Read wanga TSITSABULI 116 Bible Online

TSITSABULI 116 - wanga bible

TSITSABULI 116

¹Isie ndaheela OMWAMI Nyasaye shichila ahulilanga okhuhaba khwanje, arecheresinjia amasaayo kanje.

²Okhuba arecheresinjia okhuhaba khwanje, ndalamuhabila olwa eshiliho mwoyo.

³Amatinyu akokhufwa kali nikanziikanyilakhwo, amariisia keying'ani kali nikandiilile, ndali mumatinyu nende mushibeela.

⁴Mana nehabila eliira elia OMWAMI Nyasaye, nesaaya endi, “Ee OMWAMI Nyasaye, ekhusaaya, umbonie!”

⁵OMWAMI Nyasaye wefwe nowobukoosia khandi omulunjishi, khandi nowetsimbabasi.

⁶OMWAMI Nyasaye alindanga abalenyalilwa ta; yambonia olwa ndali mumatinyu.

⁷Iwe omwoyo kwanje ume ikholo, shichila OMWAMI Nyasaye nomulayi khwisie

⁸OMWAMI Nyasaye yambonia okhurula mulufu, niyeeya amasika okhurula mumoni tsianje, nende okhuninda endeshe okhuhulwa.

⁹Kho enjendanga imbeli ewa OMWAMI Nyasaye, mushialo eshiabali mwoyo.

¹⁰Ndatsiililila okhusuubila, kata olwa ndaboola endi, “Emalile okhusasilibwa elala pe.”

¹¹Kata olwa ndali noburi nemboola endi, “Abulaho owokhusuubililamwo.”

¹²Kho nishiina eshia enyala okhuhelesia OMWAMI Nyasaye khulwa obulayibwe khwisie?

¹³Ndalareerera OMWAMI Nyasaye eshihaanwa shieidivai, khulwa okhumukhupila orio, khulwa okhumbonia.

¹⁴Nendi mumukhung'ano kwabandube, ndaloosia ebitsubo bianje biosi ebiandamwitsubila.

¹⁵Nilikhuwa liolukoosi imbeli ewa OMWAMI Nyasaye, mulala khubalunjishibe nafwa.

¹⁶OMWAMI Nyasaye, isie endi omukhalabaniwo, ekhukhalabanilanga butswa shinga mama wanje yakhukhalabanila. Umboniye okhurula mulufuu.

¹⁷Ndalakhumalila omusango okwokhukhupa orio, nekhuhabila.

¹⁸Ndalahana nende okhuusia ebitsubo bianje, ebia ndetsubila OMWAMI Nyasaye imbeli wabandu boosi.

¹⁹Mwitsoomie OMWAMI Nyasaye mulwanyi lweinzuye, hakariwo iwe Yerusalemu, mwitsoomie OMWAMI Nyasaye.