Read wanga AYUBU 38 Bible Online

AYUBU 38 - wanga bible

AYUBU 38

¹Mana OMWAMI Nyasaye nakalusia Ayubu okhubirira mumbumbuyeka naboola ari,

²“Nawe niwe wiina oukanakaninjia akobuchesi bwanje, khulwa okhureeba amakhuwa akobusilu khandi amakhaya butswa?

³Kho sinjila niwumile ikholo shinga omusaatsa, ndalakhureeba amareebo, nawe ungalusie.

⁴Wali heena olwa ndakhupa omuse kweshialo? Mboolela noba noli nobumanyilisi.

⁵Niwiina owachela obukhongo bwashio? Niwiina owashichela nomukoye?

⁶Nishiina eshitilanga tsisiilo tsiishio shileshe okhukwa? Kata niwiina owasimikha lichina liashio eliomukona,

⁷olwa tsing'ining'ini tsiomumabwibwi tsiembela halala, nabo abamalaika abomwikulu boosi nibasangaala?

⁸Niwiina owekalila amarunda keinyanza, olwa kayakukha nikachaka okhwirunda okhurula mubuchachilo bweshialo?

⁹Nisie owafuunikha inyanza namaleesi mana nechiboha mushiilima eshimali ti.

¹⁰Ndaraho olwakho lweinyanza, mana nechiikala nemiliango nebichabi.

¹¹Nechiboolela endi, ‘Hano niho aha olaakamanga, shiolabiraho ta! Hano niho aha amarundako kamaani kalaakamila!’

¹²Iwe Ayubu, okhurula niwibulwa walakakhwo eshialo okhushia? Noho wakholakhwo okhushia okhumanya habundu waho?

¹³Kata walakakhwo obulafu bweinyanga okhwakha khutsindulo tsiosi tsieshialo, nibukhola abamayanu okhutechela nibarula aha bebisanga?

¹⁴Omubasu okwo kukholanga ebikulu nende amabanda okhulolekha shinga omukunjo kweingubo, bilolekhanga obulayi shinga amang'oole ng'oole kokhushilonje shielitoyi.

¹⁵Abamayanu balemwa obulafu bwabwe, khandi omukhono kwabwe okwabachingulanga okhukhola amakhuwa keinduli kulafunakwa.

¹⁶Iwe wayolakhwo khutsisebele etsili hasi weinyanza? Noho wachendakhwo khulwalo lweinyanza ikhongo?

¹⁷Omundu wakhumanyiakhwo ebilibwa bikalanga eshialo shiemakombe? Noho kata ebilibwa bieshialo eshimali ti.

¹⁸Ne iwe wamanyakhwo obukhongo bweshialo shinga olwa buli? Ungalusie noba nomanyile amakalusio ako koosi.

¹⁹Omanyilekhwo injila eyitsia ewobulafu burulanga? Noho weshilima shirulanga?

²⁰Onyala okhubiyila ewa bimenyanga? Kata onyala okhumanya injila yitsia ewa birulanga?

²¹Emanyile mbu onyala okhungalusia amareebo kano koosi, shichila oli omukofu muno, khandi waliho olwa eshialo shialongwa!

²²Iwe wayenjilakhwo mumabishilo keitsaluchi? Noho walolakhwo amabishilo kamachina keifula?

²³Isie omwene ndabibikha khulwa ebise biamatinyu, nende khulwa tsinyanga tsia lihe nende obulwani.

²⁴Iwe wayolakhwo ewa eliuba lirulanga? Noho habundu aha omuyeka kwebukwe kurulanga nikusalaana khushialo shiosi?

²⁵Niwiina owakaasia injila ya ifula? Niwiina owakasilia likulu liokhwatulukha injila?

²⁶Niwiina oukwisinjia ifula khushialo shiabandu balamenyamwo ta, nende mushitsiimi shiomundu obulamwo?

²⁷Niwiina outsushililanga amaatsi khwiloba eliumu khandi eliahalakha, kho mbu obunyasi busebushekhwo?

²⁸Ifula yilikhwo nende samwana? Ne niwiina owebula liime?

²⁹Niwiina owebula ibarafu? Ne niwiina owebula lifumbi?

³⁰Nibio ebikholanga amaatsi okhuba amomu shinga amachina, khandi bikholanga ikulu weinyanza okhunyira tsi.

³¹Onyala okhuboha halala olunyaali lwetsing'ining'ini tsiomwikulu? Kata okhutendeyia ebibohelo biatsio?

³²Iwe onyala okhwimilila tsing'ining'ini kho mbu tsiloleshe mubise biatsio? Noho kata okhwimilila ing'ining'ini yikhongo nabaana bayo?

³³Iwe omanyile amalako kalindanga likulu? Ne onyala okhukakhola kekhonyelwe khushialo?

³⁴Iwe onyala okhulanjilisia nolaka amaleesi kolucheka? Noho okhukalaka mbu kakhukwisilie ifula yolucheka?

³⁵Ne noba nolachilisia oluhenu okhuhenukha, lunyala okhwitsa khwiwe mana lukhuboolele mbu, ‘Endi hano okhukhukhalabanila?’

³⁶Niwiina ouboolelanga linyonyi mbu, omwalo kwa Naili kuletsula? Noho niwiina ouboolelanga itaywa mbu ifula yilakwa?

³⁷Niwiina ouli nobuchesi bwokhubala amaleesi? Niwiina ounyala okhukenamia hasi kho kakwisie ifula,

³⁸eyikalukhasinjia olufu okhukwa obutoyi, niyikhola liloba okhutiilana?

³⁹Onyala okhuyimila italanyi eshia yilia? Onyala okhwikusia tsitalanyi tsimbuukha etsili inzala,

⁴⁰olwa tsifisa mutsimbinga tsiatsio, noho nitsikoneshela mubimenyo biatsio?

⁴¹Niwiina oulisinjia amakhokho olwa kalumungwa inzala, kata olwa abaana bako bahaabila isie Nyasaye nibenya ebiokhulia?”