Read wanga TSITSABULI 12 Bible Online

TSITSABULI 12 - wanga bible

TSITSABULI 12

¹Khumurereesi wetsinyimbo. Eyokhwimbwa nobukhana bwelitungu. Itsabuli ya Daudi. OMWAMI Nyasaye, khuhabine, okhuba shiashilikhwoho omulunjishi kata mulala ta, abandu abesiikwa boosi pe bakhamuluushe mubandu.

²Buli mundu akaatia owashie, bakaataninjia butswa khwikulu namakhuwa amarerere.

³Shiakhuha OMWAMI Nyasaye yaakamia obabeeyi, nasunia eminwa chiabechinjimisi,

⁴ababoolanga bari, “Obubooli bwefwe bulakhureerera eshia khwenya. Khulaboola liosi liosi elia khwikomba, abulaho ounyala okhukhukaya!”

⁵Nebutswa OMWAMI Nyasaye aboola ari, “Okhuba abamanani basandibungwa, nabo abatakha bashenyanga mubutsunwi, bulano omwene ndalabuukha okhubahelesia obulindi bwa bekombanga.”

⁶Obusuubisie bwa OMWAMI Nyasaye nobweleleshe, nobweleleshe shinga ifeetsa, eyisaaluulwe mumulilo akhandi musafu.

⁷Iwe OMWAMI Nyasaye, okhulinde, okhulinde okhurula khubandu abamayanu bano buli lwosi.

⁸Abandu abamayanu babotokhananga buli habundu, obumayanu bwitsoomibwa mubandu.