Read wanga AYUBU 30 Bible Online

AYUBU 30 - wanga bible

AYUBU 30

¹Nebutswa bulano banzeshelelanga, abandu abali abaana khwisie, abo aba basamwana babwe balaalikhwo eshindu khwisie tawe, kata shindakhabafuchilile okhukhonya tsimbwa tsianje okhulinda amakondi kanje tawe.

²Amaani kamakhono kabwe kali nobukhoonyi shiina khwisie, abandu aba amaani kabwe kamala okhuhwa?

³Nabatakha muno khandi abeinzala, kho mbu bamenenanga emisi emiumu eshilo nibali mushitsiimi eshikhaya.

⁴Basiulanga likuku nibanoka amasafu komubulimo nibalia, balitsanga kata emisi chiemisaala chiameeyo.

⁵Abandu boosi babaloondanga nibabakhupila tsimbungu shinga abalondachilanga abeebi.

⁶Balunyilisibwa okhumenya mutsimbinga, nende mumeena akokhwiloba nende mutsinyanda.

⁷Baananga shinga tsilolo nibali mubitsakha, nibekhung'asia halala mutsisambakhulu.

⁸Abo nabandu abayingwa khandi ababula oluyali, abanywekhwa nibaloondwa okhurula mushialo.

⁹Ne bulano abaana babwe banyimbanga tsinyimbo tsiokhunzeshelela, engwile butswa eshindu shiokhutseshelelwa.

¹⁰Basinyishiile khandi bebisanga okhurula khwisie, olwa bandola banyilikhakhwo amare.

¹¹Khulwa okhubeela Nyasaye yakholile isie okhuba omuteshele khandi oulanyala okhukhola eshindu shiosi ta, kho betsanga khwisie neliruma liabwe liosi.

¹²Omukanda kuno kuuseeranga okhurulila imbeli, kuunondachililanga, kurechekhanga emibero echiokhuusaalisia.

¹³Kwikalilanga injila yanje yokhuhonokha, nikuteema okhusaasia, ne abulaho oubakaya.

¹⁴Betsa nibenjilila mutsitundu tsiamasiisi kanje, nibenjila okhuusenachila hasi.

¹⁵Amarisia kanyombeleele, oluyali lwanje lukorire shinga omuuya okuhutsilwe nomuyeka, obuyinda bwanje buhwele shinga lileesi elihutsilwe nomuyeka.

¹⁶Bulano endi ahambi okhufwa, shiendikhwo nobuhuluushi tawe.

¹⁷Eshilo amakumba kanje koosi kakhomakanga obululu, okhutsuunwa khwanje shikhuholeelanga tawe.

¹⁸Nyasaye atiilanga ingubo yanje mwikosi namaani, aborolanga ingubo tsana niyimika

¹⁹Nyasaye yasukune mumatoyi, engwile butswa olufu nende likoshe.

²⁰Ekhuhabilanga iwe Nyasaye, nebutswa shiumbulilanga ta, ne olwa esaaya shiurecheresinjia ta.

²¹Iwe ungalukhanekhwo nobululu, khandi usandinjia namaaniko koosi.

²²Iwe olekhanga omuyeka nikunjinga, niurundia eyi nende eyi neimbumbuyeka.

²³Emanyile mbu uyilanga emakombe, habundu aha abali mwoyo boosi baliakanila.

²⁴Omundu nanyoola amatinyu, shiachinguulanga omukhono mbu akhonywe? Naye ouli mubutinyu, shiasabanga obukhonyi?

²⁵Shindalila halala nende abo abali mumatinyu? Khandi shindabelelela abatakha?

²⁶Ne olwa ndanayanga okhunyoola amalayi, amabi niko akangwilanga. Ne olwa ndalindililanga okhulola obulafu, eshilima nishio eshianzitsilanga.

²⁷Amala kanje kayile pia khulwa okhuhenda nende okhutsunwa, buli inyanga yindereranga amatinyu.

²⁸Enjendanga nembeleele, shiedikhwo nobulafu obwokhuusaangaasia ta, Esinjila imbeli wa abomukanda nesaba obukhoonyi.

²⁹Embukulungwa okhuba shinga omusiani wabwe amabwe, khandi shinga omwitsa wa amahuto.

³⁰Eshikhoba shianje shimaliye khandi shikhobokhanga, nakwo omubili kwanje kuyile pia.

³¹Litungu lianje likwile eliokhwikhuula, nalio lilele lianje likwile eliokhupa tsimbungu.