Read wanga AYUBU 35 Bible Online

AYUBU 35 - wanga bible

AYUBU 35

¹Mana Elihu natsiililila okhuboola ari,

²“Opaaranga mbu kali habwene iwe omwene okhwirumbula ori, ‘Endi omulunjishi imbeli wa Nyasaye?’

³Khandi oreebanga Nyasaye ori, ‘Neinganga shiina eya ndanyoola khulwa okhumenya obulamu bwobulunjishi? Neinganga shiina eya ndanyoola khulwa okhubula okhwonoona?’

⁴Isie ndalakhukalusia, iwe halala nende abetsabo bano.

⁵Henga ikulu mwikulu mana olole, rangaala amaleesi akali ikuluwo.

⁶Noba niwonoona, obwonooni obwo bwakhasalisia burie Nyasaye? Ne obwonoonibwo nibumeetekha, bwakhakhola shiina khu Nyasaye?

⁷Ne noba noli omulunjishi, neinganga shiina eya Nyasaye anyoola? Kata nishiina eshia anyoola okhurula khwiwe?

⁸Obwonoonibwo busalisinjia butswa omundu washio, khandi obulunjishibwo bukhoonya butswa omundu washio.

⁹Abandu balilanga khulwa okhubela basandibungwa muno, khandi bahabanga mbu bahabinwe khulwa okhubela obuminwi oburula khubandu abobunyali.

¹⁰Nebutswa abulaho oureebanga ari‘Ali hena Nyasaye omulonji wanje, ousangasinjia mushilo?

¹¹Ali hena oukhwechesinjia okhushila tsisolo tsiokhushialo? Oukhukholanga okhuba abachesi okhushila amanyonyi koosi?’

¹²Bahabanga mbu bakhoonywe, nebutswa Nyasaye shiabakalusinjia ta, khulwa okhubela nabeisunga khandi abamayanu.

¹³Toto mwene Nyasaye shiarecheresinjia okhuhaba khwabutswa tawe, OMWAMI Nyasaye shiatebanga okhuhaba okhwo tawe.

¹⁴Yakhakhukalusia arie, olwa iwe oba noboolanga mbu, shiomulolanga ta, khandi mbu, okhuhabakhwo khuli imbeliwe, nawe omulindililanga?

¹⁵Iwe opaaranga mbu Nyasaye shiahananga eshinyasio ta, khandi mbu shiateebanga obwonooni tawe.

¹⁶Namakhaya butswa iwe Ayubu okhutsiililila okhuboola, kali habwene mbu, shiomanyile shioboolanga tawe.”