Read wanga TSITSABULI 107 Bible Online

TSITSABULI 107 - wanga bible

TSITSABULI 107

¹“Mwitsoomie OMWAMI Nyasaye, shichila nomulayi, okhuba obuheelibwe oburalilu nobweinziayo!”

²Inywe aba OMWAMI Nyasaye yanunula mumwitsoomie, inywe aba yahonia okhurula mumatinyu,

³nabakhung'asia okhurula mubialo biahale, okhurula ebukwe nende mumbo, okhurula emasaba nende emulambo.

⁴Abandi batimatima mushitsiimi eshibulamwo injila, nibalanyalilwa okhunyoola injila eyokhutsia mwitookho liokhumenyamwo ta.

⁵Inzala yabaluma, nibalibwa nobuloho, ne nibalabakhwo nobunaayi bwokhubaho abalamu ta.

⁶Mana nibahabila OMWAMI Nyasaye, naye nabahonokosia okhurula mukhuhenda khwabwe.

⁷OMWAMI Nyasaye nabemilila khunjila inunji okhuula olwa boola mwitookho liokhumenyamwo.

⁸Leshe betsoomie OMWAMI Nyasaye khulwa obuheelibwe oburalilu, khulwa ebikholebie biamakana ebia yabakholela!

⁹OMWAMI Nyasaye ahananga amaatsi khubobuloho bulia, khandi yekusinjia abeinzala yiluma nebiokhulia ebilayi.

¹⁰Abandi bamenya mushiyingo nende mushiilima, nibasandibwa nibali muminyololo.

¹¹Shichila bali nibafukula amalako aka Nyasaye Owobunyali bwosi, khandi bali nibakhayile amebaaloke.

¹²Bachoonya khulwa emilimo emisiro; bakwa hasi, ne shibali nende owokhubabusiaho ta.

¹³Mana nibahabila OMWAMI Nyasaye nibali mumanyakhano kabwe, naye nabahonokosia okhurula mumatinyu kabwe ako.

¹⁴Yabarusia mushiyingo nende mushiilima shiabwe, khandi nafunaka eminyololo chiabwe.

¹⁵Leshe betsoomie OMWAMI Nyasaye khulwa obuheelibwe oburalilu, khulwa ebikhole ebiamakana ebia yabakholela.

¹⁶Ye afunakanga emiliango chiakasibwa khumikasa, khandi akwisinjia hasi emiliango chiakasibwa khushibia.

¹⁷Abandi bali abayingwa, banyakhananga khulwa obwonooni bwabwe, khandi khulwa obumayanu bwabwe;

¹⁸Shibayekombakhwo eshiokhulia ta, ne bali ahambi okhufwa.

¹⁹Mana nibahabila OMWAMI Nyasaye nibali mumanyakhano kabwe, naye nabahonokosia okhurula mumatinyu kabwe ako.

²⁰Yabarumila obunyali bwelikhuwalie, mana nibubahonia, khandi nilibahonokosia okhurula mukhufwa.

²¹Leshe betsoomie OMWAMI Nyasaye khulwa obuheelibwe oburalilu, nende khulwa ebikholebie ebiamakana ebia yabakholela.

²²Leshe bamukhupile orio khulwa okhumukholela emisango, nende khulwa okhumwimbila tsinyimbo tsiokhwikhoya.

²³Abandi bambukha inyanza mutsimeli, nibakhola obukhala khulwa okhwinyoolela ebibakhoyile mubulamu bwabwe.

²⁴Balola ebikhole ebiamakana ebia OMWAMI Nyasaye yakhola munyanza.

²⁵Yalaka, ne imbumbuyeka niyibaho, eyabuusia amarunda akomunyanza.

²⁶Tsimeli tsiabwe tsierunda ikulu mwikulu, khandi nitsiyinikha hasi mulusiba. Nibali mumatinyu ako, bakosia obunayi bwabwe,

²⁷bachenda nibesichirala nende okhutandamila shinga abamelile amalwa. Obusitsa bwabwe bwosi nibuula khushiakamo.

²⁸Mana nibahabila OMWAMI Nyasaye nibali mumanyakhano kabwe, naye nabahonokosia okhurula mumatinyu kabwe ako.

²⁹Yahonjeesia imbumbuyeka, khandi nahonjeesia amarunda akomunyanza.

³⁰Basaangaala khulwa okhuhonjeela khweinyanza, khandi yabarera obulayi okhuula khundulo khwa bali nibatsitsanga.

³¹Leshe betsoomie OMWAMI Nyasaye khulwa obuheelibwe oburalilu, khandi khulwa ebikholebie ebiamakana bia yabakholela.

³²Leshe barumbule obukhongobwe mumukhung'ano kwabandu, nende okhumwitsoomia imbeli wabakofu bomuse.

³³OMWAMI Nyasaye yakhola emichela okhuuma, khandi nakhola tsisebele okhulekha okhufuutuukha amaatsi.

³⁴Yakalukhasia liloba linulu okhwikhola eliomunyu, khulwa obumayanu bwabandu bamenyangaho.

³⁵Yakalukhasia eshialo eshiangalafu okhukwa amayabo kamaatsi, khandi yakhola eshialo eshiumu okhwikhola tsisebele tsiamaatsi.

³⁶Yakhola abali neinzala okhumenyaho, nibombakhaho litookho eliokhumenyamwo.

³⁷Balima emikunda nibaraaka emitsabibu, mana nibachesa ebinji muno.

³⁸Yabahelesia ikhabi nibebulana muno; ne shiyalekhakhwo emiruko chiabwe okhutitiya tawe.

³⁹Olwa bali nibahwele amaani khandi nibashililwe khulwa okhuminwa, okhunyasibwa nende eshibeela,

⁴⁰yafwola abali nibabasandinjia, nabakhola okhutimatima aha injila yibula.

⁴¹Nebutswa yahonokosia abatakha okhurula mushibeela shiabwe, khandi yenjiyia abomutsinzu tsiabwe nibaba abanji shinga amakondi.

⁴²Abalunjishi boosi balolakhwo mana nibasaangaala, nebutswa abamayanu baholelesibwa tsi.

⁴³Abali nobuchesi bayililisiekhwo khumakhuwa kano; bamanyilisie khu obuheeli oburalilu obwa OMWAMI Nyasaye.