Read wanga AYUBU 29 Bible Online

AYUBU 29 - wanga bible

AYUBU 29

¹Mana Ayubu nachaaka okhuboola khandi ari,

²“Shiakhuha obulamu bwanje bwakalukha shinga bwalinji mutsinyanga etsiabira, olwa Nyasaye yanindanga.

³Olwa obulafubwe bwanzimililanga, bwanzimililanga olwa ndachendanga mushiilima.

⁴Tsinyanga etsio ndali neshili nende amaani, khandi obwitsa bwa Nyasaye bwalindanga litaala lianje.

⁵Olwa OMWAMI Nyasaye yalinji nashili ninasi, nabo abaana banje nibali ahambi ninasi.

⁶Olwa tsing'ombe tsianje tsiashelungwa amabeele amanji, nachio emiseituni chianje nichichetulukha amafura amanji.

⁷Olwa ndarulanga ninzia habundu aha abemilisi bakhung'anilanga mwitookho, mana ndikhala mubukono bwanje hakari wabwe.

⁸Olwa abaraaka bandolanga mana banzikwenyela injila, nabo abakofu basinjilanga khulwa okhumbelesia oluyali.

⁹Olwa abemilisi babandu bandolanga shibachinganga omunwa ta, habula baretsanga olwala khuminwa chiabwe khulwa okhuholelesia abandu.

¹⁰Emioyo chiabemilisi shichiahulilikhanga ta, ne tsinimi tsiabwe tsiahandanga mushinakhuna.

¹¹Abandu boosi abambulilakhwo, banzitsoomia, nabo boosi abalolakhwo aka ndakhola, bakafuchilila.

¹²Okhuba ndahonokosia abamanani abahabila mbu ebakhoonye, khandi ndakhoonya abaana ababisandu ababula owokhubakhoonya.

¹³Abandu abalinji nibali ahambi okhufwa baasabila tsikhabi, khandi ndakhola abakhasi abalekhwa okhwikhoya.

¹⁴Aka ndakholanga koosi kalinji akahabwene khandi akobwatoto, obulunjishi bwalinji shinga eshifwalo shianje, ne obukhalachi bwahabwene bwali shinga ikanzu nende eshilemba shianje eshiokhumurwe.

¹⁵Nisie owalinji tsimoni tsiababofu, khandi ebilenje biabalema.

¹⁶Ndali samwana abamanani, khandi ndaterera abarende abali mumatinyu.

¹⁷Ndasasia obunyali bwabamayanu, mana nehonokosia aba abamayanu basandinjia.

¹⁸Ndapaaranga mbu ndalamenya tsinyanga tsinyinji, mana efwe mumulembe nendi hango wanje.

¹⁹Ndali shinga omusaala okwarakwa khusebele ya amaatsi, okwa lime liamanga khumasaka kakwo eshilo shiosi.

²⁰Abandu boosi banzitsoominjia buli lwosi, ne amaani kanje shikahwetsangakhwo ta.

²¹Abandu baarecheresinjia olwa ndaboolanga, khandi baholeelanga tsi olwa ndahananga obuchetsiyi bwanje.

²²Olwa ndamalanga okhuboola, shibameetangakhwo elindi tawe, amakhuwa kanje kabenjilanga mumarwi.

²³Abandu banindililanga shinga olwa balindililanga ifula, banindililanga butswa shinga abalimi olwa balindililanga ifula yeirotso.

²⁴Ndabamwenyelanga kata olwa balinji nibafwile emioyo, nabwo obweni bwanje obusaangaafu bwabameetanga amaani.

²⁵Ndabemilila injila, nebakhalachila amakhuwa, ndabemilila shinga omuruchi yemililanga abelihebe. Ndalemia emioyo abali nibekhuulanga.”