Read wanga TSITSABULI 104 Bible Online

TSITSABULI 104 - wanga bible

TSITSABULI 104

¹Witsoomie OMWAMI Nyasaye iwe omwoyo kwanje! Iwe OMWAMI Nyasaye wanje, oli omukhongo muno! Niwe Nyasaye owefwala oluyali nende obukhongo,

²wefunikha obulafu shinga eshifwalo, wabambula likulu shinga liheema.

³Wombakha inzuyo ikulu khumaatsi. Wikhoonyelanga amaleesi shinga likaarilio, nochendela khutsimbaha tsiomuyeka.

⁴Okholanga emiyeka okhuba abarumwabo, nabwo obulafu bwetsimbenu okhuba abakhalabanibo.

⁵Waralisia eshialo khumise chiashio, kho mbu shileshe okhuresibwa.

⁶Washifunikhakhwo nolusiba shinga eshifwalo, nako amaatsi nikayemba khubikulu.

⁷Olwa wahalabila amaatsi, kakhamuulukha. Kakhamuulukha lwangu olwa kahulila okhwatulukhakhwo.

⁸Kayemba khubikulu nende mumabanda, nikatsia habundu ahawakakasilia.

⁹Waraho olukuku lwa kalanyala okhubirakhwo ta, kho mbu kaleshe okhufuunikha eshialo.

¹⁰Wakhola tsisebele okhufutuukha mumabanda, nende emichela okhubira hakari webikulu,

¹¹Tsisolo nabulimo tsinywetsanga amaatsi kemichela echio, khandi amaatsi katsio kamalanga obuloho bwetsisishili nabulimo.

¹²Ahambi netsisebele etsio, amanyonyi kombakhangaho ebitsu biako nikembelaho.

¹³Noli mwikulu orumanga ifula okhukwa khubikulu, nashio eshialo shitsulamwo tsikhabitsio.

¹⁴Okholanga obunyasi okhumela khulwa tsing'ombe okhwaya, nacho emimela khulwa abandu okhwikhoonyela, kho mbu banyoole ebiokhulia biabwe okhurula khwiloba.

¹⁵Mana chireera idivai eyokhutsatsahasia ifwe, nokhukhusaangaasia, nende khukhuhelesia omukaate okwokhukhumeeta ifwe amaani.

¹⁶Emisaala echia OMWAMI Nyasaye chinyoolanga ifula inyinji, emisiita chia Lebanoni echia OMWAMI Nyasaye omwene yaraka.

¹⁷Amanyonyi, kombakhanga ebinzu biako muchio, liwang'i nalio liumbakhanga mumisaala chiemitarakwe.

¹⁸Tsimbusi nabulimo tsimenyanga khubikulu ebirambi, nabio ebitelele bibisanga mumbangatsi tsietsinyanda.

¹⁹OMWAMI Nyasaye walonga omwesi okhumanyisia tsindukho, nalio eliuba limanya ebise bialio ebiokhuyeela.

²⁰Waraho eshialo, ne mushiilima shiashio tsisolo nabulimo tsiosi tsirula nitsichenda.

²¹Tsitalanyi tsimbuukha tsiholanga olwa tsiba nitsiyiima, nitsikhaba eshiokhulia, eshia Nyasaye ahaana.

²²Olwa eliuba lifinda, tsikalukha nitsikona mubwikhalo bwatsio.

²³Abandu barula nibatsia elwanyi okhukhola emilimo chiabwe, ne batsililila okhukhola okhuula ngoloobe.

²⁴OMWAMI Nyasaye walonga ebindu ebinji muno! Wabilonga biosi mubuchesibwo! Eshialo shiosi shietsulamwo ebilonjebio.

²⁵Inyanza yilimwo, ikhongo khandi imbambalifu, ebilonje bilimwo ebilanyala okhubaalwa ta, biosi ebitiiti nende ebikhongo.

²⁶Tsimeli tsielemanga khuyo, ne okunyeni okukhongo kwa walonga kubayilanga khunyanza eya walonga.

²⁷Ebilonje ebio biosi biileetanga khwiwe, khulwa okhunyoola ebiokhulia.

²⁸Obihelesinjia ebiokhulia, nabio nibilia, ohananga ebiokhulia, nabio nibilia nibiikura.

²⁹Olwa obilekha, bihenda omwoyo; olwa obirusiamwo emiuya, bifwa, nibikalushila olufu lwa bialongwakhwo.

³⁰Nebutswa olwa obifuuramwo emiuyachio, ne bibaho mwoyo, okholanga eshialo okhuba eshilamu khandi.

³¹Oluyali olwa OMWAMI Nyasaye lukhoya lwatsililila okhubaho inziayo! OMWAMI Nyasaye akhoya yasangasibwa nende ebia yalonga.

³²OMWAMI Nyasaye ahenganga khushialo, nashio shirenga; atiilanga khubikulu, nabio bituuma omwosi.

³³Ndaleembela OMWAMI Nyasaye olwa eshiliho mwoyo. Ndalemba ninditsoomia Nyasaye wanje olwa eshiliho mwoyo.

³⁴OMWAMI Nyasaye akhoya yasangasibwa nolwimbo lwanje, shichila obusangaafu bwanje burulanga khuye.

³⁵Abamayanu bakhoya beerwa okhurula mushialo. Abonooni bakhoya balekha okhunyoolekhakhwo khushialo. Witsoomie OMWAMI Nyasaye iwe omwoyo kwanje! Witsoomie OMWAMI Nyasaye!