Read wanga TSITSABULI 132 Bible Online

TSITSABULI 132 - wanga bible

TSITSABULI 132

¹OMWAMI Nyasaye, witsulile Daudi nende amatinyu akayefwiila koosi.

²Witsulile aka yasuubisia, aka yakhwitsubila iwe Nyasaye Owobunyali Bwosi, khandi Nyasaye wa Yakobo, olwa yaboola ari,

³“Shindilinjilakhwo munzu yanje, noho okhwiyalisia khushitali shianje,

⁴kata okhukonakhwo tsindoolo ta,

⁵okhuula olwa ndalaba nengasiliiye OMWAMI Nyasaye habunduwe ahokhumenya, eshimenyo shia Omwene Mahe, Nyasaye wa Yakobo.”

⁶Khwahulila khukelisanduku lieindakano nikhuli Betselehemu, mana nikhulinyoola mumukunda kwa Yearimu.

⁷Ne nikhuboola khuri, “Chende khutsie munzu ya OMWAMI Nyasaye, chende khumwinamile hashifumbishie shioburuchi.”

⁸Buukha, iwe OMWAMI Nyasaye, otsie habunduwo ahokhuhuluushila, aha eshilolelo shiobunyalibwo shili, mana omenyeho inziayo.

⁹Abesaaliisibo bakhoya bakhalabananga nobulunjishi, nabo abandubo bakhupe tsingalakala nibekhoya!

¹⁰Wasuubisia omukhalabaniwo Daudi, shiolaloba omuruchiwo owa waahula tawe.

¹¹Wetsuba nosuubisia Daudi, obusuubisie bwolanyala okhukalukhasia ta, noboola ori, “Ndakhakhole mulala khubasianibo okhuba omuruchi, alikalukha mushilenjeshio okhuba omuchi.

¹²Abasianibo nibaba nibaloonda indakano yanje mubwatoto, nende okhutiila amalako aka ebahelesia, kho abaana babwe boosi khandi, balikalukha muburuchibwo, khandi baliruka emiyika nemiyika.”

¹³OMWAMI Nyasaye yaahula Zayuni, yenyanga okhulikhola okhuba eshimenyoshie.

¹⁴OMWAMI Nyasaye aboola ari, “Hano niho ha ndalamenya inziayo, khandi niho aha ndalaruchilanga.

¹⁵Ndalahelesinjia litookho lia Zayuni obuyinda bwosi obwa likomba, ndalekusia abamanani balio nebiokhulia ebilayi.

¹⁶Abesaaliisi balio balanyoola ikhabi mukabakhola koosi; nabo abandu balio balemba nibekhoya.

¹⁷Hano ndakhakholeho mulala khubolwibulo lwa Daudi okhuba omuruchi omukhongo; Hano ndakhalinde oburuchi bwomuruchi wanje omwahule.

¹⁸Ndilifimbia abasukube omurwe, nebutswa obwamibwe bulitsiililila nibulandaala.”