Read wanga TSITSABULI 101 Bible Online

TSITSABULI 101 - wanga bible

TSITSABULI 101

¹Ndalemba khukobuholobwo nende obukhalachibwo bwahabwene; Iwe OMWAMI Nyasaye ndalemba nekhwitsoomia.

²Injenda yanje shiyilabakhwo eyobushiamu bwosi bwosi tawe. Olinzitsila liina? Ndalamenya obulamu obweleleshe munzu mwanje.

³Shindilifuchililakhwo obwonooni tawe. Ndasila ebikhole biabandu bashiukhananga nibarula khu Nyasaye. Ebikhole ebio shibilanondakhwo ta.

⁴Shindalabakhwo omubatsa ta, khandi shindalakholakhwo obwonooni bwosi bwosi tawe.

⁵Ndaleera omundu yesi yesi ouboola amakhuwa amabi khuwashie masilisi, shindalesimilisiliakhwo omundu yesi oweisunga tawe.

⁶Ndalalolesia obuheeli khu abesiikwa ba Nyasaye mushialo, kho mbu bamenye ninasi, omundu yesi ouchenda munjila ya habweene alakhalabanila isie.

⁷Abulaho omwikaati yesi yesi, oulamenya munzu yanje tawe. Abulaho omubeeyi yesi yesi, oulatsiililila okhuba imbeli wanje tawe.

⁸Buli nyanga ndalamulula abamayanu abali mushialo shiefwe; Ndalalonda abamayanu boosi okhurula mwitookho elia OMWAMI Nyasaye.