Read wanga TSITSABULI 135 Bible Online

TSITSABULI 135 - wanga bible

TSITSABULI 135

¹Mwitsoomie OMWAMI Nyasaye! Inywe abakhalabani aba OMWAMI Nyasaye mwitsoomie eliiralie.

²Inywe abakhalabanaga munzu eya OMWAMI Nyasaye, abali mulwanyi lweihekalu ya Nyasaye wefwe!

³Mwitsoomie OMWAMI Nyasaye, shichila ye nomulayi; mwimbe nimwitsoomia eliiralie, shichila ye nowobukoosia!

⁴Okhuba OMWAMI Nyasaye yeyaahulila Yakobo, nabo abandu ba Isiraeli nabebe omwene.

⁵Okhuba emanyile mbu OMWAMI Nyasaye wefwe nomukhongo, nomukhongo okhushila abanyasaye bandi boosi.

⁶OMWAMI Nyasaye akholanga koosi aka yenya ikulu mwikulu nende hasi khushialo, munyanza nende mulusiba hasi muno.

⁷Areeranga amaleesi akeifula okhurula khundulo khweshialo; akholanga tsimbenu tsieifula okhumwesukha, khandi areeranga imbumbuyeka okhurula mushimenyo shiayo.

⁸Mushialo shia Misiri, yeera abekulanda boosi, ababandu nende abetsisolo.

⁹Ebweneyo yakholayo akokhuhuchisia nende akokhuchenya, yahelesia omuruchi wa Misiri nende abakhongobe boosi eshinyasio.

¹⁰Yamulula amahanga amanji nende okhwira abaruchi abamaani shinga:

¹¹Sihoni omuruchi wa Abamori, Ogi omuruchi wa Ababashani, nende abaruchi bandi boosi bomushialo shia Kanani.

¹²Yabukula eshialo shiabwe nahelesia abandube, yahelesia Abaisiraeli.

¹³OMWAMI Nyasaye, buli lwosi olarumbulungwa okhuba Nyasaye, tsinzibulo tsiosi tsilakhwitsulilanga.

¹⁴OMWAMI Nyasaye alatereranga abandube alalolela abakhalabanibe eshisa.

¹⁵Abanyasaye babamahanga benamilanga bakasibwa okhurula khufetsa nende itsahabu, khandi bakasibwa namakhono kabandu.

¹⁶Abanyasaye abo bali neminwa, nebutswa shibaboolanga tawe; Bali netsimoni nebutswa shibalolanga tawe;

¹⁷Bali namarwi nebutswa shibahulilanga tawe; kata shibaheelanga emiuya tawe.

¹⁸Boosi ababakaasia nende abesikanga mubo, bakhoya baba shinga abanyasaye tsana abo!

¹⁹Inywe abandu ba Isiraeli, mumwitsoomie OMWAMI Nyasaye; Inywe abesaaliisi ba Nyasaye, mumwitsoomie!

²⁰Inywe Abalawi mumwitsoomie OMWAMI Nyasaye; Inywe mwesi abamwinamilanga, mumwitsoomie!

²¹Mwitsoomie OMWAMI Nyasaye ouli mu Zayuni, khandi owamenya Yerusalemu. Mwitsoomie OMWAMI Nyasaye!