Read wanga AYUBU 9 Bible Online

AYUBU 9 - wanga bible

AYUBU 9

¹Mana Ayubu nakalusia naboola ari,

²“Toto emanyile nolwa kali kario, nebutswa omundu namundu yakhanyala arie okhuba omulunjishi imbeli wa Nyasaye?

³Kata omundu yakhayingana arie ninaye? Nyasaye anyala khureeba amareebo eshikhumila shilala, komundu yesi alanyala okhukalusiakhwo kata elala khuko tawe.

⁴Nyasaye nomuchesi muno khandi owamaani muno, niwiina owakhamuyingasia mana ayindile?

⁵Arusinjia ebikulu mubukono bwabio nibilamanyilekhwo ta, ne mwirumalie abikwisinjia hasi.

⁶Nyasaye atechesinjia eshialo, khandi arenjinjia tsisiilo tsiashio okhurula mubukono bwatsio.

⁷Khandi yekalilanga eliuba okhwakha, khandi yekalilanga tsing'ining'ini okhulolekha mushiilima.

⁸Abulaho owamukhonya okhubambula likulu, kata okhusenachila hasi amarunda komunyanza.

⁹Nyasaye niye owalonga tsing'ining'ini tsiomwikulu mubukono bwatsio, nitsio Eyasulwe, Amayika, Inimilo[2] nende tsing'ining'ini tsiemulambo.

¹⁰Niye oukholanga amakhuwa amakhongo aka khulanyala okhumanyilisia ta, khandi akamakana akalanyala okhubalikha tawe.

¹¹Lola, Nyasaye yambirakhwo nasi shimulola ta, atsiililila imbeli nasi shimumanyilisia tawe.

¹²Abukulanga shiosi eshia yenya, ne niwiina ounyala okhumwikalila? Kata abulaho owakhetika okhumureeba mbu, ‘Okholanga shiina?’ Tawe.

¹³Nyasaye shiyekalilanga lirumalie ta. Yamulula abasukube abakhoonya Rahabu[3] okusolo okukhongo okwomunyanza okhumuyinga.

¹⁴Kho nasi ndakhamukalusia endie? Ndakhanyoola heena amakhuwa kokhumuboolela?

¹⁵Kata nembula eshikha, shienyala okhumukalusia likhuwa tawe, eshienyala butswa okhukhola nokhumureeba ye omukhalachi wa habwene yambeele tsimbabasi.

¹⁶Ne kata niyafuchilila okhuboola, shiesuubila anyala okhuhulila akemuboolela tawe.

¹⁷Anyala okhundubula neimbumbuyeka, nende okhwinjiyia amabure kanje halali eshifune shiosi ta.

¹⁸Shiyakhafuchilila ndaheela omuya tawe, habula yakhetsusia butswa obutsunwi mubulamu bwanje.

¹⁹Nikaba nikali amaani, ye nowamaani muno, ne kata nemuyila mushina, owakhamulanga mushiina tsana niwiina?

²⁰Kata nembula eshikha, amakhuwa kanje kene kakhalachila eshiina, kata nemba nendi omwisiikwa, ye alandolesia okhuba oweshikha.

²¹Isie embula eshikha, nebutswa shindilolanga omwene okhuba eshindu ta. Ndasinyishila obulamu bwanje.

²²Koosi nimalala butswa, niko akachila nimboola mbu, ‘Nyasaye amululanga bosi, oweshikha nende oubula eshikha.’

²³Olwa amatinyu karera lifwa matetekhana, Nyasaye atsekhanga amatinyu aka ababula eshikha.

²⁴Nyasaye yahaana eshialo khubamayamu, khandi yabofusia tsimoni tsiabakhalachi beshiina tsana. Ne naba nalali Nyasaye oukholanga ario ta, kho niwiina owakhakhola ario?

²⁵Tsinyanga tsianje tsibiranga bwangu okhushila omwilushi wetsimbilo, tsilukhanga bwangu, ne yibulaho kata ndala indayi tawe.

²⁶Tsinyanga tsianje tsibiranga bwangu shinga amaaro akelukha bwangu, tsibiranga bwangu shinga olwa indutsu yikwitsanga khubiminywi.

²⁷Nimba nimboola mbu, ‘Ndalebilila akhwiyiniakana khwanje, mana eyinie eshibeela mumakani kanje, kho embe nobutsaatsahafu.’

²⁸Nebutswa eritsanga okhusalila khwanje, shichila emanyile mbu, iwe Nyasaye shiolandola okhuba oubula eshikha tawe.

²⁹Kho olwa emalile okhuba oweshikha, eshichila enyakhane butswa eshikhaya nishiina?

³⁰Kata nemba nindakhesiinga namaatsi amalafu tswe, kata okhusaaba amakhono kanje neisabuni,

³¹iwe OMWAMI Nyasaye olaafuuba mubwina bweshisinyo, kho mbu kata ebifwalo bianje bilandola okhuba oweshisinyo.

³²Nyasaye naba mbu nomundu namundu shinga isie, ndakhamukalusiye amareeboke, khwakhatsile ninaye mushiina okhuyaalana ninaye obusoolo bwefwe.

³³Abulaho owokhukayila hakari wefwe, abulaho ounyala okhuyasia isie nende Nyasaye.

³⁴Niyakharusiyekhwo eshinyasioshie, mana amarisiake kaleshe okhurisia,

³⁵kho ndakhaboolile nindalamuria ta, okhuba omwene emanyile akali mumwoyo kwanje.”