Read wanga AYUBU 36 Bible Online

AYUBU 36 - wanga bible

AYUBU 36

¹Elihu natsiililila okhuboola ari,

²“Unzisimilisie hatiiti, mana ndalakhumanyia mbu, kashiliho akenzenya okhuboola mushilenje shia Nyasaye.

³Obuchesi bwanje bwarula ehale, ndalabwikhoonyela okhulolesia mbu, omulonji wanje akholanga aka habwene.

⁴Omanye mbu amakhuwa kanje kekhuboolelanga shikali akobubeeyi tawe. Owoli ninaye uno nomundu wobuchesi bwatoto.

⁵Nyasaye nowamaani, ne shiachayangakhwo omundu yesi ta; Obunyali bwobumanyilisibwe nobukhongo muno.

⁶Shiafuchililanga abamayanu okhumenyaho tawe, ne buli lwosi ahelesinjia abasandibungwa aka bakhoyile okhunyoola.

⁷Shialekhanga okhulinda abalunjishi ta, habula abemekhanga okhuruka, mana abakhola okhunyoola oluyali inziayo.

⁸Ne nibaba nibabohwa neminyololo, nibanyakhana khulwa okhubela aka bakholile,

⁹Nyasaye abetsanga nabamanyia obumayanu bwabwe, nende isunga yabwe.

¹⁰Yekulanga amarwi kabwe kho mbu bahulile amebaaloke, nabalachilisia mbu bekalukhasie baleshe okhukhola obumayanu.

¹¹Ne nibaba nibahulila Nyasaye, khandi nibamukhalabanila, balamenya obulamu bwabwe mumulembe khandi balayindihala.

¹²Nebutswa nibaba nibalamuhulila ta, baleerwa nolukanga, mana bafwe khulwa okhubula obumanyilisi.

¹³Abo abalahelesinjia Nyasaye oluyali ta, bachamanga okhusinyikha. Ne kata olwa bahebwa eshinyasio, shibahaabanga mbu bakhoonywe tawe.

¹⁴Bafwitsanga nibashili abaraaka, obulamu bwabwe busishilanga mushifwabwi.

¹⁵Nebutswa Nyasaye ahoninjia abandu okhubirira mukhunyakhana khwabwe, khandi yekhoonyelanga amanyakhano kane ako khulwa okhwikula amarwi kabwe.

¹⁶Nyasaye yakhurusia iwe Ayubu mumatinyu, nakhukhola okhusangaala mumulembe, nayo imesayo yetsulangakhwo ebiokhulia ebilayi.

¹⁷Nebutswa bulano ohelesibungwa eshinyasio shiomumayanu, eshinyasio nende obukhalachi bwahabwene bikhwitsilekhwo.

¹⁸Wichendelesie obulayi oleshe okhukaatibwa nobuyinda obunji, noho okhukosibwa nende eshiomufusi.

¹⁹Kho obuyindabwo bulakhukhonya okhurula mumatinyu noho? Kata amaaniko kalakhuhonia okhurula mumanyakhano noho?

²⁰Shioleekomba mbu eshilo shitse ta, okhuba nilwo olwa abandu bamululwa.

²¹Wichendelesie obulayi, olakhola obumayanu tawe, okhuba warumilwa amanyakhano ako kho mbu kachile oleshe okhukhola obumayanu.

²²Witsulile mbu obunyali bwa Nyasaye nobukhongo muno, khandi ye niye omwibaali omukhongo okhushila abandu boosi.

²³Niwiina ounyala okhuboolela Nyasaye eliakhola? Noho okhumuboolela mbu, ‘Okholile obumayanu.’

²⁴Yetsoomibungwa buli lwosi khulwa emilimochie, kho okhuula wesi khandi omwitsoomie.

²⁵Abandu boosi bamalile okhulola aka yakhola, nebutswa omundu namundu akalolelakhwo butswa ehale.

²⁶Shikhunyala okhumanya koosi akobukhongobwe ta, kata okhubala obunji bwemiyikachie tawe.

²⁷Nyasaye niye oubukulanga amaatsi okhurula khushialo, nakakhola okhuronya okhurula mwikulu shinga ifula.

²⁸Akholanga ifula eyo okhukwa okhurula mumaleesi niyikwila abandu boosi khushialo.

²⁹Aliho ounyala okhumanya shinga olwa amaleesi kachendanga? Noho shinga likulu likukumanga mwikulu wa Nyasaye yamenya?

³⁰Arumanga tsimbenutsie mwikulu liosi, nebutswa eshisina shiene shieinyanza shisikalanga mushiilima.

³¹Nolwa aliisinjia abandu, nabahelesia ebiokhulia mubunji.

³²Atiilanga oluhenu namakhonoke, mana alukhola okhuupa aha yenya.

³³Okhukukuma khwelikulu khumanyinjia okhwitsa okhweifula yolucheka, ne kata tsing'ombe tsimanyanga mbu ifula eyo yili ahambi.”