Read wanga TSITSABULI 109 Bible Online

TSITSABULI 109 - wanga bible

TSITSABULI 109

¹Ekhwitsoomia iwe Nyasaye, shiolaholela tsi ta!

²Abamayanu nende abekaati baaseera, bamboolangakhwo akobubeeyi,

³baboolanga amakhuwa amabi khwisie, baseera halali eshifune shiosi shiosi ta.

⁴Bafukula kata olwa ndabaheela, kata kario isie ebasayila ikhabi.

⁵Baarunganga amabi khulwa amalayi, obufukuli khulwa obuheeli.

⁶Mwahule omukhalachi weshiina omushiamu khulwa okhuyasia omusuku wanje.

⁷Olwa ayasibwa mushiina, anyooleshe nali oweshikha, kata okhusayakhwe khuloleshe okhuba okhubi!

⁸Tsinyanga tsiobulamubwe tsimbichitibwe, oundi abukule ebia yabiikha!

⁹Abaanabe babe ababisandu naye omukhasiwe omulekhwa!

¹⁰Abaanabe babe abasabisabi khandi abachendachendi, belusibwa okhurula mumalikulukho ketsinzu tsiabwe.

¹¹Abahosibe babukule emiandu echia ali ninachio chiosi, nabo abarende babukule buli shindu shia yenyoolela khulwa amaanike.

¹²Alabakhwoho omundu oulolosia tsimbabasi khuye, kata oulolela abaanabe abatong'a eshisa tawe!

¹³Abolwibulolwe bafwe, ne eliiralie libililwe mubolwibulo lulondakhwo.

¹⁴OMWAMI Nyasaye yetsulile obwonooni bwabakuukanyene, khandi alabeela obwonooni obwa nyina yakhola tawe.

¹⁵OMWAMI Nyasaye yetsulile buli lwosi obwonooni bwabwe, nebutswa abeene bebililwe boosi pe!

¹⁶Omundu oyo shiyalolesiakhwo tsimbabasi ta, yasandinjia nende okhwiira abamanani, abatakha nende ababula owokhubakhoonya.

¹⁷Yali niyachama okhulaama eshilaamo shiobubi, yali niyasila okhuhaana tsikhabi, kho naye alalamilwakhwo tsikhabi tawe!

¹⁸Yarumbulanga ebilaka munwa buli lwosi, nabio bikhoya bienjila mumubilikwe mukari shinga amaatsi, khandi bilaandaale mumakumbake shinga amafura.

¹⁹Bikhoya biamufimba shinga tsingubo, khandi buli lwosi biamwikanyilakhwo shinga omushipi.

²⁰OMWAMI Nyasaye obahelesie orio eshinyasio abasuku banje; abo ababoolanga amakhuwa amabi khwisie!

²¹Nebutswa OMWAMI Nyasaye mwene obunyali, umbabine shinga olwa waasuubisia, mana umbonokosie khulwa obulayi bwobuheelibwo.

²²Endi omumanani khandi omutakha; embulila obutsuunwi okhuula mukari womumwoyo kwanje.

²³Endi ahambi okhukhamuukha shinga eshiinikha shieingoloobe, embulusibwe neyilwa ehale shinga eshikukule.

²⁴Amasikamo kanje kachonyile khulwa okhubula eshiokhulia shindikhwo eshindu ta, habula eshikhoba nende amakumba.

²⁵Abandu banzekhanga, olwa bandolakhwo, bareesia emirwe chiabwe nibanzeshelela.

²⁶Iwe OMWAMI Nyasaye wanje, umbabine, umbabine khulwa obuheelibwo oburalilu.

²⁷Khola abasuku banje bamanye mbu, niwe oumbabinanga.

²⁸Banyala okhurumbula khwisie ebilaka munwa, nebutswa iwe olaamila isie ikhabi, abasandinjia bakhoya bashilwa, nasi isie omukhalabaniwo ndikhoye.

²⁹Abasuku banje bafimbwe omurwe khandi batiilwe netsisoni, befwale tsisoni shinga ingubo ifubila.

³⁰Ndalakhupila OMWAMI Nyasaye orio nomwoyo kwanje kwosi, ndalamwitsoomia mumikhung'ano chiabandu.

³¹Shichila atereranga abamanani khandi abahonokosinjia okhurula khwabo ababakhalachilanga okhufwa.