

¹³Nawe oboolanga ori, ‘Nishiina eshia Nyasaye amanyile? Anyala okhubira mumaleesi kelima ti wayasia abandu noho?

¹⁴Amaleesi akelima ti ako kamwikalilanga okhukhulola, olwa achenda khulukuku lweshialo.’

¹⁵Kho wenya okhutsiililila okhumenya obulamu obwakhale, obwabandu abamayanu bamenyangamwo?

¹⁶Babukulwa nibayinibwaho kata ebise biabwe nibishili okhuhwa, omusinji kwabwe kwobulamu kwayuulwa nomukhula kwamaatsi.

¹⁷Baboolela OMWAMI Nyasaye bari, ‘Khurulekhwo,’ khandi mbu, ‘Nishiina eshia iwe Ounyala Biosi wakhakhukhola?’

¹⁸Ne kata kario, Nyasaye tsana oyo niye owabakhola okhuyindihala. Isie shienyala okhumanyilisia amapaaro kabandu abamayanu tawe.

¹⁹Abandu abalunjishi bakalola nibasangaala, nabo ababula eshikha batseshelela abamayanu nibaboola bari;

²⁰‘Toto mwene abasuku befwe basasiibwe, ne ebia balekha biosi bisambilwe nomulilo’.

²¹Iwe Ayubu, fuchilisanie nende Nyasaye mana okasie omulembe ninaye, nokhola orio alakhuhelesia tsikhabi.

²²Ofuchilile amechesioke, mana obiishe amakhuwake mumwoyokwo.

²³Noba nokalushila OMWAMI Nyasaye, nende okhwituutuyia imbeliwe, noba norusia obumayanu munzuyo,

²⁴noba nosukuna itsahabuyo mulufu, nende okhusukuna itsahabuyo okhurula mushialo shia Ofiri mumachina akomwalo kwakhama,

²⁵ne nobukula OMWAMI Nyasaye okhuba itsahabuyo khandi okhuba ifetsayo yobukusi.

²⁶Kho olasangaala mu Nyasaye, khandi olamuhengakhwo nobunayi.

²⁷Olasaaya khuye naye olahulila amasaayoko, khandi olahesia aka wamwitsubila.

²⁸Olanyalilwa mukoosi aka okhola khandi obulafu bulakhwashila munjilayo.

²⁹Okhuba Nyasaye atutuyinjia abechinjimisi, ne ahoninjia abetutuyia.

³⁰Alakhuhonia noba nobula eshikha, lakhuhonia noba nokholanga akobulunjishi.”