Read wanga TSITSABULI 10 Bible Online

TSITSABULI 10 - wanga bible

TSITSABULI 10

¹OMWAMI Nyasaye, mbushiina nosinjiile ehale? Mbushiina niwibisa ebise bia khuli mumatinyu?

²Mukhwikhulumamia, abeinjinia basandia abamanani, lekha abeene batiilishe mumireko chia barechile.

³Abamayanu beyitsialanga khulwa obwikombi bwabwe obumayanu, nabo abalang'u banyekanga OMWAMI Nyasaye nibamuloba.

⁴Abamayanu baboola mukhwikhulumamia khwabwe bari, “Nyasaye shialamanya ta,” mumapaaroke baboola bari, “Nyasaye shialiho tawe.”

⁵Buli lwosi abamayanu banyalilungwa mu buli elia bakhola. OMWAMI Nyasaye, shibanyala okhumanyilisia eshisina shiobukhalachibwo ta, khandi balechelesinjia butswa abasuku babwe boosi.

⁶Baboolanga mumioyo chiabwe bari, “Shibulaho eshikhuhendia ifwe ta, shikhulinyoolakhwo amatinyu tawe.”

⁷Eminwa chiabwe chietsulamwo ebilakamunwa, obubeeyi, nende amariisia, tsinimi tsiabwe ni tsinyangu okhubeeya nende okhunyekana.

⁸Bebisanga mutsingongo, nibakoneshela okhwira ababula eshikha mabiswi. Bahonganga meeso nibakonesheele abatofu,

⁹bakoneshelanga nibebisile shinga italanyi, bebisanga okhutiila abamanani, babatiilanga nibabakhwesesa mumireko chiabwe.

¹⁰Abateshele baseerwa nibatubulwa, bakwisibwa hasi namaani kabamayanu.

¹¹Abamayanu bapaara mumioyo chiabwe bari, “Nyasaye yebilila, mbu yatimba tsimonitsie shialolanga tawe!”

¹²Bukha, OMWAMI Nyasaye, chinguula omukhonokwo, yitsulila abasandibungwa!

¹³Mbushiina abamayanu nibalechelesinjia Nyasaye, nibaboola mumioyo bari, “Shialakhuhelesia eshinyasio tawe”?

¹⁴Nebutswa iwe ololanga, toto ololanga abali mumatinyu nende mushibeela, buli lwosi werechekha okhukhoonya. Abateshele beleetanga khwiwe, buli lwosi ohabinanga ababisandu.

¹⁵Funaka obunyali bwabamayanu, bahelesie eshinyasio okhuula olwa balekha okhukhola obumayanu.

¹⁶OMWAMI Nyasaye nomuruchi inziayo. Amahanga akalamumanyile ta kalamululwa okhurula mushialoshie.

¹⁷Iwe OMWAMI Nyasaye, ohulile okhuhaba khwabateshele, obarecheresie, nobatinyisia emioyo.

¹⁸Okhalachile ababisandu nende abasandibwa eshiina habwene, kho mbu, abandu baleshe okhubasandiakhwo khandi tawe.