Read wanga TSITSABULI 118 Bible Online

TSITSABULI 118 - wanga bible

TSITSABULI 118

¹Khupile OMWAMI Nyasaye orio, okhuba nomulayi, obuheelibwe oburalilu nobweinziayo!

²Leshe abandu ba Isiraeli baboole bari, “Obuheelibwe oburalilu nobweinziayo.”

³Leshe abesaaliisi aba OMWAMI Nyasaye baboole bari, “Obuheelibwe oburalilu nobweinziayo.”

⁴Leshe boosi abenamilanga Nyasaye baboole bari, “Obuheelibwe oburalilu nobweinziayo.”

⁵Olwa ndali mumatinyu, ndahabila OMWAMI Nyasaye; naye narecheresia mana niyakhola okhuba omulekhuule.

⁶OMWAMI Nyasaye nali elubeka lwanje, shindalaria eshindu shiosi ta, nishiina eshia omundu namundu yakhakholela?

⁷OMWAMI Nyasaye ali elubeka lwanje, khulweshio alahabina, nasi ndalalola abasuku banje nibahulilwe.

⁸Nobulayi okhwisika OMWAMI Nyasaye, okhushila okhwisika omundu namundu.

⁹Nobulayi okhwisika OMWAMI Nyasaye, okhushila okhwisika abaruchi.

¹⁰Abasuku abanji bambotokhana nebutswa ndabahula boosi okhubirila mubunyali obwa OMWAMI Nyasaye!

¹¹Bambotokhana tsimbeka tsiosi, nebutswa ndabasasia boosi okhubirila mubunyali obwa OMWAMI Nyasaye!

¹²Bambotokhana shinga tsinzushi, nebutswa baatulukha shinga omulilo mumarakalu. Khulwa obunyali obwa OMWAMI Nyasaye ndabasasia boosi.

¹³Ndaserwa obutinyu nemba ahambi okhuhulwa, nebutswa OMWAMI Nyasaye yambabina.

¹⁴OMWAMI Nyasaye niye amaani kanje khandi obunyali bwanje; yayamboniye.

¹⁵Recheresia tsinyimbo tsiokhwikhoya, khulwa obuhuli, mumaheema kabandu ba Nyasaye bemba nibaboola bari; “Obunyali obukhongo obwa OMWAMI Nyasaye nibwo obukholile kano.

¹⁶Obunyalibwe bukhureereele obuhuli, obunyalibwe obukhongo bukhunyalile okhuhula mwihe.”

¹⁷Shindalafwa ta, habula ndalabaho omulamu nerumbula aka OMWAMI Nyasaye yakhola.

¹⁸OMWAMI Nyasaye yambelesia eshinyasio eshilulu, nebutswa shiyayandekha mbu efwe tawe.

¹⁹Munzikulile ebilibwa bia Ihekalu, ndinjile ekhupile OMWAMI Nyasaye orio!

²⁰Shino neshilibwa eshia OMWAMI Nyasaye, abalunjishi bonyene nibo abanyala okhwinjilamwo.

²¹Nditsoomia OMWAMI Nyasaye shichila yarecheresia, khandi niyambelesia obuhuli.

²² Lichina tsana liabombashi baloba mbu libula inganga, bulano liikholile olwanzilo lwomukoona.

²³OMWAMI Nyasaye niye owakhola ako, nako nakokhuhuchisia muno khwifwe!

²⁴Yino neinyanga eya OMWAMI Nyasaye akaasiiye, chende khwikhoye nikhusaangaala!

²⁵OMWAMI Nyasaye, okhuhonie. Khukhusaaya okhunyalile okhuhula.

²⁶Noweikhabi oyo owinjila muliira elia OMWAMI Nyasaye, khukhusabila ikhabi ewa khuli muhekalu eya OMWAMI Nyasaye.

²⁷OMWAMI Nyasaye niye Nyasaye, ne yakhwashiliye obulafu. Namasaka mumakhono kenywe chaache okhwikhoya nimubotokhana eshimalilo shiemisango.

²⁸Niwe Nyasaye wanje, nasi ndalakhupila orio, ndalarumbula obukhongobwo.

²⁹Mukhupile OMWAMI Nyasaye orio, shichila nomulayi, okhuba obuheelibwe oburalilu nobweinziayo!