Read wanga TSITSABULI 119 Bible Online

TSITSABULI 119 - wanga bible

TSITSABULI 119

¹Nabeikhabi abeinjenda yabwe yilali eyieshikha ta, abamenyanga nibemililwa namalako aka OMWAMI Nyasaye.

²Nabeikhabi abalondanga amalakoke, abamuritsanga nomwoyo kwosi.

³Kata shibakholangakhwo libi liosi ta, habula bachendanga munjilatsie!

⁴Iwe OMWAMI Nyasaye, wakhuhelesiye amalakoko, ne nokhuboolela okhukalonda mubwisikwa.

⁵Ndikomba okhuba omwisiikwa khulwa okhulinda amebaaloko!

⁶Nimba nirecheresia amalakoko koosi, shindalafimbwa omurwe tawe.

⁷Ndalakhwitsoomia nomwoyo omukololofu, olwa emanyilisia obukhalachibwo bwobulunjishi.

⁸Ndalahulila amalakoko koosi, shiolandekha tawe!

⁹Omuraaka yakhamenya arie obulamu obweleleshe? Naba nalonda amalakoko.

¹⁰Endeemanga okhukhukhalabanila nomwoyo kwanje kwosi, uninde endeshe okhulekha amalakoko.

¹¹Obiishe lilakolio mumwoyo kwanje, kho mbu endeshe okhukhwonoonela.

¹²Iwe OMWAMI Nyasaye ekhwitsoomia, unzechesie tsinjilatsio.

¹³Erumbula nomwoyo omukhongo, amalako koosi aka umbelesiye.

¹⁴Ndikhoya muno okhulonda amalakoko, okhushila okhuba nobuyinda obunji.

¹⁵Ndalayililisia khukamebaaloko, nerecheresia amechesioko.

¹⁶Esaangaalila amalakoko, shindalebililakhwo amalakoko tawe.

¹⁷Ekhusaaya obe omulayi khwisie, isie omukhalabaniwo, nasi ndalabaho mwoyo khandi ndalalonda ameechesioko.

¹⁸Wikule amarwi kanje, kho nasi emanyilisie obwatoto bwamalakoko,

¹⁹Endi butswa khushialo khuno khulweshise shitiiti butswa, shiolafisa amalakoko okhurula khwisie tawe.

²⁰Omwoyo kwanje kulibungwa namahoofu, ndikomba okhumanyilisia obukhalachibwo eshilo neshiteere.

²¹Iwe ohalabilanga abechinjimisi, nora eshilaamo shiobubi khubakhayi bamalako.

²²Ukhole isie okhurula mumanyeko kabwe, nende mukhufwolwa khwabwe, shichila enindanga amalakoko

²³Abaruchi basanjilananga nibaafukula isie, nebutswa isie ndalayililisia amechesioko.

²⁴Amachesioko kaasangasinjia isie, khandi niko obwibaali bwanje.

²⁵Isie endi ahambi okhufwa, ungalusiemwo obulamu shinga olwa wasuubisia.

²⁶Emalile okhwiyama koosi aka ndakhola, nawe omalile okhurecheresia, unzechesie tsinjilatsio.

²⁷Unyalile okhumanyilisia amalakoko, nasi ndalayililisia khumechesioko kamakana.

²⁸Eshibeela shinjoonyiye, kho umeete amaani shinga olwa waasuubisia.

²⁹Uninde endeshe okhulonda mutsinjila tsiobubeeyi, ne mubukoosiabwo unzechesie amalakoko.

³⁰Isie emalile okhwahula okhuba omwisiikwa, ndalalonda obukhalachibwo

³¹Isie enoondanga amebaaloko; shiolaakhola okhufwimbwa omurwe tawe.

³²Ndalalonda amalakoko nomwoyo kwosi, okhuba wayakholile isie okhuba nobumanyilisi.

³³OMWAMI Nyasaye, unzechesie eshisina shiamalakoko, nasi ndalakakhola buli lwosi.

³⁴Unzinoosie amalakoko, nasi ndalakalonda nomwoyo kwanje kwosi.

³⁵Unzimilile okhulonda amalakoko, okhuba esaangaalanga muno muko.

³⁶Nobulayi umbelesie obuloho bwokhulonda amalakoko, okhushila okhuba omuyinda

³⁷Ukhole endeshe okhulonda khukabutswa, habula uninde shinga olwa wasuubisia.

³⁸Oralisie akawaasuubisia, isie omukhalabaniwo, obusuubisie obwokholelanga abakhuhulilanga iwe.

³⁹Umbonie okhurula khumanyeko akokhuriisia, okhuba obukhalachibwo nobwahabwene.

⁴⁰Ndenya okhulonda amalakoko, Mbelesia obulamu obuyia, okhuba iwe oli omulunjishi.

⁴¹OMWAMI Nyasaye, uheele isie nobuheelibwo oburalilu, umbonie okhulondana nobusuubisiebwo.

⁴²Mana ndalabakalusia abo abanyekanga isie, okhuba ndisikanga likhuwalio.

⁴³Unyalile okhuboola obwatoto buli lwosi, okhuba obunaayi bwanje buli mubukhalachibwo.

⁴⁴Buli lwosi ndalahulilanga lilakolio, ebisoni nebisoni.

⁴⁵Ndalamenya nendi omulekhuule toto, okhuba endeemanga okhulonda amalakoko.

⁴⁶Ndalarumbula amalakoko imbeli wabaruch, ne shindalafimbwa omurwe tawe.

⁴⁷Esaangaalilanga okhulonda amalakoko, okhuba isie ndakaheela.

⁴⁸Isie ndaheela amalakoko khandi ekahelesinjia oluyali, kho ndalayililisia khumebaaloko.

⁴⁹Witsulile obusuubisiebwo khwisie, isie omukhalabaniwo, okhuba obusuubisie obwo bumbelesinjia obunaayi.

⁵⁰Okhuba bwanemia omwoyo mumanyakhano kanje, khandi obusuubisiebwo bumbelesinjia obulamu.

⁵¹Abechinjimisi buli lwosi baafwolanga, nebutswa isie eshili okhulekhakhwo amalakoko tawe.

⁵²Nditsulilanga obukhalachibwo bwakhale, nabwo buneminjia omwoyo.

⁵³Olwa endolanga abamayanu nibafunaka lilakolio, esinyikhanga muno.

⁵⁴Ndakaasia tsinyimbo okhulondana namalakoko, olwa eshilikhwoho omulamu khushialo.

⁵⁵Mushilo nditsulilanga eliiralio, neyililisia khwilakolio.

⁵⁶Ndanyoola ikhabi eyo, khulwa okhulinda lilakolio.

⁵⁷OMWAMI Nyasaye niye omukabo kwanje mubulamu, esuubisia okhulonda amalakoko.

⁵⁸Ekhusaya nomwoyo kwanje kwosi, mbu umbeele tsimbabasi, shinga olwa wasuubisia.

⁵⁹Ndayililisiye khukobulamu bwanje, ne esuubisia okhulonda amebaaloko.

⁶⁰Obulashinda ta, enyanguha okhukhola amalakoko.

⁶¹Abashiamu barechile omureko kwokhundiila, nebutswa shindalebilila amalakoko tawe.

⁶²Embukhanga mushilo hakari okhukhwitsoomia, ekhwitsoomia khulwa obukhalachibwo bwobulunjishi.

⁶³Isie endi omwitsa wabwe boosi abakhuritsanga nibalinda amalakoko.

⁶⁴Eshialo shiosi shietsulamwo obuheelibwo oburalilu, kho unzechesie amalakoko.

⁶⁵Iwe OMWAMI Nyasaye oli omulayi khwisie, isie omukhalabaniwo, usiiye obusuubisiebwo.

⁶⁶Umbelesie obuchesi nende obumanyi, okhuba ndisiikanga amalakoko.

⁶⁷Ndakholanga amabi olwa wali noshili okhumbelesia eshinyasio, nebutswa bulano enondanga lilakolio.

⁶⁸Iwe OMWAMI Nyasaye, oli omulayi khandi okholanga amalayi unzechesie amalakoko.

⁶⁹Abechinjimisi baboolanga obubeeyi khwisie, nebutswa isie ndalalonda amebaaloko nomwoyo kwanje kwosi.

⁷⁰Abandu abo babula obumanyilisi, nebutswa isie esangaalilanga lilakolio.

⁷¹Eshinyasio shianje shiali eshilayi khwisie, okhuba shiachila ndeeka amalakoko.

⁷²Amalako akawahaana, namalayi khwisie, kata okhushila ebitonye eshikhumila bietsahaabu nende ifeetsa.

⁷³Iwe wanonga khandi unindanga obulayi, umbelesie obumanyilisi, kho mbu ndeeche okhulinda amalakoko.

⁷⁴Abo abakhuritsanga iwe balekhoya olwa bandoola, okhuba obunayi bwanje buli mubusuubisiebwo.

⁷⁵Emanyile mbu obukhalachibwo nobwobulunjishi, khandi mbu wambelesia eshinyasio shichila oli omwisiikwa.

⁷⁶Lekha obuheelibwo oburalilu bunemie omwoyo, shinga olwa wasuubisia isie omukhalabaniwo.

⁷⁷Umbeele tsimbabasi, nasi ndalabaho mwoyo, okhuba esaangaalilanga lilakolio.

⁷⁸Abechinjimisi bakhoya bafwimbwa omurwe khulwa okhunzinjilila namakhuwa kobubeeyi, nebutswa isie ndalayililisia khumebaaloko.

⁷⁹Boosi abakhuhelesinjie iwe oluyali khandi abamanya amalakoko betse khwisie.

⁸⁰Ndalalonda amalakoko nomwoyo kwanje kwosi, kho mbu endeshe okhufwimbwa omurwe.

⁸¹OMWAMI Nyasaye isie emalile okhuchoonya, khulwa okhulindilila obuhoniabwo, okhuba isie ndisiikanga likhuwalio.

⁸²Tsimoni tsianje tsichoonyile okhulindilila aka waasuubisia. Ereeba endi, “Olihabina liina?”

⁸³Obulamu bwanje buli butswa shinga liseelo eliumu lia idivai, nebutswa eshili okhwibilila ameechesioko.

⁸⁴Ndalalindililia okhuula liina? Niliina olwa olihelesia abaasandinjia eshinyasio?

⁸⁵Abandu abechinjimisi abalahulilanga amalakoko ta, bayabile obuko bwokhureka isie.

⁸⁶Amalakoko koosi nakobwatoto, basandinjia butswa khulwa okhunjishila, umbabine!

⁸⁷Bali ehambi okhunzira, nebutswa isie endi omwisiikwa khumechesioko.

⁸⁸Khulwa obuheelibwo oburalilu, honokosia obulamu bwanje, kho mbu enoonde amaloko koosi.

⁸⁹Likhuwalio iwe OMWAMI Nyasaye, nelieinziayo; liaralisibwa inziayo mwikulu.

⁹⁰Obwisiikwabwo nobweinziayo, iwe waralisia eshialo mubukono bwashio, nashio shilaralila shirio buli lwosi.

⁹¹Khulwa lilakolio, ebindu biosi biaralila okhuula olwa leelo, okhuba biosi bikhukhalabanilanga iwe.

⁹²Lilakolio libula okhuba eshinoko shiomwikhoyo kwanje, khane ndafwa khulwa amanyakhano kanje.

⁹³Shindililekhakhwo amebaaloko ta, okhuba okhubirira muko wambelesia obulamu.

⁹⁴Isie endi owuwo, umbonie! Okhuba endeemanga okhuhulila amalakoko.

⁹⁵Abamayanu bangoneshelanga okhunzira, nebutswa ndalayililisia khumalakoko.

⁹⁶Ndamanyilisiye mbu buli shindu shili neshiakamo, nebutswa amalakoko namalamba.

⁹⁷Isie ndaheela lilakolio muno! Eyililisinjia khulio eshiteere tulu.

⁹⁸Lilakolio liikholanga isie okhuba omuchesi okhushila abasuku banje, okhuba lili ninasi buli lwosi.

⁹⁹Endi nobumanyilisi okhushila kata abechesia banje boosi, okhuba eyililisinjia khumebaaloko.

¹⁰⁰Endi nobuchesi obunji okhushila abakofu, shichila enondanga amalakoko.

¹⁰¹Ndayelinda okhurula khubiima ebimayanu biosi, shichila enzenya okhuhulila lilakolio

¹⁰²Shindalalekhakhwo amalakoko ta, okhuba iwe omwene niwe omwechesia wanje.

¹⁰³Amebaaloko namalayi muno, namalayi okhushila obuushi khululimi lwanje!

¹⁰⁴Enyoolanga obuchesi okhurula mumalakoko, khulweshio ndalaasila ebiima ebibi biosi.

¹⁰⁵Likhuwalio neitaha yanje, obulafu bweinjila yanje.

¹⁰⁶Ndalalinda eshitsubo shia ndetsuba, eshiokhuhulila amebaaloko akahabwene.

¹⁰⁷Esandiibwe muno, iwe OMWAMI Nyasaye umbelesie omulamu shinga olwa wasuubisia.

¹⁰⁸Iwe OMWAMI Nyasaye ofuchilile amasayo kanje akokhukhupa orio; mana unzechesie amalakoko.

¹⁰⁹Buli lwosi eretsanga obulamu bwanje mumasila, nebutswa shindibililakhwo lilakolio tawe.

¹¹⁰Abamayanu barecheeshe omureko, nebutswa shindalaloba amalakoko tawe.

¹¹¹Amalakoko nomukabo kwanje kweinziayo, niko omwikhoyo kwanje kwa buli lwosi.

¹¹²Isie ndaahule okhulonda amalakoko, okhuula khunyanga yanje yokhufwa.

¹¹³Ndasila boosi abalafuchililanga amalakoko ta, nebutswa ndaheela lilakolio.

¹¹⁴Niwe obwilushilo bwanje khandi ingabo yanje, nebutswa obunaayi bwanje buli mubusuubisiebwo.

¹¹⁵Muurulekhwo inywe abamayanu, mbu enyale okhulinda amalako ka Nyasaye wanje.

¹¹⁶Umbelesie amaani shinga olwa wasuubisia, nasi embeho mwoyo; Shiolafimbia omurwe mubunaayi bwanje tawe!

¹¹⁷Undinyisie nasi ndalahona, ndalalondanga amalakoko buli lwosi.

¹¹⁸Iwe wikaananga omundu yesi ouloba okhulonda amalakoko, obuchesichesi bwabwe nobukhaya butswa.

¹¹⁹Abamayanu boosi imbeliwo bali butswa shinga amakokha, khulweshio isie ndaheela amebaaloko.

¹²⁰Isie ndakhuria iwe, endi noburi khulwa obukhalachibwo.

¹²¹Ekholile akahabwene khandi amalayi, shiolandekha mumakhono kabasuku banje tawe!

¹²²Suubisia mbu olahabina, isie omukhalabaniwo, shiolafuchilila abamayanu okhuusandia tawe!

¹²³Tsimoni tsianje tsichoonyile okhurangala nitsilindilila obuhoniabwo, nende obusuubisiebwo bwobulunjishi.

¹²⁴Ukholele isie omukhalabaniwo okhulondana nende obuheelibwo oburalilu, unzechesie amalakoko.

¹²⁵Endi omukhalabaniwo, unyalile embe nobumanyilisi kho mbu emanye amechesioko.

¹²⁶OMWAMI Nyasaye, nebisebio biokhuhana eshinyasio, shichila abandu bafunakanga lilakolio.

¹²⁷Khulweshio ndaheela amalakoko okhushila itsahabu, okhushila kata itsahabu inzeleleshe.

¹²⁸Khulweshio amalakoko kanzimililanga mubulamu bwanje, ndasila tsinjila tsiabamayanu.

¹²⁹Amechesioko namalayi muno, khulweshio kalondanga nomwoyo kwanje kwosi.

¹³⁰Obwinoosi bwamechesioko buhananga obulafu, khandi buhananga obumanyilisi khubalamanyile ta.

¹³¹Khulwa okhwikomba amalakoko, ndaasama omunwa niheesela.

¹³²Oshiukhane undolele tsimbabasi, shinga olwa okholelanga boosi abakhuheela iwe.

¹³³Uninde shinga olwa waasuubisia, endeshe okhukwa, shiolaakhola ndahulwa nabamayanu tawe.

¹³⁴Uhonokosie okhurula khu abasandinjia, kho mbu eninde amalakoko.

¹³⁵Unzashilie isie omukhalabaniwo obulafubwo, khandi unzechesie amalakoko.

¹³⁶Amasika kachetulukhanga okhurula mutsimoni tsianje, shichila abandu shibalindanga lilakolio tawe.

¹³⁷Iwe OMWAMI Nyasaye, oli omulunjishi, khandi amalakoko nakahabwene.

¹³⁸Amalako ka wahana nakahabwene khandi nakobulunjishi.

¹³⁹Obuheeli bwanje khumalakoko busambanga shinga omulilo, shichila abasuku banje shibahulilanga amalakoko tawe.

¹⁴⁰Obusuubisiebwo nobwatieli nasi isie omukhalabaniwo ndabuheela.

¹⁴¹Isie endi omutuutu khandi owachaaywa, nebutswa shindibililanga amechesioko tawe.

¹⁴²Obulunjishibwo bulabaho inziayo, nalio lilakolio neliatoto buli lwosi.

¹⁴³Endi mumatinyu khandi ehendanga muno, nebutswa amalakoko kakholanga okhwikhoya.

¹⁴⁴Amebaaloko nakahabwene buli lwosi, umbelesie obumanyilisi, nasi ndalabaho mwoyo.

¹⁴⁵Iwe OMWAMI Nyasaye! Ekhuhabila nomwoyo kwanje kwosi. Umbulile, nasi ndalalonda amalakoko koosi.

¹⁴⁶Ekhuhabila iwe OMWAMI Nyasaye, umbabine, nasi ndalalonda amalakoko koosi.

¹⁴⁷Embukhanga mumabwibwi nekhuhabila, obunaayi bwanje buli mubusuubisiebwo.

¹⁴⁸Efubunjia tsindoolo eshilo shiosi, neyililisinjia khumebaaloko.

¹⁴⁹Iwe OMWAMI Nyasaye, khulwa obuheelibwo oburalilu ohulile okhuhaba khwanje, mana undolele tsimbabasi nokhulinda obulamu bwanje.

¹⁵⁰Abamayanu abaasandinjia basitile ahambi, abandu abalalondanga amalakoko tawe.

¹⁵¹Nebutswa iwe oli ahambi ninasi, nako amalakoko koosi nakeinziayo.

¹⁵²Khale muno ndeeka amebaaloko, wakakhola okhubaho khulwa inziayo.

¹⁵³Hengakhwo khumanyakhano kanje mana umbonie, shichila shindakhayakhwo lilakolio tawe.

¹⁵⁴Obe omukobosheli wanje, mana umbonie, umbonie shinga olwa wasuubisia.

¹⁵⁵Abamayanu shibalahonokosibwa ta, okhuba shibahulilanga amalakoko tawe.

¹⁵⁶Nebutswa tsimbabasitsio iwe OMWAMI Nyasaye, nitsinyinji, kholela aketsimbabasi mana uhonokosie.

¹⁵⁷Abasandinjia khandi abasuku banje nabanji, nebutswa shienjweyanga okhulinda amalakoko tawe.

¹⁵⁸Olwa eneenga khubakhobi abo, esinyikhanga muno, shichila shibahulilanga amalakoko tawe.

¹⁵⁹Lolakhwo shinga olwa ndaheela amebaaloko, olinde obulamu bwanje okhulondana nobuheelibwo oburalilu.

¹⁶⁰Akoboolanga koosi nakobwatoto, amalakoko nakobulunjishi khandi akeinziayo.

¹⁶¹Abaruchi baseeranga isie obulali eshifune ta, nebutswa ehelesinjia lilakolio oluyali.

¹⁶²Ndikhoya muno khulwa obusuubisiebwo, ndikhoya shinga omundu ounyoola libiikho liobuyinda.

¹⁶³Isie ndasila obubeeyi, nebutswa ndaheela lilakolio.

¹⁶⁴Buli nyanga ekhwitsoominjia okhandi musafu, khulwa obukhalachibwo bwobulunjishi.

¹⁶⁵Abo abaheela lilakolio bali nomulembe omukhongo, shibulaho eshinyala okhubesichirasia bakwa hasi tawe.

¹⁶⁶OMWAMI Nyasaye, enindililanga uhabine, ne ekholanga aka walachilisia.

¹⁶⁷Isie embulilanga amechesioko, shichila ndakaheela nomwoyo kwanje kwosi.

¹⁶⁸Enindanga amalakoko, shichila iwe omanyile injenda yanje yoosi.

¹⁶⁹OMWAMI Nyasaye, chama ohulile okhuhaba khwanje, Umbelesie obumanyilisi shinga olwa wasuubisia.

¹⁷⁰Recheresia amasaayo kanje, mana umbonie okhulondana nobusuubisiebwo!

¹⁷¹Ndalakhwitsoominjia buli lwosi, shichila unzechesinjia amalakoko.

¹⁷²Ndalemba ninditsoomia lilakolio, shichila lilakolio neliahabwene.

¹⁷³Wirecheshe okhuuhabina buli lwosi, shichila embulilanga amalakoko.

¹⁷⁴Iwe OMWAMI Nyasaye, endibungwa amahofu khulwa obuhoniabwo, amalakoko niko akandikhoyelanga.

¹⁷⁵Chama embeho mwoyo, mbu ekhwitsoomie, nako amebaaloko kakhoonye.

¹⁷⁶Endimatimanga shinga likondi likorire, kho yitsa ukhaabe isie omukhalabaniwo, shichila shiendeshilekhwo amalakoko tawe.