Read wanga AYUBU 27 Bible Online

AYUBU 27 - wanga bible

AYUBU 27

¹Naye Ayubu khandi natsiililila okhuboola ari,

²“Nditsuba muliira lia Nyasaye ouliho mwoyo, oyo Owobunyali Bwosi, oulobile okhukhalaka eshiina shianje habwene, khandi oukholile obulamu bwanje okhuba obululu.

³Nditsuba mbu, oluhoono lweshiliho mwoyo, khandi olwa Roho wa Nyasaye ashili mwisie,

⁴toto mwene omunwa kwanje shikulaboola akobubatsa, kata alulimi lwanje okhuboola obubeeyi tawe.

⁵Shienyalakhwo okhuboola mbu inywe muli habwene tawe. Ndalatsiililila okhuboola mbu embula eshikha okhuula khunyanga yanje eyokhufwa.

⁶Shindalalekhakhwo okhuboola mbu endi omulunjishi tawe, oluhoono lweshiliho mwoyo, amapaaro kanje akomukari shikalakholakhwo isie okhupaara mbu endi neshikha tawe.

⁷Abasuku banje boosi bahebwe eshinyasio shinga eshia abamayanu, ne abandu boosi abaafukulanga bahebwe eshinyasio shinga eshia abalali abalunjishi ta.

⁸Abalahelesinjia Nyasaye oluyali ta bali nobunaayi shiina olwa abasishia, khunyanga ya Nyasaye abukula obulamu bwabwe?

⁹Kho olwa amasila kabakwila, Nyasaye alihulila okhuhaba khwabwe noho?

¹⁰Banyala toto okhusaangaala mu oyo Owobunyali Bwosi? Banyala toto okhumuhabila Nyasaye buli lwosi?

¹¹Ndalamwechesia akobunyali bwa Nyasaye, khandi shindalamubisa aka OMWAMI Nyasaye aloosiye tawe.

¹²Ne kata kario inywe mwesi abeene mwakalutsi, kho eshichila nimuboola amakhuwa amakhaya kano nishiina?”

¹³Aka Nyasaye ahelesinjia omumayanu ngakano, omukabo kwa oyo Owobunyali Bwosi ahelesinjia omubi ngwokuno:

¹⁴Kata abaanabe nibaba abanji, boosi baleerwa nolukanga mwihe. Khandi shibalanyoola eshiokhulia eshibahela ta.

¹⁵Abaanabe abahonokokha, olumbe lulabeera, ne abakhasi babwe abalekhwa shibalabekhuula tawe.

¹⁶Kata omumayanu oyo naba neifetsa inyinji shinga olufu, noho netsingubo tsinyinji,

¹⁷ye atsibunjikha butswa. Nebutswa omulunjishi niye owifwala tsingubo etsio. Khandi oubula eshikha niye oubukula ifetsa eyo yosi.

¹⁸Inzu ya yombakha yili butswa shinga eyolububi, khandi shinga litili liomulindi womukunda.

¹⁹Inyanga ndala yeyalisia okhukona nali omuyinda, nebutswa shialakhola ario khandi ta, olwa abuukha obuyindabwe bwosi bubulaho.

²⁰Amarisia kamwitsakhwo bwangu shinga omukhula, mushilo eshimbulikusi shimubukula.

²¹Omuyeka kwebukwe kumuyula natsia butsia, kumuyula okhurula munzuye.

²²Kumuhutsa nikulamubelelelakhwo ta, olwa ateema okhwihonokosia okhurula khubunyali bwakwo.

²³Omuyeka okwo kumuhutsa olwa ateema okhwilukha, nikumurisia nobunyali bwokhumusasia.