Read wanga AYUBU 3 Bible Online

AYUBU 3 - wanga bible

AYUBU 3

¹Olunyuma lwakano, Ayubu yachaaka okhuboola, ne nalaama inyanga yayebulilwakhwo eshilaamo shiobubi.

³“Inyanga ya ndebulilwakhwo, yibe neshilaamo shiobubi, khandi eshilo shia kaboolwa mbu, ‘Omwana omusiani wakhabelekhwa munda,’ shiosi shirio.

⁴Nyasaye akhole inyanga eyo okhuba eshilima, alachiitsulilakhwo, kata okhufuchililakhwo obulafu okhuchiashila tawe.

⁵Eshiilima nende eshiinikha eshimali ti bichifuunishe, khandi yifuunikhwe namaleesi amamali ti, eshiilima eshio shibe eshia amarisia khuyo.

⁶Eshilo eshio shirusibweho okhurula mutsinyanga tsiomumuyika, khandi shilabalilwakhwo mutsinyanga tsiomumwesi tawe.

⁷Khole eshilo eshio okhukumbahala, khandi shilabakhwo shiobusaangaafu tawe.

⁸Boolele abafumu balaame inyanga eyo eshilaamo shiobubi, abo abali nobusitsa bwokhubuusia Lewiatsani[1]

⁹Yekalile obulafu bweyasulwe buleshe okhuchiashila, eshilo eshio shiikombe obulafu bweliuba nebutswa shilabulolakhwo tawe.

¹⁰Eshilo eshio shilaamwe khulwa okhufuchilila isie okhubelekhwa munda, khandi khulwa okhundeera mumatinyu nende mushibeela.

¹¹Bwakhabeele obulayi nindakhafwilile munda mwa mama wanje, noho kata okhufwa nindakharula mulubeleshelo.

¹²Nishiina eshiachila mama niyandela khumakulu? Nishiina eshiachila niyanunia tsimbeeletsie?

¹³Khane emba ndayabilwa mumulembe, khane emba ndafwa ndahuluukha.

¹⁴Khane bulano emba engonanga halala nabaruchi, nabachetsiyi beshialo abombakha obuyiakha amatookho kali nikakwa amakunda.

¹⁵Khane bulano emba engonanga halala nabaruchi abali neitsahabu, abali nibetsusia tsinzu tsiabwe neifeetsa.

¹⁶Khulwa shiina nindalayabilwa shinga omwana omuhusa, noho shinga omwana owibulwa nafwile?

¹⁷Abamayanu shibanyasinjia abandu emakombe ta, nabo abakholi bemilimo abachonyile banyoolanga obuhulushi ebweneyo.

¹⁸Ebwene eyo ababohe bekhoyanga, bahuluukhanga okhurula khumalako amalulu kabanyapara.

¹⁹Ebweneyo abandu boosi abakhongo nende abatiiti baliyo; nabo ababohe balekhuulwa.

²⁰Mbushiina obulafu bwashile oyo ouli mumatinyu, noho oyo ouli mumanyakhano okhutsilila okhubaho omulamu?

²¹Yekombanga okhufwa nebutswa shifwitsanga ta, Akhabanga okhufwa okhushila oyo oukhaba eshindu shiobukusi.

²²Omundu shinga oyo alasangaala nende okhwikhoya muno olwa afwa nayabilwa.

²³Mbushiina omundu wa injilaye yafiswa ahebwe obulamu, omundu wa Nyasaye yasirira olukaka mukari?

²⁴Okhuba okhushenya nishio eshiokhulia shianje, ne okhubinda khwanje shikhuli neshiakamo ta.

²⁵Okhuba akeritsanga niko akangwilanga, nako akahendinjia niko akanzitsangakhwo.

²⁶Shiendikhwo nomulembe kata obuhulushi ta, shiehuluukhangakhwo ta, nako amatinyu kanje kabula eshiakamo.”