Read wanga AYUBU 34 Bible Online

AYUBU 34 - wanga bible

AYUBU 34

¹Mana Elihu natsiililila okhuboola ari,

²“Hulile amakhuwa kanje inywe abandu bobuchesi, muurecheresie inywe abandu bobumanyilisi.

³Okhuba eshirwi shihulilisinjia amakhuwa, shinga olwa olulimi lutsanzamanga eshiokhulia.

⁴Leshe khwahule akali habwene, chende ifwe abeene khwahule akali amalayi.

⁵Okhuba Ayubu aboolanga mbu ye abula eshikha, nebutswa Nyasaye alobanga okhumukholela aka habwene.

⁶Kata olwa emba nendi omulunjishi, embukulungwa okhuba omubeyi, likonzo lianje shilihonanga ta kata olwa emba nembula eshikha.

⁷Mwalolakhwo omundu ouli shinga Ayubu uno? Owa okhuchaaya, khuye khuli shinga okhunywa amaatsi.

⁸Achamanga okhuba halala nabandu abamayanu, khandi achendanga nabandu abonooni.

⁹Okhuba aboolanga mbu, ‘Shibulaho eshilayi shiomundu anyoola, khulwa okhuteema okhuchamisia Nyasaye.’

¹⁰Khulweshio murecheresie inywe abobumanyilisi! Nyasaye shianyala okhukhola obumayanu ta. OMWAMI Nyasaye shianyala okhukhola obubi ta.

¹¹Nyasaye arunganga omundu omurungo khukakholanga, khandi amurunga okhulondana nebikholebie.

¹²Nakatoto mbu, Nyasaye shiakholanga obumayaanu tawe; OMWAMI Nyasaye shiashiaminjia akahabwene tawe.

¹³Niwiina owamukhola ye okhuba nobunyali khushialo shiosi? Kata niwiina owamukhola okhuba omuruchi khushialo shiosi?

¹⁴Nyasaye niyakhayiniyeho irohoye nende emiuyachie echiobulamu,

¹⁵abandu boosi bakhafwile, mana boosi bakhakalushe khulufu.

¹⁶Kho noba noli nobuchesi recheresia kano, hulila akekhuboolela kano.

¹⁷Nyasaye ourukanga eshialo namalakoke yakhafukula obukhalachi bwa habwene? Wakhayaasia omulunjishi khandi owobunyali?

¹⁸Shiali niye ouboolelanga abaruchi ari, ‘Mubula inganga,’ Khandi abaami ari, ‘Muli abonooni.’

¹⁹Ye shiakholelanga abaruchi ebiela ta, khandi shiachamanga abayinda okhushila abamanani tawe, okhuba niye owabalonga boosi.

²⁰Abandu abo bafwitsanga masundusia, batechesibungwa nibasikha mushilo hakari. Nabo abobunyali berungwa obulekhoonyela amaani ta.

²¹Tsimoni tsia Nyasaye tsilolanga injenda ya buli mundu, khandi tsilolanga buli habundu aha atsia.

²²Habulaho habundu hamali ti noho eshiilima eshikhongo, eshia abamayanu banyala okhwibisamwo okhurula khu Nyasaye.

²³Nyasaye shiyarakhwoho eshise shiomundu akhoyile okhutsia imbeliwe, okhuyaasibwa tawe.

²⁴Arusinjiaho abamaani nalareebelesiye ta, mana akalusia abandi mushilenje shiabwe.

²⁵Khulwa okhubela amanyile aka bakholanga abarusinjia khuburuchi bwabwe namaani mana abatubula mushilo.

²⁶Abahelesinjia eshinyasio imbeli wa abandu boosi, khulwa okhubela obumayanu bwabwe.

²⁷Abahelesinjia eshinyasio khulwa okhubela balekha okhumulonda, khandi balechelesia amalakoke koosi.

²⁸Bachila abamanani nibamuhabila, naye nahulila okhuhaba khwabwe.

²⁹Nyasaye naba naholeela tsi, niwiina owakhamukondoshela? Naba niyebisa, niwiina owakhamulola? Kata libe lihanga noho omundu yesi?

³⁰Akholanga ario kho mbu omundu omumayaanu, noho abo abaretsanga obulamu bwabandu mumatinyu baleshe okhuruka.

³¹Omundu naba naboolela Nyasaye ari, ‘Ndonoonile, nebutswa shindalonoonakhwo khandi tawe;

³²Umanyie obwonooni bwandalanyala okhulola ta; nemba nindakhola obumayaanu, shindalakalushilakhwo khandi tawe.’

³³Shinga olwa iwe ololanga, opaara mbu Nyasaye akhoyile okhuhelesia omundu oyo eshinyasio? Niwe oukhoyile okhuhaana likalusio, shiendi isie tawe. Kho boolakhwo aka iwe opaaranga.

³⁴Abandu bobumanyilisi, nende boosi abali nobuchesi, abarecheresinjia, balaboola mbu,

³⁵‘Ayubu aboolanga amakhuwa akobuyingwa, khandi amakhuwake shikali akobuchesi tawe.’

³⁶Yililisiekhwo khumakhuwa koosi aka Ayubu aboolanga, mulanyoola mbu, aboolanga amakhuwa shinga omundu omumayanu.

³⁷Ameetanga khubwonoonibwe obukhayi, anyekanga Nyasaye imbeli wefwe, niyenjiyia amakhuwake kokhufukula Nyasaye.”