Read wanga TSITSABULI 102 Bible Online

TSITSABULI 102 - wanga bible

TSITSABULI 102

¹Iwe OMWAMI Nyasaye, hulila amasaayo kanje, chama ohulile okhuhaaba khwanje!

²Khunyanga yamatinyu kanje shiolebisa okhurula khwisie tawe! Urecheresie olwa ekhuhabila, wanguyilisie okhumbabina.

³Tsinyanga tsiobulamu bwanje tsikhamuukha shinga omwosi. Nakwo omubili kwanje kuusambanga shinga omulilo.

⁴Esenachililwe hasi shinga obunyasi bunialile, omwoyo kwanje shikwikoombakhwo eshiokhulia tawe.

⁵Okhushenya khwanje, khukholile okhuba omung'au.

⁶Efwana shinga linyonyi mushitsiimi, shinga lihichichi mumakunda.

⁷Engonanga meeso, endi shinga linyonyi lili lionyene khushisuli shieinzu

⁸Abasuku banje banyekanga buli lwosi, boosi abanzeshelelanga bekhoonyelanga eliira lianje khukhutsuba.

⁹Likoshe nishio eshiokhulia shianje, enzokaasinjia amasika mushiokhunywa shianje,

¹⁰khulwa okhusinyikhakhwo nende lirumalio khwisie, okhuba umbukuule, ne niufuuba.

¹¹Obulamu bwanje buli shinga eshiinikha shiokhubwiile, endi shinga obunyasi obuniala.

¹²Nebutswa iwe OMWAMI Nyasaye, niwe omuruchi inziayo; Eliralio liletsulilwa mutsinzibulo tsiosi.

¹³Olabuukha nololosia tsimbabasi khu Zayuni, nibio ebise ebiokhukhola eshisa; ebise tsana bimalile okhuula.

¹⁴Kata Zayuni niliba nilisasibwe, abakhalabanibo baliheela, Kata niliba nilikwiile likunda, baliloleele tsimbabasi.

¹⁵Amahanga kalaria OMWAMI Nyasaye, ne abaruchi bokhushialo boosi balamuhelesia oluyali.

¹⁶OMWAMI Nyasaye alombakha litookho lia Zayuni obuyia, olwa alolekha muluyalilwe.

¹⁷OMWAMI Nyasaye alahulila ababisandu, nende okhurechelesia okhuhaba khwabwe.

¹⁸Ohandichile tsinzibulo tsiolunyuma aka OMWAMI Nyasaye akholile, kho mbu abandu bashili okhwibulwa balimwitsoomia.

¹⁹OMWAMI Nyasaye yahenga hasi nali habunduwe hatakatifu hekulu, yahenga khushialo nali mwikulu.

²⁰Yahulila okhuhaba khwababohe, ne nalekhuula abali nibakhalachilwa okhwiirwa.

²¹Khulweshio, eliiralie lilarumbulwa mu Zayuni, khandi aletsoomibwa mu Yerusalemu,

²²olwa abandu bakhung'ana halala, nibamwinamila OMWAMI Nyasaye.

²³OMWAMI Nyasaye yandofusiye, nasi eshili omuraaka. Yembichitiye obulamu bwanje.

²⁴Iwe Nyasaye, olabukula obulamu bwanje bulano ta, olwa emba neshili okhukofula. Iwe OMWAMI Nyasaye omenyangaho inziayo.

²⁵Iwe walonga eshialo khale, khandi namakhonoko omwene walonga likulu.

²⁶Biosi biakhahweho, nebutswa iwe olibaho inziayo, bilikofula shinga tsingubo, olibikalukhasia shinga ebifwalo nabio nibihwaho.

²⁷Nebutswa iwe shiokalukhananga tawe, nabwo obulamubwo nobweinziayo

²⁸Abaana befwe balamenya mumulembe, ne hasi wobulindibwo, abetsinzibulo tsiabwe balamenya nomulembe.