Read wanga AYUBU 8 Bible Online

AYUBU 8 - wanga bible

AYUBU 8

¹Mana Bilidadi owokhurula Shuhu namukalusia naboola ari;

²“Olatsiililila okhuboola amakhuwa kano okhuula liina? Amakhuwako nakabutswa shinga omuyeka omukhongo.

³Nyasaye shiashiaminjia obuyaasi bwahabwene ta, khandi OMWAMI Nyasaye shiachweyanga okhukhola akahabwene tawe.

⁴Abaanabo nibaba nibamwonoonela Nyasaye, kho Nyasaye abahelesiye eshinyasio shia bakwanile okhunyoola.

⁵Nebutswa bulano noba nomuhaabila Nyasaye, mana omusaaye oyo Owobunyali Bwosi,

⁶noba noli omweleleshe khandi omulunjishi, omunyasaye aletsa khwiwe okhukhuhabina, khandi alakhukalusilia emianduchio chiosi okhuba omurungokwo.

⁷Kata niwachaka obulamu noli nebindu bitiiti, mubumalilishi wakhabe nemiandu eminji.

⁸Oreebelesiekhwo khuketsinyanga tsiakhale, orunilisie kabakuuka befwe barunilisia ne nibanyoola.

⁹Ifwe khwibulwe butswa mungolobe, ne shikhumanyile eshindu shiosi tawe.

¹⁰Lekha abachesi bakhale bakhwechesie, rechelesia aka bakhuboolela kano mbu:

¹¹Mana amatundu kakhakhula ahamaatsi kalali? Ne kakhanyolekha aha olutende lwamaatsi lulali?

¹²Amaatsi nikaba nikakhama, niko akaranjilila okhuniala, kaniala nikashili amatoro akalanyala okhuremwa nikeshonyelwa tawe.

¹³Nolwa tsinjila etsia abo abebililanga Nyasaye tsili, nolwa obunaayi bwabalaritsanga Nyasaye ta busasikha.

¹⁴Besikanga eshikhalikha butswa, khandi beleetanga khuluusi lwolububi.

¹⁵Besetemia khuluusi nalwo shilubakhoonya eshindu ta, baluhandakhwo nalwo nilukhalikha butswa.

¹⁶Abamayanu abo baneranga shinga omuboka mumubasu, shinga olwa kulaanda mumukunda kwosi.

¹⁷Emisi chiakwo chifumbila khumachina, nichikhaba aha chiakhatinya mutsiyanda.

¹⁸Nebutswa olwa chisiulwa nichirusibwaho, abulaho ounyala okhumanya mbu chialinjiho tawe.

¹⁹Obwo nibwo obusaangaafu bwabamayanu bali ninabwo, abandu bandi betsanga ne, babukula obukono bwabwe.

²⁰“Nebutswa Nyasaye shialalekha omundu oubula eshikha tawe, kata shialakhoonya omumayanu tawe.

²¹Nyasaye alakhukhola otseshe notsaatsahala, khandi alakhukhola osangaale.

²²Nebutswa alafimbia omurwe abo abakhusila, nako amataala kabamayanu kalasikha.”