Read wanga AYUBU 33 Bible Online

AYUBU 33 - wanga bible

AYUBU 33

¹“Nebutswa iwe Ayubu, chama ohulile amakhuwa kanje. Orecheresie koosi aka emboola.

²Lola, ndirecheeshe okhuboola, amakhuwa kanje kali khululimi lwanje.

³Amakhuwa kanje koosi nakobulunjishi, khandi emboolanga akatoto.

⁴Roho wa Nyasaye niye owanonga, nachio emiuya echia OMWAMI Nyasaye chimbelesinjia obulamu.

⁵Noba nonyala, ungalusie amakhuwa kanje. Sinjila imbeli wanje niwirecheeshe okhuboola amakhuwako.

⁶Lola, isie ninawe khuli eshindu shilala imbeli wa Nyasaye, fwesi khwalongwa khwitoyi.

⁷Kho obula eshifune eshichila urie isie, shienyala okhukhuhula iwe tawe.

⁸Toto mwene embulile aka oboolile, embuliile koosi aka oboolile.

⁹Oboolile mbu, iwe obula eshikha, khandi shibulaho eshibi eshia wakhola, oli omweleleshe khandi obulakhwo obumayanu bwosi.

¹⁰Oboolile mbu Nyasaye akhunyoolilekhwo eshionoono, mana akhulolanga shinga oli omusukuwe.

¹¹Akhubohanga ebilenjebio neminyololo, khandi akhuhenjelesinjia buli ahotsia.

¹²Nebutswa ekhuboolela iwe Ayubu mbu, shioli habwene tawe. Nyasaye nomukhongo okhushila buli mundu.

¹³Eshichilanga noyingana nende Nyasaye, noboola mbu shiakhukalusinjia amakhuwako nishiina?

¹⁴Kata olwa Nyasaye aboola akhandi akhanji nakalushila, abulaho ourecheresinjia aka aboola.

¹⁵Nyasaye aboolanga nabandu mumalooro nende mumalolelo akeshilo, olwa babetsanga nibeyalisiye mubitali biabwe, tsindoolo tsinyinji nitsibayilile.

¹⁶Nyasaye akholanga abandu okhurecheresia aka aboolanga, mana abasiomela nabarisia.

¹⁷Nyasaye akholanga ario kho mbu abekalile okhukhola obwonooni, khandi abahonie baleshe okhwilola.

¹⁸Kho yekalilanga omundu aleshe okhukwa mubuko, amuhonokosinjia okhurula mulufu.

¹⁹Nyasaye akololosinjia omundu khulwa okhumurumila obulwale, khandi khulwa okhwitsusia obutsunwi mumubilikwe.

²⁰Akholanga omwoyo kwomulwale oyo okhurula khushiokhulia, kata eshiokhulia eshilayi shimusinyanga.

²¹Omubilikwe kung'aha, nako amakumbake koosi kalolekha.

²²Olwa abetsanga nali ahambi okhufwa, nali ahambi okhutsia emakombe.

²³Nebutswa omumalaika naba ahambi ninaye, mulala khubamalaika abanji ba Nyasaye, oumanyinjia abandu aka bakhoyile okhukhola,

²⁴anyala okhumulolela tsimbabasi, mana aboolele Nyasaye ari, ‘Muhonie, shialatsia emakombe ta. Emalile okhunyoola omurungokwe kwobulekhuulwi.’

²⁵Kho omubili kwomundu oyo kulakalukha okhuba shinga okwomubukha, kulabamwo amaani khandi shinga aka yali ninako nashili omuraaka.

²⁶Mana omundu oyo alasaaya khu Nyasaye, naye Nyasaye alafuchilila amasaayoke; Alenamila Nyasaye nobusaangaafu, naye Nyasaye alamukalusilia obulamubwe bwobulunjishi.

²⁷Omundu oyo alarumbula imbeli wabandu naboola ari, ‘Isie ndonoona, neshiamia akali akahabwene, nebutswa shindaanyoola eshinyasio shia ndali nengwanile okhunyoola tawe.

²⁸Nyasaye yahonokosia okhutsia emakombe, eshiliho mwoyo khandi endolanga obulafu.’

²⁹Lola! Nyasaye akholelanga omundu kano koosi, akhandi akhanji.

³⁰Akholanga ario khulwa okhuhonokosia omundu, kho aleshe okhutsia emakombe, kho mbu alole obulafu bwobulamu.

³¹Ayubu, urecheresie khandi umbulile obulayi bwene; oholeele tsi, nasi ndalaboola.

³²Noba noli nende likhuwa liosi eliokhuboola, mboolela, okhuba ndenya okhukhumanyia mbu obula eshikha.

³³Ne noba nolali ninalio ta, oholeele tsi, nasi ndalakhwechesia obuchesi.”