Read wanga AYUBU 23 Bible Online

AYUBU 23 - wanga bible

AYUBU 23

¹Mana Ayubu nakalusia naboola ari,

²“Olwa leelo luno khandi okhwiyiniakana khwanje nokhululu muno, eshinyasioshie neshilulu kata olwa emba nendi mubutsunwi nende mukhubinda.

³Nindakhamanyilekhwo ewa enyala okhunyoola Nyasaye! Ndakhatsiile ewa ali.

⁴Ndakhatsiile okhuboola akokhwiyiniakana khwanje imbeliwe, mana emboole ebifune bianje biosi.

⁵Ndakhamanyile aka yakhangalusiye, khandi ndakhamanyilisiye aka yakhamboolele.

⁶Nyasaye yakhekhoonyela obunyalibwe obukhongo okhuyingasia noho? Tawe! Yakharecheresiye nemboola.

⁷Omundu omulunjishi anyala okhuyingana ninaye, ndakharumbulwe okhuba oubula eshikha nende Nyasaye omuyaasi wanje khulwa inziayo.

⁸Nebutswa ekhabile Nyasaye imbeli, ne shialiyo tawe, emukhabile inyuma ne shiemunyoolile ta.

⁹Emukhabile khumukhono mukhasi, ne shiemunyoolile ta, emukhabile khumukhono musaatsa, ne shiemuluutsi ta.

¹⁰Nebutswa ye amanyile injila yenondangakhwo, olwa yandeema, alanyoola nendi omusiiyikhu.”

¹¹“Okhuba enondanga munjilatsie, enondanga munjilatsie ne eshili okhurulakhwo khutsio.

¹²Eshili okhulekhakhwo amalakoke, nako amakhuwake ndakabikha mumwoyo kwanje.

¹³Nebutswa ye shiakalukhananga ta, khandi abulaho ounyala okhumukalukhasia. Elia yenya nilio lialakholanga.

¹⁴Alakhola aka yamala okhuloosia okhukholela, ne amanji kario kali mumwoyokwe.

¹⁵Khulweshio endechelanga muburi imbeliwe, ne olwa embaarangakhwo khu ako koosi endilungwa noburi khuye.

¹⁶Nyasaye afwisiye omwoyo kwanje, oyo Owobunyali Bwosi yaarisiye.

¹⁷Okhuba endi mushiilima, khandi eshiilima eshikhongo ishiifuiniishe mumoni”.