Read wanga AYUBU 37 Bible Online

AYUBU 37 - wanga bible

AYUBU 37

¹“Okhukukuma khwelikulu khuno khuchilanga omwoyo kwanje nikurenga, nikukhupa obutinyu shinga okwenya okhurula.

²Mwesi recheresie omwoyo kwa Nyasaye, recheresie okhukukuma okhurula mumunwakwe.

³Arumanga oluhenu okhuhenukha mwikulu, lurulanga khundulo khweshialo okhuula khundulo khundi.

⁴Olunyumakhwo okhukukuma khwomwoyokwe khuhulilikha, omwoyo kwa Nyasaye kukukuma nomwikhoyo, ne khushise tsana eshio aruma okhuhenukha khwoluhenu.

⁵Nyasaye akukumanga nomwoyokwe munjila yokhuchenya, akholanga ebindu biamakana ebiakhulanyala okhumanyilisia tawe.

⁶Okhuba aboolelanga itsaluchi ari, ‘Okwe khushialo!’ Nayo ifulaye ari, ‘Okwe namaani.’

⁷Yekalilanga abandu okhukhola emilimo chiabwe, mana abamanyia aka omwene anyala okhukhola.

⁸Akholanga tsisolo nabulimo okhwifisa, atsikholanga okhutsia mubimenyo biatsio mutsinyanda.

⁹Imbumbuyeka yihutsa okhurula emulambo, nabwo obushindu obunyifu tsi buhutsa okhurula emasaba.

¹⁰Omuuya kwa Nyasaye kukholanga amaatsi okhunyira tsi shinga itsaluchi, mana amaatsi ako kakwa lichina linyifu tsi.

¹¹Nyasaye yetsusinjia amaleesi nende amaatsi, mana aruma tsimbenu okhumwesushila muko.

¹²Khulwa obunyalibwe amaleesi ako kachendanga nikabotokhana, kakholanga aka ye akalachilisia okhukhola khushialo.

¹³Nyasaye arumanga ifula khulwa okhutosia eshialo, anyala okhuchiruma khulwa okhuhelesia abandu eshinyasio, noho khulwa okhumanyia obuheelibwe khubo.

¹⁴Ayubu wisimilisiekhwo hatiiti, paarakhwo khukebikhole biamakana bia Nyasaye akholanga.

¹⁵Omanyilekhwo shinga Nyasaye ahaananga amalakoke, khandi shinga olwa akholanga oluhenu okhuhenukha mumaleesi?

¹⁶Omanyilekhwo shinga olwa amaleesi keelemanga mwikulu? Echio nemilimo chiokhuhuchisia echia obusitsa bwa Nyasaye.

¹⁷Iwe ourulanga oluchesi mutsingubotsio olwa omuyeka kwemulambo kuba nikuhutsanga nikunyisia eshialo.

¹⁸Onyala okhukhonya Nyasaye okhubambuula likulu, mana olikhole okhuba eliumu shinga eshibia shiarutwa noho?

¹⁹Khwechesie aka khunyala okhuboolela Nyasaye, okhuba libulaho elia khumanyile, khuli mushiilima.

²⁰Shienyala okhureeba mbu emboolele Nyasaye likhuwa tawe, mbushiina emuhelesie obwiyangu bwokhumulula?

²¹Ne bulano abandu shibanyala okhuhenga khuliuba ta, shichila obulafu bwalio nobunji muno mwikulu, olwomuyeka kuba nikweyile nikuyiniaho amaleesi koosi.

²²Eshing'inang'ina shinga itsahabu shilolekha emasaba, naye Nyasaye ubotokhanwe noluyalilwe lwokhurisia.

²³Shikhunyala okhulola OMWAMI Nyasaye tawe. Ye nomukhongo mubunyali nende mubukhalachi bwahabwene, ne shiasandinjiakhwo abandu tawe.

²⁴Khulweshio abandu boosi bamuhelesinjia oluyali, ne shiateebanga ababoolanga abeene mbu nabachesi tawe.”