Read wanga AYUBU 24 Bible Online

AYUBU 24 - wanga bible

AYUBU 24

¹“Mbushiina OMWAMI Nyasaye nalaraho inyanga yobuyasibwi, inyanga yobukhalachi bwahabwene khu abo abamukhalabanilanga?

²Abandu basitinjia ebikhoni biokhulwakho khulwa okhunyoola omukunda omukhongo, nabandi bebanga emiruko nibachiaya halala nende emiruko chiabwe.

³Bebanga tsisishili tsiababisandu, khandi babukulanga ing'ombe yomukhasi omulekhwa okhuula olwa arunga likofi.

⁴Bekalilanga abatakha okhunyoola aka bakhoyile okhunyoola, mana balunyia abamanani okhwilukha nibebisa

⁵Kho shinga butswa tsisishili tsiomubulimo, abatakha bakhabanga eshiokhulia mushitsiimi eshiumu, mbu banyoole eshia banyala okhulisia abaana babwe.

⁶Abatakha batobelesinjia ebichese ebitong'a mumikunda, khandi babunjelesinjia emitsabibu mumikunda echia abamayanu.

⁷Beyalisinjia eshiechenye nibabula eshiabefimba eshilo shiosi, babula eshiokhwifimba mubushindu.

⁸Banyiririsibwa neifula yomubikulu, befumbeelela khutsinyanda nibakhaaba okhwiyikama ifula.

⁹Abandu abamayanu banuulanga abakhasi abalekhwa abaana, nibabukula abaana babamanani okhuba omusingo kwelikofi.

¹⁰Abatakha bachenda eshiechenye nibalali nebifwalo ta, khandi bahonga inzala kata olwa baba nibachesanga ingano.

¹¹Batiinyanga amafura akemiseituni chiabamayanu, nibaswala idivai mubitiinyilo biayo, nebutswa abeene obuloho bubalia.

¹²Okhushenya khwa abafwitsanga khuhulilikha mwitookho, ne emioyo chiabafumirwe chihaaba khulwa obukhoonyi, nebutswa Nyasaye shiateebanga amakhuwa amabi kabayinda bakholelanga abatakha tawe.

¹³Baliho abamayanu abalobanga obulafu, shibabumanyilisinjia, kata okhutsia aha buli tawe.

¹⁴Omwiri abuukhanga mumabwibwi tsi natsia okhwira omumanani nende omutakha, ne mushilo atsia okhwiba.

¹⁵Naye omuheyi alindanga eshialo okhwilima, yeboolela omwene ari; ‘Abulaho oulandola.’ Mana yefunikha mumoni kho mbu omundu yesi aleshe okhumulola.

¹⁶Mushilo abefi bafunakanga nibenjila mutsinzu, nebutswa mushiteere beyikalila mukari, shibenya okhulola obulafu tawe.

¹⁷Eshilima eshimali ti neshiteere khubo, khandi eshilima shishibahendinjia ta.”

¹⁸“Muboolanga muri, ‘Abamayanu bayulwa bwangu nomukhula, nakwo omukunda kwabwe kwalaamwa eshilaamo shiobubi okhurula khu Nyasaye, kho abulaho outsitsanga okhukhola emilimo mumikunda chiabwe echiemitsabibu.

¹⁹Shinga lwomubasu omululu kukhaminjia amaatsi akeitsaluchi, nolwa abonooni bakhamibungwa nibayilwa emakombe.

²⁰Kata abanyinamwana shibabetsulilanga ta, tsinyende tsilia emibili chiabwe, basasibwa shinga emisaala echiremilwe’.

²¹Basandia abakhasi abalekhwa, khandi nibalalolesia tsimbabasi khubakhasi abakumba ta.

²²Nyasaye mumaanike amululanga abobunyali, kata nibalalila mubulamu, obulamu bwabwe shibuyindila ta.

²³Nyasaye anyala okhubalekha bamenye mumulembe, nebutswa abahenjelesinjia buli lwosi.

²⁴Baralila khulwa eshise shituutu, nebutswa olunyumakhwo baniala shinga obunyasi, bali butswa shinga amakata akaremilwe.

²⁵Nikaba nikalali kario ta, niwiina ounyala okhulolosia mbu endi omubeyi? Mana amanyie mbu aka emboolile namakhaya butswa.”