Read wanga AYUBU 7 Bible Online

AYUBU 7 - wanga bible

AYUBU 7

¹“Obulamu bwomundu mushialo nobutinyu shinga obwomundu oulunyibungwa okhukhola emilimo. Khandi buli shinga obwomukholi wemilimo emisiro.

²Buli shinga omuhambe owikombanga eshiinikha, khandi shinga omukholi wemilimo oulindililanga omurungokwe.

³Buli khumwesi obulamu bwanje bubula obukhala, khandi ebilo bianje biosi bindereranga eshibeela.

⁴Olwa ndiyalisinjia okhukona, ndireebanga endi, ‘Nabushie liina ndabuukha?’ Nebutwa eshilo neshirambi muno. Ndikhupatsakania eshilo shiosi okhuula okhushia.

⁵Omubili kwanje kwitsulekhwo tsinyende nende amakakha. Amafila karaatsanga okhurula mumabure kanje.

⁶Tsinyanga tsiobulamu bwanje tsibiranga bwangu. Tsibiranga bwangu shinga eshiinikha.

⁷Iwe Nyasaye witsulile mbu, obulamu bwanje buli butswa shinga emiuya; Shindilibakhwo khandi nobulamu obulayi tawe.

⁸Oyo oundolanga bulano, shialandola khandi ta, olwa urangaalakhwo tsimoni shiolandola tawe.

⁹Shinga lileesi lihwetseshelelanga nilikhamulukha, nolwa omundu afwitsanga natsia emakombe, shiakalukhanga khandi tawe.

¹⁰Shiakalukhanga munzuye khandi tawe, kata abandu aba hangowe shibalamumanya khandi tawe.

¹¹Kho shinyala okhuholeela tawe, ndalaboola omwoyo kwanje nikusinyishe, khandi ndaleyiniakana omwoyo kwanje nikuli noburuma.

¹²Eshichilanga noraho abalindi okhuninda nishiina? Opaara mbu isie endi inyanza noho okusolo kwomunyanza?

¹³Ndiyalisinjia hasi mbu embuluushe, ekhabanga eshinyala okhuhonia obutsuni bwanje.

¹⁴Nebutswa iwe uriisiinjia namalooroko, undereranga amalolelo okokhurisia.

¹⁵Kho bwakhaba obulayi okhumikwa nende okhwirwa, okhushila okhutsiililila okhumenya nomubili kuno.

¹⁶Obulamu bwanje businyile, khandi shinzenya okhutsiililila okhumenya inziayo tawe. Mundeshe butswa, obulamu bwanje nobwimbichiti shinga omuya.

¹⁷Mbushiina ohendelanga muno omundu? Mbushiina oretsanga amapaaroko koosi khumundu?

¹⁸Omuhenjelesinjia buli mumabwibwi, nomuteema buli shise.

¹⁹Shionyala okhuhengakhwo elubeka oluhoono ta? Kata okhundekhakhwo mbu emile amare kanje ta?

²⁰Kata nimba nindonoona, kakhuhendia karie, iwe ouhenjelesinzia abandu? Mbushiina niukhola isie owokhupimilakhwo isheba? Kho isie endi omusiko khwiwe noho?

²¹Mbushiina olandeshelanga obwonooni bwanje? Mbushiina olambeelanga tsimbabasi khulwa amabi kanje? Okhuba mubwangu buno nembe mushilindwa shianje, naukhaabe, ne shinaunyoole tawe.”