Read wanga AYUBU 41 Bible Online

AYUBU 41 - wanga bible

AYUBU 41

¹“Onyala okhuloba Lewiatsani[5] okhurula mumaatsi noluloba? Noho okhuboha olulimi lwakwo nomukoye?

²Onyala okhurunga omukoye mumoolu kawo? Noho okhufutula oluseya lwakwo neingaka?

³Kunyala okhukhusaaya mbu okuleshe noho? Noho okhukhureeba mbu okubeele tsimbabasi?

⁴Kunyala okhukaasia ninawe indakano, mana kukhusuubisie mbu kulakhukhalabanila inziayo noho?

⁵Onyala okhubaya ninakwo shinga linyonyi liarukwa noho? Noho okhukukhola eshindu shiokhuyanzisia abakholibo beshikhaana?

⁶Abobukhala banyala okhuyinganila khukwo noho? Noho okhukutonyamwo ebitonye khulwa okhukukusia?

⁷Onyala okhwitsusia eshikhoba shiakwo namafumo kokhuloba noho? Noho okhufumira omurwe kwakwo namafumo?

⁸Kutiilekhwo butswa lulala, ne shioliteemakhwo khandi tawe, shioliibilila obulwani bwakwo khandi tawe.

⁹Omundu yesi oulola okukwena okwo, atilungwa noburi mana akwa hasi.

¹⁰Olwa kuyakulwa oburuma bwakwo, abulaho outsaalikha okhusinjila imbeli wakwo.

¹¹Ounyala okhukuseera mana abeho omulamu niwiina? Abulaho omundu mushialo shiosi ounyala okhukuseera.

¹²Lekha ekhuboolelekhwo akokhubilenje biokusolo kuno, mana ekhwinoosiekhwo shinga olwa kuli okukhongo khandi okwa amaani amanji.

¹³Abulaho ounyala okhukurusiakhwo eshikhoba shiakwo eshieikulu, noho okhufutula ebitsengwa bia kuchinganga khumubili kwakwo.

¹⁴Ounyala okhukukhola kwasamie omunwa kwakwo, okwabotokhanwa nameeno akokhurisia niwiina?

¹⁵Omukongo kwakwo nokwetsinyali tsiebikhumba ebialimasibwa halala shinga lichina.

¹⁶Buli shilala shialimasibwa khushindi obutinyu, kho mbu kata omuya shikunyala okhubirira hakari wabio tawe.

¹⁷Biosi bialimasibwa halala obutinyu, shibulaho eshinyala okhubiahukhasia tawe.

¹⁸Nikwasamula, ne obulafu bulolekha, natsio tsimoni tsiakwo tsiakhanga shinga eliuba nilirulanga.

¹⁹Omulilo kwakhanga okhurula mumunwa kwakwo, natsio tsinzese tsiomulilo tsiruma okhurula mumunwa kwakwo.

²⁰Omwosi kurulanga mumoolu kakwo shinga okurulanga munyungu eyipapachila niyili khumulilo.

²¹Omuuya kwakwo kuhafia amanda, natsio tsimemu tsiomulilo tsirula mumunwa kwakwo.

²²Likosi liakwo lili namaani amanji, abaakaana ninakwo boosi batiilwa noburi.

²³Habulaho habundu hatorotoro khumubili kwakwo, likhoba liakwo liomilana ka shinga eshibia.

²⁴Omwoyo kwakwo nomutinyu shinga lichina lioburale, nomutinyu muno shinga oluchina.

²⁵Olwa kubuukha abamaani batechela, bafwa omwoyo nibahwa amaani.

²⁶Olukanga lubulaho olunyala okhukusalisia; Kata lifumo noho eshisele noho indobo shibinyala okhukusalisia tawe.

²⁷Khuyo eshibia shili butswa shinga likata, ne omukasa kuli butswa shinga olubao olwabuyukha.

²⁸Shibulaho eshisele eshinyala okhuchila kwilushe. Amachina keimburusi kali shinga amakokha khukwo.

²⁹Khukwo indabushi yili shinga likata, ne kutsekhanga olwa abandu bakulasa namafumo.

³⁰Amakhambaya akali khunda khwakwo kali shinga ebikonjio ebimemu, kakhurulanga liloba shinga eshiyini mumatoyi.

³¹Kutuubuulanga inyaanza shinga amaatsi akapapachilanga. Mana kuchila inyaanza yipapachila shinga inyungu eyilimwo amafura.

³²Kulekhanga injila eying'inang'ina munyuma mwakwo, mana kukalukhasia inyanza okhuba lifilo lilafu.

³³Shibulaho eshindu shiosi khushialo eshiakhachelasibwa ninakwo ta, khandi neshilonje eshilaritsanga tawe.

³⁴Kuchayanga tsisolo tsieinjinia, nikwo omuruchi wetsisolo nabulimo tsiosi.”