Read wanga AYUBU 39 Bible Online

AYUBU 39 - wanga bible

AYUBU 39

¹“Iwe wamanyakhwo olwa tsimbusi tsiomubikulu tsiibulanga? Walolakhwo ebitsusu nibiibulanga?

²Wakhamanya emiesi chia bimalanga nabaana babio munda? Wakhamanya inyanga eya biibulilakhwo?

³Omanyile olwa biireka okhwibula? Olwa biireka okhwibula abaana babio?

⁴Abaana babio bakhulilanga mwiswa nibaba namaani, mana balekha nyina nibakhamila mwiswa.

⁵Niwiina owalekhuula tsisishili tsiomubulimo okhutsia mubulimo? Niwiina owatsiboholola khumikoye natsilekha okhuchendachenda?

⁶Ndatsihelesia eshialo eshiangalamwe okhuba eshimenyo shiatsio, mana nitsilekha okhumenya mumihololokho echiomunyu.

⁷Tsiamenya ehale okhurula khuluyoka lwelitookho, ne shitsihulilanga okhuyiba okhwa outsikhosinjia emilimo ta.

⁸Obwayilo bwatsio buli mubikulu, ewa tsikhabanga okhwaya obunyasi obubisi bwosi.

⁹Imboko yinyala okhufuchilila okhukhukholela emilimo noho? Yinyala okhufuchilila okhukona munzu yochiumbashiile noho?

¹⁰Onyala okhuboha imboko khwichoki mana yikhulimile omukunda noho? Noho yikhwarile tsinyaali mumukundakwo?

¹¹Onyala okhuyiisika khulwa okhubela amaani kayo namanji? Wakhayileshela emilimochio emisiro mbu yikhukholele noho?

¹²Opaaranga mbu yinyala okhukhureerera hango imele yochesile? Noho yinyala okhukhubunjelesilia imele okhurula mulwanyi lwokhuhuulilakhwo?

¹³Tsimbaha tsielihuto tsikhupanga munjila yokhuchamisia, nebutswa shilinyala okhupulukha okhushila indutsu tawe.

¹⁴Lihuto lilekhanga amabuyu kalio hasi khwiloba, kho mbu kanyoole obutundumu bwomwiloba.

¹⁵Nebutswa shilimanyanga mbu kanyala okhusenwa, noho okhutubulwa neisolo tawe.

¹⁶Likholelanga abaana balio amatinyu, shinga abalali balio ta, khandi shiliteebangakhwo eshindu mbu amaani kalio katsiile butswa eshikhaya tawe.

¹⁷Nisie Nyasaye owalikhola okhuba lisilu, khandi shindalihelesiakhwo obuchesi kata butiiti tawe.

¹⁸Nebutswa olwa lichinguukha okhwilukha lilukhanga bwangu muno, nilishila ifarasi nende oyo ouchendelakhwo.

¹⁹Ayubu, niwe owahelesia tsifarasi amaani katsio noho? Niwe owatsifwala amaswa amarambi keleelanga mwikosi mwatsio noho?

²⁰Niwe outsikholanga okhuruumachila shinga tsisiche, nende okhurisia abandu khulwa okhufuura emiuya noho?

²¹Tsituukhuula hasi mwibanda, nitsiikhoyela amaani katsio; mana tsilukha namaani katsio koosi okhutsia mubulwani.

²²Shitsiritsangakhwo eshindu shiosi ta, kata olukanga shilunyala okhutsirisia tsielukha tawe.

²³Ebimanulwa bia abachendelanga khutsio bachinganga, bituyananga nibikhola obuyoka khandi bing'inang'ina khuliuba.

²⁴Tsifarasi etsio tsiilukhanga nitsitsia imbeli khulwa obululu nende oburuma, kata shitsinyala okhusinjila olwolwika lukhupwa ta.

²⁵Buli olwa olwika lukhupwa, tsifarasi etsio tsiana, tsihunyilisinjia obulwani nitsishili ehale, khandi tsihulililanga ehale abakhongo belihe nibahaana amalako.

²⁶Lihungu liekanga okhupulukha okhurula khwiwe olwa libambulanga tsimbaha tsialio nilihenjesiye emulambo noho?

²⁷Indutsu yilindililanga mbu ochilachilisie kho yumbashe eshitsu shiayo ikulu mubikulu noho?

²⁸Indutsu yikasinjia eshimenyo shiayo mutsinyanda, mana yikhola amachina amarambi okhuba olukoba lwayo.

²⁹Habwene yaho yihenjelangaho ehale nende ahambi, eshia yinyala okhwira niyilia.

³⁰Tsingosia tsikhung'asilinjia aha emibili chifwile chili, nabo abaana batsio bakhombamanga amalasile kachio.”