Read wanga AYUBU 4 Bible Online

AYUBU 4 - wanga bible

AYUBU 4

¹Mana Elifasi okhurula Temani nareeba Ayubu ari:

²“Omundu naba nateema okhukhuboolela likhuwa olasinyikha noho? Nebutswa niwiina owakheyikalila okhuboola?

³Lola! Iwe wechesia abandu abanji, khandi watinyilisia amakhono aka abo abatamba amaani.

⁴Omundu niyesichirala nahwele amaani khandi nachoonyile amakhuwako kamutinyilisinjia okhusinjila.

⁵Ne bulano nebisebio biokhuba mumatinyu nebutswa ofwile omwoyo, kakhwitsilekhwo, nawe ohwele amaani.

⁶Iwe wenamilanga Nyasaye, ne obulamubwo bwali obubula eshikha. Kho bulano otinye omwoyo khandi obe nobunayi.

⁷Yitsulilakhwo, niwiina owalikhwo omundu oubula eshikha mana nasikha, noho owali omulunjishi ne namululwa?

⁸Aka ndalola ngakano mbu; abo abalimanga obumayanu, mana baraaka amasila bachesanga butswa ebiatsana ebio.

⁹Nyasaye abamululanga bwangu nemiuyachie, khandi abasasinjia mwirumalie.

¹⁰Abandu abamayanu baholanga shinga tsitalanyi, nebutswa Nyasaye atsiholelesinjia nafunaka ameeno katsio.

¹¹Tsitalanyi tsiamaani tsifwitsanga khulwa okhubula eshia tsilia, natsio tsitalanyi tsimbukha tsisalasibwa.

¹²Ndaboolelwa likhuwa mabiswi, amarwi kanje kahulila nilimoonywa.

¹³Lianzitsila mumalolelo keshilo, olwa tsindoolo tsinyinji tsiyilanga abandu.

¹⁴Ndatechela khandi nihenda omwoyo, omubili kwanje kwosi nikutechela khulwa oburi.

¹⁵Mana eshindu nishibura mumoni mwanje, amaswa akokhumubiri kwanje nikasinjila.

¹⁶Eshindu eshio shiasinjila shilunji imbeli wanje, ndashirangaala nebutswa ndakhaywa okhushimanyilisia obukondo bwashio. Eshindu nalebe shiandoleshela mumoni. Mana nimbulila omwoyo okhurula mubuholelefu nikuboola kuri;

¹⁷‘Mana omundu namundu anyala okhuba omulunjishi imbeli wa Nyasaye? Ne omundu anyala okhuba omweleleshe imbeli wa omulonjiwe?’

¹⁸Nyasaye shiyesikanga abakhalabanibe bomwikulu ta, kata abamalaikabe abanyoolangakhwo eshikha.

¹⁹Kho opaara mbu anyala okhwisika omundu namundu ouli eshilonje shielitoyi, owobuchaachilobwe buli butswa olufu, khandi outubulwa butswa shinga likuyukuyu?

²⁰Omundu anyala okhubaho omulamu mumabwibwi, nebutswa afwa omundu nalamanyakhwo ta, obwile nibushili okhuula, akhamuukha inziayo naletsulilwakhwo khandi ta.

²¹Ne obulamubwe bubukulwa, naye omwene afwa nashili okhubakhwo nobuchesi.”