Read wanga AYUBU 6 Bible Online

AYUBU 6 - wanga bible

AYUBU 6

¹Mana Ayubu nakalusia naboola ari,

²“Amatinyu kanje nikakhachelilwe obusiro bwako, nako amanyakhano kanje nikakhareerwe khushichelo shiako,

³obusiro bwako bwakhashilile obusiro bwomuyeshe kwomunyanza kwosi; niko akachila nindirobootsa butswa amakhuwa.

⁴OMWAMI Nyasaye yafumiire nebiselebie, nabwo obufwisi bwabio busalaanile mumubili kwanje kwosi. Nyasaye yarechekha amarisiake khwisie.

⁵Isishili yomubulimo yakhaana niyili nobunyasi? Kata ing'ombe yakhaanakhwo niyili mwiswa?

⁶Ne eshiokhulia eshibula eshinosi shinyala okhulibwa nishilarelwemwo omunyu? Ne eshinosi shilikhwo mwibuyu lilafu?

⁷Omwoyo kwanje shikwikomba ebiokhulia birio ta, khandi ebiokhulia shinga ebio bindwasinjia.”

⁸“Sichila shiina Nyasaye alambelesinjia aka emusabanga? Ne mbushiina alambelesinjia aka ndikombanga?

⁹Bwakhabele obulayi Nyasaye niyakhandubuule, khandi bwakhabele obulayi niyakhanzirire.

¹⁰Kano kanyala okhusangasia muno, kata olwa emba nenzunungwa muno. Emanyile mbu Nyasaye nomutakatifu, nasi eshili okhulobakhwo okhulonda amalakoke.

¹¹Ne endi namaani shiina akachila enziliile okhumenya? Mbushiina enzililile okhumenya nimbula obunaayi?

¹²Ekhali lichina noho? Omubili kwanje kwakhalongwa khumukasa noho?

¹³Embula amaani kokhwikhoonya omwene, khandi embulakhwo aha enyala okhunyoola obukhoonyi.

¹⁴Oyo oulobanga okhulolela omwitsawe tsimbabasi, kho alobanga okhuhelesia OMWAMI Nyasaye oluyali.

¹⁵Nebutswa inywe abetsa banje mungatinjia shinga olwa emichela chiokhumwalo chikhaminjia amaatsi ifula niyilakwa ta.

¹⁶Ibarafu nende itsaluchi bikholanga emichela echio okwitsula.

¹⁷Nebutswa mutsinyanga tsiomubasu biosi bikhamuukha, ne emichela echio chiuma kara.

¹⁸Abachendi bokhumakari bakora nibakhaaba amaatsi, bachenda chenda nibafwila mushitsiimi.

¹⁹Abachendi abokhumakaari okhurula Tema bakhabilisinjia, abakholi bobukhala okhurula Sheba banaaya,

²⁰nebutswa bafwa emioyo olwa boolaho, nibanyoola emichela echio nichilali namaatsi ta.

²¹Nenyu muli shinga emichela echio khwisie, mulolanga anatinyu akangwilile ne mukalukha inyuma muburi.

²²Nasi ndamusabilekhwo inywe eshihaanwa? Kata ndabooleelekhwo omundu yesi yahaanile eshiomufusi?

²³Noho kata mbu muhonokosie okhurula khumusuku wanje, noho okhurula khu oyo ousandinjia?

²⁴Kho munzechesie nimunzibaalila amabi kanje, nasi ndalaholeela tsi nimurechelesia.

²⁵Amakhuwa kobwatieli kali nobunyali muno, nebutswa inywe muboolanga kobusilu.

²⁶Inywe muparanga mbu akemboolanga namakhaya butswa shinga omuyeka. Kho eshichilanga nimungalusia khumakhuwa kanje kokhufwa omwoyo nishiina?

²⁷Mufwananga abanyala okhukhupila abaana ababisandu ikha, ne nimwinyoolela inganga okhurula khubetsa benywe.

²⁸Nebutswa, bulano chame muurangaale mumoni, isie shindalaboolakhwo obubeeyi imbeli wenywe tawe.

²⁹Emusaya nimuchama muleshe, shimulafuchilila amabi okhwikholekha tawe, shimulakhalachila eshiina ta, okhuba isie endi omulunjishi.

³⁰Mupaaranga mbu isie emboolanga obubeeyi? Mupaaranga mbu shienyala okhwahukhasia hakari wa aka habwene nende akalali ka habwene ta?”