Read wanga AYUBU 32 Bible Online

AYUBU 32 - wanga bible

AYUBU 32

¹Kho abandu bataru abo balekha okhumukalusia Ayubu shichila omwene yelola okhuba omulunjishi.

²Mana Elihu omwana wa Barakeli owomulwibulo lwa Buzi, owomushilibwa shia Rama nasinyikha. Yasinyikha khulwa okhubela Ayubu yelola omwene mbu nomulunjishi ahalali Nyasaye tawe.

³Elihu khandi yasinyishila abeetsa bataru ba Ayubu abo, shichila shibaali nibanyoolile injila ya bakhakalusiliamwo Ayubu tawe; kho nikafwana shinga Nyasaye niye ouli neshikha.

⁴Khulwa okhubela Elihu niye owaliho omushe muboosi, yalinda okhuula olwa boosi bali nibamalile okhuboola.

⁵Ne olwa yalola mbu abandu bataru abo shibalikhwo nelikalusio liokhuboolela Ayubu ta, oburuma bwamutila.

⁶Mana Elihu nachaaka okhuboola ari; “Isie endi omubuukha, nenywe muli abakofu okhuushila, niko akachilile neria okhumuboolela aka endi ninako.

⁷Ndibooleele omwene endi, ‘Lekha abemiyika eminji baboole, abali nemiyika eminji bechesie akobuchesi bwabwe.’

⁸Nebutswa iroho eyili mumundu, eyirula khu OMWAMI Nyasaye, niyo eyinyalilanga omundu okhuba nobuchesi.

⁹Shikali mbu abakofu nibo abali nobuchesi ta, noho mbu abasakhulu nibo abamanyilisinjia akali habwene tawe.

¹⁰Khulweshio emboola endi, ‘Murecheresie, leshe nasi emboolekhwo aka embaaraanga!

¹¹Ndisimilisiye nirecheresia amakhuwa kenywe olwa muboolilenje, khandi emurecheresiye olwa murunilisiyenje amakhuwa kenywe akamuboola.

¹²Ndamurecheresiye obulayi muno, nebutswa lole, shialikhwoho mwinywe oufukuule aka Ayubu aboolile tawe.’

¹³Mube meeso, mwakhetsukhana mwaboola muri, ‘Bulano khumalile okhunyoola obuchesi’. Nyasaye niye ounyala okhukalusia Ayubu likalusio, nebutswa omundu namundu tawe!

¹⁴Ayubu shiachoomiye amakhuwake kwisie ta, kho shindalamukalusia shinga olwa inywe mumukalusiye tawe.

¹⁵Ayubu, amakhuwa kakhayile abetsabo bano, babula elindi lia bakhakhukalusia.

¹⁶Kho nasi enzililile okhulinda olwa babula elia baboola? Basinjile yaho butswa, babulakhwo likhuwa lindi elia banyala okhuboola.

¹⁷Bulano isie omwene ndalahaana likalusio lianje, khandi ndalakhuboolela aka embaaraanga.

¹⁸Endi namakhuwa amanji muno, iroho yanje yinzuubaanga okhukaboola.

¹⁹Ne nelakaboola ta, ndalaatikha shinga eshimuka eshitsulemwo amalwa amatoro.

²⁰Okhuula emboole kho enyoole obuhuluushi, okhuula engalusiemwo.

²¹Shindalakalushilakhwo omundu yesi ta, kata okhulahakhwo omundu yesi tawe.

²²Okhuba shiemanyilekhwo okhulaha omundu ta, ne nimba nendaha omundu, Nyasaye omulonji wanje yakhamulula bwangu.”