Read wanga TSITSABULI 106 Bible Online

TSITSABULI 106 - wanga bible

TSITSABULI 106

¹OMWAMI Nyasaye yetsoomibwe. Khupile OMWAMI Nyasaye orio shichila nomulayi, obuheelibwe oburalilu nobweinziayo!

²Niwiina ounyala okhuboola amakhuwa amakhongo koosi kakholile? Niwiina ounyala okhumwitsoomia shinga olwa akhoyile?

³Nabeikhabi abalondanga amalakoke, abakholanga buli lwosi obulunjishi.

⁴Unzitsulile, OMWAMI Nyasaye, olwa ohabina abandubo; umbonie olwa obahonia.

⁵Chama endole obuyinda bwabandubo, khandi esanje mubusangali bwamahangako, muluyali lwobusangaali bwabandubo.

⁶Ifwe nende abakuuka befwe khwonoonile; khukholile obwonooni, khandi amabi.

⁷Abakuuka befwe nibali Misiri shibamanyilisia ebikholebio ebiamakana tawe; Bebilila obuheelibwo bwa wabamanyinjia akhandi akhanji, Ne nibakhaya okhuhulila ouli Omukhongo Muno olwa bali nibali hanyanza Inzakhanyu.

⁸Nebutswa yabahonokosia, shinga olwa yali niyabasuubisia, kho mbu alolosie obunyalibwe obukhongo.

⁹Yahalabila Inyanza Inzakhanyu, nayo niyisangalala, yemilila abandube okhukhalasia khwiloba eliumu shinga abakhalasia mushitsiimi.

¹⁰Kho yabahonia okhurula mumakhono aka ababasila, khandi nabahonokosia okhurula khubasuku.

¹¹Nako amaatsi nikafunikha abasuku babwe; abulaho kata mulala khubo owatong'a tawe.

¹²Mana abandube nibasuubila obusuubisiebwe, khandi nibemba nibamwitsoomia.

¹³Nebutswa bebilila bwangu aka OMWAMI Nyasaye yali nakholile, ne nibalalindilila obuchetsiyebwe tawe.

¹⁴Bekomba nibali mushitsiimi, mana nibamuteema Nyasaye;

¹⁵Kho nabahelesia eshia basaba, nebutswa yabarumila obulwale obwokhubamulula.

¹⁶Nibali ebweneyo mushitsiimi, batilila Musa nende Haroni imbalikha, omukhalabani owa OMWAMI Nyasaye Omutakatifu.

¹⁷Mana liloba nilikukha nilimumila Datsani, khandi nilimuyabila Abiramu nende abeinzuye boosi.

¹⁸Omulilo nikurubukha nikwakha mukambi yabwe; nikusamba abonooni.

¹⁹Bakaasia eshimoosi khushikulu shia Sinai, mana nibenamila eshifwanani eshisalule eshio.

²⁰Nibakulaasia oluyali lwa Nyasaye khulwa eshifwanani shieisolo eyayanga obunyasi.

²¹Bebilila Nyasaye, Omuhonia wabwe, owali nakholile amakhuwa amakhongo Misiri.

²²Akokhuhuchisia aka yakhola mushialo shia Hamu, nende akamarisia akayakhola khunyanza inzakhanyu.

²³Olwa Nyasaye yaboola mbu alamulula abandube, Musa omukhalabaniwe omwahule, yasinjila nakania Nyasaye, nende okhwikalila lirumalie okhubamulula.

²⁴Mana nibaloba eshialo eshinulu, shichila shibasuubila obusuubisie bwa Nyasaye tawe.

²⁵Bamenya mumaheema kabwe nibabuulula, ne nibalarecheresia aka OMWAMI Nyasaye tawe. Yaruma omukhalabaniwe Musa nende Haroni owa yali niyahule.

²⁶Khulweshio yachinguula omukhonokwe ikulu, nabetsubila mbu alabeera boosi mushitsiimi,

²⁷khandi mbu alasalaasia abolwibulo lwabwe mumahanga, nabasalaasia mubialo ebicheni.

²⁸Mana abandu ba Nyasaye nibenamila omunyasaye Baali owa Peori, khandi nibalia emisango echiakholelwa abanyasaye abafwa.

²⁹Babuusia liruma elia OMWAMI Nyasaye khulwa ebikhole biabwe, mana obulwale bwamakana nibubukha mubo.

³⁰Nebutswa Fineha yasinjila ne nahelesia abali neshikha eshinyasio, mana obulwale obwo nibuhwa.

³¹Amakhuwa ako ketsulilungwa khulwa oluyalilwe okhurula ebise ebio okhuula olwa leelo.

³²Abandu basinyisia OMWAMI Nyasaye hasebele tsia Meriba, mana Musa naba mumatinyu khulwa amakhuwa kabwe.

³³Bakhola Musa okhuba omululu muno, naboola amakhuwa obulapaara ta.

³⁴Shibayeera abandu abonooni, shinga OMWAMI Nyasaye yali nalachilisiye tawe,

³⁵nebutswa batsokana nende abamahanga mana nibeeka emilukha chia abamahanga kandi bakholanga.

³⁶Abandu ba Nyasaye benamila ebifwanani, ne nikachila nibamululwa.

³⁷Bahana abaana babwe abasiani nende abakhaana khubifwanani bieshialo shia Kanani okhuba emisango.

³⁸Bataasia amatsayi akabaana ababula eshikha, nibakhola eshialo okhuba eshiomusilo khulwa obwiiri bwabwe obwo.

³⁹Abeene beyonoonia khulwa ebikhole biabwe, balekha Nyasaye wabwe nibenamila abanyasaye bandi.

⁴⁰Kho OMWAMI Nyasaye yasinyishila abandube, natiilwa neliruma khubo.

⁴¹Ne nabahana mumakhono kabamahanga, kho mbu abandu abali nibabasila nibabaruka.

⁴²Abasuku babwe nibabasandia, khandi nibabakhola abasumba babwe.

⁴³OMWAMI Nyasaye yahonokosia abandube akhandi akhanji, nebutswa baahula okhumukhaya nibatsiililila okhwonoona.

⁴⁴Kata kario OMWAMI Nyasaye yabahulila olwa bamuhabila, mana namanyilisia obuhendi bwabwe, olwa bamuhabila.

⁴⁵Yetsulila indakanoye, ne khulwa obuheelibwe obukhongo yababeela tsimbabasi.

⁴⁶OMWAMI Nyasaye yakhola ababasandinjia okhuba netsimbabasi khubo.

⁴⁷Iwe OMWAMI Nyasaye wefwe, okhuhonie, okhukhung'asie okhurula mumahanga, mbu khupile eliralio litakatifu orio, nende okhuliitsoomia.

⁴⁸Mwitsoomie OMWAMI Nyasaye wa Isiraeli, mumwitsoomie bulano okhuula inziayo! Abandu boosi barumbule nibaboola bari, “Amina.” OMWAMI Nyasaye yetsoomibwe!