Read wanga TSITSABULI 105 Bible Online

TSITSABULI 105 - wanga bible

TSITSABULI 105

¹Khupile OMWAMI Nyasaye orio, murumbule obukhongobwe. Muboolele amahanga ebia yakholile.

²Yimbeli OMWAMI Nyasaye, imbe nimumwitsoomia, nimurumbula akebikholebie biamakana biosi.

³Sangaale shichila khuli abebe, leshe boosi abenamilanga OMWAMI Nyasaye bekhoye.

⁴Habile OMWAMI Nyasaye khulwa obukhonyi, nimumwinamila buli lwosi.

⁵Yitsulile ebikhole biokhuchenya ebia yakholile, nende ebiamakanabie nende obukhalachibwe bwakholanga.

⁶Inywe abolwibulo lwa Aburahamu, omukhalabaniwe, inywe abasiani ba Yakobo, owa yaahula!

⁷Niye OMWAMI Nyasaye wefwe; obukhalachibwe buli khubandu bosi mushialo.

⁸OMWAMI Nyasaye alalinda indakanoye buli lwosi; nende obusuubisiebwe khutsinzibulo ebikhumila.

⁹OMWAMI Nyasaye alalinda indakano ya yakaasia nende Aburahamu nende obusuubisiebwe khu Isaka.

¹⁰OMWAMI Nyasaye yakaasia indakano nende Yakobo, nayo yilabaho inziayo.

¹¹OMWAMI Nyasaye yaboolela Yakobo ari, “Ndalakhuhelesia eshialo, nashio shilaba eshishio.”

¹²Abandu bali nibashili batiiti, khandi abacheni mushialo eshio.

¹³Bachendachenda okhurula khwihanga okhutsia khulindi, okhurula khuburuchi okhutsia khubundi.

¹⁴OMWAMI Nyasaye shiyafuchililakhwo abandu okhubamina tawe; OMWAMI Nyasaye yabalinda, nasiomela abaruchi ari:

¹⁵“Mulasalisiekhwo abakhalabani banje abahule ta; mulatilekhwo khubalakusi banje tawe.”

¹⁶OMWAMI Nyasaye naruma inzala mushialo shiabwe shia Kanani, mana niyimalamwo ebiokhulia biosi.

¹⁷Nebutswa OMWAMI Nyasaye yaranjilila okhuruma omundu imbeli wabwe. Owali Yosefu. Owali yakusibwa okhuba omusumba.

¹⁸Ebilenjebie nibibohwa nebitiili, khandi nibamuboha mwikosi nebitiili bieshibia.

¹⁹Okhuula olwa aka Yosefu yali niyalakula kekholekha. Likhuwa elia OMWAMI Nyasaye nilimulolosia okhuba owatoto.

²⁰Mana omuruchi wa Misiri naleekhuula Yosefu, omuruchi wamahanga namuleekhuula.

²¹Omuruchi nakhola Yosefu okhuba omusinjilili weinzuye, nende khumiandu chiomuruchi chiosi.

²²Yosefu nahebwa obunyali khubemilisi bomuruchi, nende obunyali bwokhwechesia abachetsiyibe.

²³Mana Yakobo natsia Misiri namenya mushialo shia Hamu.

²⁴Naye OMWAMI Nyasaye nakhola abandube okhwibulana muno, khandi nahelesia abandu abo amaani amanji okhushila akabasuku babwe.

²⁵Yakalukhasia emioyo chiabasuku babwe, ne nibasila abandube, nende okhubakholela akobukaati.

²⁶OMWAMI Nyasaye yaruma omukhalabaniwe Musa nende Haroni, aba yali niyaahule.

²⁷Bakhola ebilolelo mubasuku abo, nende akamakana mushialo shia Misiri.

²⁸OMWAMI Nyasaye yaruma eshilima mana nishikhola eshialo okhwilima; shichila bakhaya okhuhulila likhuwa elia OMWAMI Nyasaye.

²⁹Yakalukhasia amaatsi kabwe okhwikhola amalasile, mana amatsi ako nikeera tsinyeni tsiabwe.

³⁰Eshialo shiabwe nishitsulwamwo amashele, kata nende mushikoro shiomuruchi.

³¹OMWAMI Nyasaye yalaka mana tsisi nende amabuko nibitsula mushialo shiabwe shiosi.

³²Yabakwisilia amachina keifula okhuba ifula, nende oluhenu olwamwesukha mushialo shiosi.

³³Yasasia emitsabibu nende emikhuyu chiabwe, nakwisia hasi emisaala chiosi.

³⁴OMWAMI Nyasaye yalaka mbu tsisiche tsitse mana nitsitsa ebikhumila biebikhumila, etsilanyala okhubalwa ta;

³⁵Tsisiche etsio tsialia amasafu kemimela chiosi mushialo shiabwe shiosi. Tsialia ebiamo biabwe biosi.

³⁶Khandi yeera abasiani abekulanda abomutsinzu tsiosi tsia Abamisiri.

³⁷Mana narusia Abaisiraeli mushialo shia Misiri nibachinjile ifetsa nende itsahabu, boosi barulayo nibali abalamu khandi abamaani.

³⁸Abamisiri bali noburi khubo, kho basangaala olwa Abaisiraeli barula nibatsia.

³⁹Nyasaye nara lileesi ikulu wabandube, khandi nareera omulilo mushilo okhubahelesia obulafu.

⁴⁰Bamusaba naye OMWAMI Nyasaye nabareerera tsisindu, yabahelesia ebiokhulia okhurula mwikulu ebiabekusia.

⁴¹OMWAMI Nyasaye yaraka olwanda mana amaatsi nikafuutuukha okhurulamwo, nikafuutuukha okhuula nikabira shinga omwalo mushitsiimi.

⁴²Okhuba OMWAMI Nyasaye yetsulila obusuubisiebwe obutakatifu khu Aburahamu omukhalabaniwe.

⁴³Kho yarusia abandube Misiri abali abaahulebe nibembanga.

⁴⁴Mana OMWAMI Nyasaye nahelesia Abaisiraeli emikunda chiabamahanga; nibabukula ebiamo biabamahanga barulila oluya okhuraaka.

⁴⁵Kho mbu abandube bahulile nende okhukhola, amalakoke nende amalachilisio koosi. OMWAMI Nyasaye yetsoomibwe!