Read wanga AYUBU 5 Bible Online

AYUBU 5 - wanga bible

AYUBU 5

¹“Bulano Ayubu lanjilisia olole omundu yesi yesi naba nakhurechereia. Alikhwoho omumalaika owa onyala okhwilushilakhwo?

²Liruma liiraanga omuyingwa, nayo imbalikha yiiranga omusilu.

³Isie ndalola omuyingwa naralilanga, nebutswa bwangu ndalaama abeinzuye eshilaamo shiobubi.

⁴Abaanabe shibalikhwo nomulembe ta, bashilungwa mushina, ne abulaho ousinjilanga okhubaterera.

⁵Abali neinzala balitsanga ebichesebie, ne babibukulanga ebili kata mumahwa, nabo abalang'u bekombanga obuyindabwe.

⁶Amatinyu shikarulanga khwiloba ta, kata amasila shikasebukhanga khwiloba tawe.

⁷Nebutswa omundu yebulungwa khulwa okhunyoola amatinyu, shinga olwa tsinzese tsikulukhanga ikulu okhurula mumulilo.”

⁸“Nindakhabele iwe ndakhamuhabile Nyasaye, mana ehane amakhuwa kanje khuye.

⁹Ye akholanga amakhuwa amakhongo aka ifwe khulanyala okhumanyilisia ta, khandi akamakana akalanyala okhubalwa ta.

¹⁰Ye akwisinjia ifula khushialo khandi arumanga amaatsi mumikunda.

¹¹Achinguulanga abo abetutuyinjia ne nasangasia abo abali mushibeela.

¹²Akoyasinjia kababatsa balosia, kho mbu koosi aka bakasinjia kalekholekha ta.

¹³Atiilanga ababatsa mububatsa bwabwe, ne akabakasinjia akarusinjiaho bwangu kho mbu kaleshe okhwikholekha.

¹⁴Balola eshiilima mushiteere hakari, ne mushiteere hakari bahabasia shinga mushilo.

¹⁵Nebutswa ahoninjia ababisandu okhurula mukhufwa, khandi ahoninjia abatakha okhurula mukhusandibwa.

¹⁶Ahaananga obunaayi khubatakha, naholelesia abamayamu.”

¹⁷“Noweikhabi owa Nyasaye akololosia, kho olalechelesia olwa Owobunyali Bwosi akhukololosia tawe.

¹⁸Nyasaye abohanga amakonzo kasalisinjia, khandi amakhonoke kahonianjia amafumire.

¹⁹Alakhuhonia iwe okhurula mumasila kasasaba, ne mumasila musafu libi liosi liosi shililakhukwila tawe.

²⁰Mutsinyanga tsieinzala alakhuhonia okhurula mukhufwa, ne mutsinyanga tsia lihe alakhuhonia okhurula khulukanga.

²¹Nyasaye alakhulinda okhurula mukhuchikhwa khwolulimi, khandi alakhuhonia okhurula mubusasishi.

²²Olatsekha olwa abusasishi nende inzala biitsa, khandi shiolaria tsisolo nabulimo tawe.

²³Emikunda chiolima shichilabamwo amachina tawe. Khandi tsisolo nabulimo shitsilakhuseera tawe.

²⁴Mana olamenya munzumwo mumulembe, ne olwa okoonya ebiayobio, shiolanyoolakhwo kata shilala nishikorire tawe.

²⁵Olebula abaana abanji, khandi abolwibulolwo balaba abanji shinga obunyasi bwokhushialo.

²⁶Olifwa noyindiile mumiyika muno; shinga olwa imele yifunungwa niyilabile.

²⁷Ako niko akakhwarunilisiye, ne nakatoto, kho okahulile nokamanyilisia mana kabe akobukhoonyi khwiwe.”