Read wanga AYUBU 40 Bible Online

AYUBU 40 - wanga bible

AYUBU 40

¹OMWAMI Nyasaye natsiililila okhureeba Ayubu ari,

²“Iwe oundulanga, olayingana ninasi, isie OMWAMI Nyasaye? Iwe ouyingananga nende isie Nyasaye, bulano ngalusia amareebo kanje ako?”

³Mana Ayubu nakalusia OMWAMI Nyasaye naboola ari,

⁴“Lola isie ndaboola butswa mukhukorwa, ndakhakhukalusiamwo shiina? Shindalateema okhuboolakhwo likhuwa lindi liosi tawe.

⁵Emalile okhuboola amanji okhushila aka ekhoyile okhuboola.”

⁶Mana OMWAMI Nyasaye nakalusia Ayubu okhurula mumbumbuyeka naboola ari,

⁷“Sinjila mumasinji shinga omusaatsa, mana ungalusie amareebo kenzia okhukhureeba.

⁸Iwe oteemanga okhumanyia mbu isie shiendi habwene ta? Kho uretsangakhwo amabi, nawe niwikhola okhuba omulunjishi noho?

⁹Kho oli namaani amanji shinga akanje noho? Kata onyala okhukukuma nomwoyo omukhongo shinga okwanje noho?

¹⁰Nikaba nikali kario, kho sinjila umanyie oluyalilwo nende obunyalibwo. Wifwale obukhongo nende obunyali.

¹¹Hengakhwo khu abo abechinjimisia, obahalabile muburumabwo mana obatutuyie.

¹²Hengakhwo khu boosi abechinjimisia mana obeeshie hasi. Osenachile abamayanu hasi ha basinjiile.

¹³Obayabile boosi hasi mumaloba, obabohele mushialo shiemakombe.

¹⁴Nasi ndalaba owambeli okhukhwitsoomia, nefuchilila mbu iwe winyooleele obuhuli omwene.

¹⁵Lolela khukusolo okukhongo mbu Behemotsi[4] ndakulonga khandi nikhulonga iwe, kwayanga obunyasi shinga ing'ombe.

¹⁶Amaani kakwo kali mushishienje shiakwo, ne obunyali bwakwo buli mumisi chiakwo chiomuunda.

¹⁷Kumiinjia omushila kwakwo shinga omusiita, emisi chietsibaatswa tsiakwo chialimaana halala.

¹⁸Amakumba kakwo namatinyu shinga omukasa, nabio ebilenje biakwo bili shinga eshibia.

¹⁹Eshio nishio eshilonje shianje eshiokhuchenyia mubiosi. Isie omulonji washio, nisie sienyene ounyala okhukuhula.

²⁰Obunyasi bwa kwayanga bumelanga mubikulu, ewa tsisolo nabulimo tsibayilanga.

²¹Kwiyalisinjia mushiinikha shiebitsisia nikwifisa mwise nende mwitubwi.

²²Ebitsisia tsana bikufunikhakhwo eshiinikha, nako amakuuku kokhumwalo kakufumbila.

²³Kata omwalo nikwitsula nikuyombokha, Behemotsi shikutechelanga tawe, kata olwomwalo kwa Yorodani kuyemba okhuula khumunwa kwakwo shikutechelanga tawe.

²⁴Niwiina ounyala okhukubofusia mana akutiile? Kata niwiina ounyala okhufutula amoolu kakwo neingaka?”