Read wanga AYUBU 31 Bible Online

AYUBU 31 - wanga bible

AYUBU 31

¹“Ndamala okhwitsuba obutinyu mbu, shindakhahenjekhwo khumukhaana neimoni eyokhwimwikomba tawe.

²Nomukabo shiina okwa ndakhanyoola okhurula khu Nyasaye? Kata nobulaame shiina obwandakhanyoola okhurula khu oyo Owobunyali Bwosi?

³Ye arumanga obumululwi khu abamayanu, obusasishi khubakholi bobubi.

⁴Nyasaye amanyile injenda yanje yosi, khandi alolanga koosi akekholanga.

⁵Nimba nindabeyakhwo abandu, noho okhukaatiakhwo abandu,

⁶lekha Nyasaye yanjele khushichelo shiahabwene, ne alamanya mbu embula eshikha.

⁷Nemba nindalekha injila yahabwene, omwoyo kwanje nikuchamisibwa nobwikombi bwetsimoni tsianje; nako amakhono kanje nikonoonibwa nobumayaanu.

⁸Kho lekha abandu bandi bachese ebiokhulia bia ndaraaka, khandi lekha ebirache ebia ndaraaka biosi bisiulwe.

⁹Nimba nindekombakhwo omukhasi yesi yesi wowashianje, mana ningoneshela omukhasi oyo hamuliangowe,

¹⁰kho lekha omukhasi wanje ateeshele omusaatsa undi ebiokhulia, khandi abasaatsa bandi bakone ninaye.

¹¹Okhuba obwonooni shinga obwo nobubi muno, khandi owabukhola akhoyile ahebwe eshinyasio.

¹²Okhuba obwonooni shinga obwo bwakhaba shinga omulilo, kwokhusamba nikusasia buli shindu eshia endi ninashio.

¹³Nemba nindalakholela abakholi banje abeshisaatsa nende abeshikhasi akalali ka habwene ta, kata nemba nindaloba okhuhulila okhwiyiniakana khwabwe,

¹⁴kho nishiina eshia ndalakhola olwa esinjila imbeli wa Nyasaye? Nishiina eshia ndalaboola olwa Nyasaye yayaasia?

¹⁵Nyasaye mulala tsana owalonga isie, khandi niye owalonga abakholi banje. Niye owakhulonga ifwe fwesi.

¹⁶Isie ndalobakhwo okhukhoonya abamanani, noho okhufwisia abakhasi abalekhwa emioyo?

¹⁷Isie ndaliakhwo eshiokhulia shianje sienyene, nindalakabanekhwo nabaana ababisandu?

¹⁸Tawe, okhurula muburaaka bwanje ndabalindanga shinga samwana, khandi okhurula mubwana bwanje ndahendelanga abakhasi abalekhwa.

¹⁹Olwa ndanyoolanga omundu omutakha, khandi omumanani oulanyala okhukula ebifwalo ta,

²⁰ndamuhelesinjia ebifwalo ebiakasibwa okhurula khubwoya bwamakondi kanje omwene, mana naye yanzitsoomia nomwoyokwe kwosi.

²¹Nimba nindasiomesiakhwo omubisandu olwala, nemanyile mbu ndalamuhula mushiina,

²²kho lekha amakhono kanje kakhalishe okhurula mushisakasaka shianje, mana karusibwe mubunjilo bwelibeka.

²³Khulwa okhubeela ndaria eshinyasio shiokhurula khu Nyasaye nende obukhongobwe, shindakhakholile amakhuwa shinga ako tawe.

²⁴Obulamu bwanje nibuba nibwesika itsahabu, noho nindaboolelakhwo itsahabu endi, ‘Niwe omulindi wanje,’

²⁵noho nimba nindasangaala khulwa obuyinda bwanje, noho kata khulwa obunji bwobuyinda bwanje,

²⁶noho nimba nindenamilakhwo eliuba mubulafu bwalio bwosi, noho omwesi mubukondo bwakwo obulayi,

²⁷noho kata okhukaatibwakhwo mbu ebiinamile, khulwa okhutsunzuuna omukhono kwanje khulwa okhubihelesia oluyali,

²⁸nimba nindakhola obwonooni shinga obwo, okhuula ehelesibwe eshinyasio, shichila emba ndafukula Nyasaye.

²⁹Isie ndasangalakhwo olwa abasuku banje banyakhana, kata okhutsaatsahala olwa banyoola obutinyu noho?

³⁰Tawe! Shindafuchililakhwo omunwa kwanje okhwonoona khulwa okhusabila abasuku banje eshilaamo shiobubi tawe.

³¹Abandu boosi abakholelanga emilimo bamanyile mbu, buli lwosi ndenjisinjia abarende.

³²Ndenjisinjia ababiri munzu yanje, shindabalekhanga nibeyalisia khumihanda tawe.

³³Abandu bandi bateemanga okhufisa obwonooni bwabwe, nebutswa isie shindafisakhwo obwanje tawe.

³⁴Isie shindariakhwo kabandu bakhaboola, kata okhuholelakhwo noho okhwifisa munzu shichila mbu erire amanyeko kabwe tawe.

³⁵Shialikhwoho ourecheresinjia akemboolanga ta? Nditsuba mbu, akemboolanga koosi nakatooto. Kho lekha OMWAMI Nyasaye yangalusie. Amakhuwa kabasuku banje banzinjililangakhwo kakhahandikwe mushitabu kho siesi ekalolekhwo!

³⁶Ndakhakachinjile khwibeka nomwikhoyo, nende okhukara khumurwe kwanje shinga olusimbi.

³⁷Ndakhaboolela Nyasaye koosi aka ndakhola, mana esinjile shilunji imbeliwe.

³⁸Nimba nindeeba omukunda kwenimangamwo, nimba nindakubukula okhurula khumwenekwo,

³⁹nimba nindalia ebiokhulia ebirula mumukunda okwo obularunga ta, ne nindekha mwenekwo inzala,

⁴⁰kho mushilenje shieingano noho ishayiri okhumelamwo, lekha obulimo nende libanze bimelemwo”. Amakhuwa aka Ayubu yaboola kahwela yaho.