Read wanga TSITSABULI 103 Bible Online

TSITSABULI 103 - wanga bible

TSITSABULI 103

¹Witsoomie OMWAMI Nyasaye iwe omwoyo kwanje! Ebiungo bianje biosi mwitsoomie eliiralie litakatifu!

²Witsoomie OMWAMI Nyasaye iwe omwoyo kwanje, ne shiolebililakhwo obulayibwe tawe.

³OMWAMI Nyasaye yambeelanga obwonooni bwanje bwosi, nahonia obulwale bwanje bwosi.

⁴Yahoninjia mukhufwa niyambelesia tsikhabi, obuheeli nende tsimbabasi.

⁵Yetsusinjia obulamu bwanje nebindu ebilayi, kho mbu embetsenje omuraaka khandi owamaani shinga indutsu.

⁶OMWAMI Nyasaye akhalachilanga abasandibungwa eshiina nabaterera nende okhubahelesia akabakhoyele.

⁷OMWAMI Nyasaye yamanyisia tsinjilatsie khu Musa, nibio ebikholebie khubandu ba Isiraeli.

⁸OMWAMI Nyasaye noweshisa khandi nowobukoosia, oulasinyikhanga bwangu ta, khandi owobuheeli oburalilu.

⁹Shiakhuhalabilanga buli lwosi ta, khandi shiabetsanga neliruma inziayo tawe.

¹⁰Shiakhuhelesinjia eshinyasio okhulondana nende obwonooni bwefwe, noho okhukhurunga okhulondana nende obubi bwefwe tawe.

¹¹Shinga likulu lili mwikulu hekulu weshialo, nolwa obuheelibwe buli obukhongo burio khubandu abamuhelesinjia oluyali.

¹²Shinga ebukwe yili ehali muno okhurula mumbo, nolwa OMWAMI Nyasaye asitiiye ehale ario obwonooni bwefwe okhurula khwifwe.

¹³Shinga samwana abaana alolelanga abaanabe eshisa, nolwa OMWAMI Nyasaye alolelanga abandu boosi abamuhelesinjia oluyali eshisa.

¹⁴Shichila OMWAMI Nyasaye amanyile shinga olwa khwalongwa, yetsulilanga mbu, khuli butswa olufu.

¹⁵Ne omundu, obulamubwe buli shinga obunyasi, amulikha shinga eshimuli shiomwiswa,

¹⁶olwa omuyeka khuhutsa khushio, ne shibungulukha, ne abulaho oushilolakhwo khandi.

¹⁷Nebutswa obuheeli oburalilu obwa OMWAMI Nyasaye, nobweinziayo khwabo abamuhelesinjia oluyali, khandi obukoosiabwe bubetsangaho khubetsinzibulo tsiosi,

¹⁸nende khwabo abatiilanga indakanoye mubwatoto nende okhulonda amalakoke koosi.

¹⁹OMWAMI Nyasaye yasimikha eshifumbishie eshioburuchi mwikulu, ne oburuchibwe buli khushialo shiosi.

²⁰Mwitsoomie OMWAMI Nyasaye, inywe abamalaikabe abamaani, abahulilanga nende okhukhola akaaboola koosi. Recheresie likhuwa elia OMWAMI Nyasaye aboola!

²¹Mwitsoomie OMWAMI Nyasaye, inywe mwesi abamaheke komwikulu, inywe abakhalabanibe, abakholanga akayenya.

²²Mwitsoomie OMWAMI Nyasaye, inywe ebilonjebie biosi, ebili habundu hosi aharukanga. Witsoomie OMWAMI Nyasaye, iwe omwoyo kwanje!