Read wanga AYUBU 42 Bible Online

AYUBU 42 - wanga bible

AYUBU 42

¹Mana Ayubu nakalusia OMWAMI Nyasaye, naboola ari,

²“Emanyile mbu iwe oli nobunyali bwokhukhola buli shia shindu, khandi onyala okhukhola liosi elia wenya.

³Ureebanga mbu eshichilanga isie nereebelesia akobuchesibwo nishiina? Nasi shiemanyile eshindu shiosi ta. Isie emboolilenje khu ka ndalamanyile ta. Emboolile amakhuwa amakhongo kandalanyala okhumanyilisia tawe.

⁴Umbooleele mbu ekhurecheresie lwoboola, mana endeeme okhukhukalusia amareeboko.

⁵Khale ndahulilangakhwo butswa kabandu baboolanga khwiwe, nebutswa bulano emalile okhukhulola netsimoni tsianje omwene.

⁶Khulweshio ndileka omwene khu akandaboolile koosi, ne ndipuuka olufu nende likoshe khulwa okhumanyia okhwikalukhasia khwanje.”

⁷Olwa OMWAMI Nyasaye yali namalile okhuboolela Ayubu amakhuwa ako koosi, yaboolela Elifasi owokhurula Temani ari, “Emalile okhusinyishila iwe halala nende abetsabo babili bano, shichila shimuboolile khwisie amakhuwa akatoto shinga lwomukhalabani wanje Ayubu aboolile tawe.

⁸Kho bulano bukule tsisurusi musafu, namamiiku musafu mutsie khumukhalabani wanje Ayubu, mana mubihaane shinga omusango khulwa obwonooni bwenywe. Ayubu alamusaayila nasi ndafuchiilila amasaayoke mana endeshe okhumufimbia omurwe shinga olwa mukhoyile, shichila shimwaboola amakhuwa katoto khwisie shinga lwomukhalabani wanje Ayubu yaboola tawe”.

⁹Kho Elifasi owokhurula Temani, Bilidadi owokhurula Shuhi nende Zofari owokhurula Naamatsi, nibakhola koosi aka OMWAMI Nyasaye yali nabalachilisiye okhukhola, mana Nyasaye nafuchilila amasaayo ka Ayubu.

¹⁰Ne olwa Ayubu yali namalile okhusaayila abetsabe bataru abo, OMWAMI Nyasaye yamukalusilia tsikhabitsie, namuhelesia emiandu echihela nemianduchie echia yali ninachio olwambeli eshikhabili.

¹¹Mana abaana babwe abasiani, abakhaana babwe nende boosi abali nibamumanya khale nibetsa okhumucheniha, nibalia lisabo ninaye munzuye. Nibamubeelelela khandi nibamulemia omwoyo khulwa amanyakhano koosi aka OMWAMI Nyasaye yamukholela, buli mundu yamuhelesia amapesa nende ingaka yeitsahabu.

¹²Kho OMWAMI Nyasaye nahelesia Ayubu tsikhabi mumiyika chiokhumalilikha chiomubulamubwe okhushila kata etsia yali niyamuhelesia olwambeli. Mana Ayubu naba namakondi ebikhumila ekhumi nabine (14,000), tsingamia ebikhumila bisasaba (6,000), tsing'ombe ebikhumila bibili (2,000) nende tsisishili eshikhumila shilala (1,000).

¹³Khandi naba nabaana abasiani musafu, nende abakhaana bataru.

¹⁴Omukhaana wambeli namukulikha Yemima, owakhabili namukulikha Kezia, ne owakhataru Kereni Hapuki.

¹⁵Ne mushialo shiosi shibanyoolekhakhwomwo abakhaana abelikondo lilayi shinga abakhaana aba Ayubu tawe. Samwana yabakabila obulaame halala nabasiani babwe.

¹⁶Olunyuma lwako Ayubu yamenya emiyika chindi eshikhumi namakhumi kane (140) nalola abaanabe, abetsukhulube, okhuula khubolwibulo olwakhane.

¹⁷Mana Ayubu nafwa nakofuule muno.