Read wanga AYUBU 28 Bible Online

AYUBU 28 - wanga bible

AYUBU 28

¹“Toto amayabo kaliho ewa ifetsa yiyabungwa, khandi habundu haliho aha itsahabu yisalulusibungwa niyitsienulwa.

²Eshibia shiyabungwa okhurula mwiloba, nakwo omukasa kusialulusibungwa okhurula muburale.

³Abokhuyaba barunilisinjia mushiilima eshimali ti, bakhabilisinjia hasi mukari mweliloba, mana bayaba mutsinyanda mushiilima.

⁴Abandu abo bayabanga amayabo keifetsa ehale okhurula ewa abandu bamenyanga. Khandi ewa abandu balachendanga ta, ebwene eyo bakholanga emilimo bonyene, khandi nibeeleelile khumikoye.

⁵Ikulu khwiloba bachesanga ebiokhulia, nebutswa hasi bwene omulilo kwasasia buli shindu.

⁶Liloba elio lilimwo amachina kobukusi aka Sapiri, nalwo olufu lwalio lulimwo itsahabu.

⁷Yibulaho indutsu eyinyala okhulola injila yitsia khumayabo ako, kata ingosia shiyipulukhangakhwo niyitsia ewa kali tawe.

⁸Tsisolo tsimbalaba tsishili okhuchendakhwo khunjila eyo, kata italanyi yishili okhubirirakhwo khunjila eyo.

⁹Abandu bayabanga tsinyanda etsioma ka, khandi bayabululanga ebikulu nibabikusia hasi.

¹⁰Bekulanga tsinjila mutsinyanda, nibanyoola amachina kobukusi.

¹¹Bayabanga okhuula khumoni yemialo, mana bareera habulafu eshiba nishibiisile.

¹²Nebutswa obuchesi bunyoolekha hena? Nabwo obumanyilisi buli hena?

¹³Abandu shibanyala okhumanya obukusi bwobuchesi tawe, khandi shibunyolekhanga mushialo shiabalimwoyo tawe.

¹⁴Olusiba luboolanga luri, ‘Obuchesi shibuli mwisie ta’, nayo inyanza yiboola yiri, ‘Shiendi ninabwo ta.’

¹⁵Shibunyala okhukulwa neitsahabu inzeleleshe ta, khandi obukusi bwabwo shibunyala okhuchelwa neifetsa tawe.

¹⁶Shibunyala okhukulwa kata neitsahabu inzeleleshe ya Ofiri ta, kata obukusi bwabwo shibunyala okhuchelasibwa namachina kobukusi ka Onikisi noho isapiri tawe.

¹⁷Obuchesi shibunyala okhuchelasibwa neitsahabu noho kata eshiho tawe. Kata shibunyala okhukulasibwa nebimili bieitsahabu inzeleleshe tawe.

¹⁸Obukusi bwobuchesi nobweikulu okhushila bwamachina kobukusi ka korali nende akang'inang'inanga, khandi nobweikulu okhushila tsilulu.

¹⁹Obuchesi shibunyala okhuchelasibwa nende amachina ameleleshe ka topazi tawe, kata shibunyala okhukulasibwa neitsahabu inzeleleshe tawe.

²⁰Kho obuchesi burulanga heena? Nabwo obumanyilisi buli heena?

²¹Bwebisa okhurula khubilonje bili mwoyo biosi, kata amanyonyi akapulukhanga ikulu shikanyala okhubulola tawe.

²²Kata abafu emakombe baboolanga mbu, bahulilakhwo butswa ebimoonyo biabwo.

²³Nyasaye yenyene niye oumanyile injila yobuchesi, ye yenyene niye oumanyile aha bunyoolekhanga.

²⁴Okhuba ye alolanga okhuula khundulo okhweshialo, khandi alolanga ebindu biosi ebili hasi welikulu.

²⁵Olwa Nyasaye yahelesia omuyeka obunyali bwakwo, ne nachela okhuhela khweinyanza,

²⁶olwa yalaka aha ifula yikhoyile okhukwa, nende injila yelikulu linyala okhumwesushilakhwo;

²⁷Nilwo olwa yakhabilisia obuchesi mana nabulola, nabuchela mana naburalisia.

²⁸Nyasaye yaboolela abandu ari, ‘Okhuhelesia OMWAMI Nyasaye oluyali nikhwo obuchesi, ne okhwihanya okhurula khubwonooni nikhwo obumanyilisi.’ ”