Read wanga TSITSABULI 139 Bible Online

TSITSABULI 139 - wanga bible

TSITSABULI 139

¹Iwe OMWAMI Nyasaye, wayarunilisiye mana niumanya!

²Omanyile buli shindu shiekholanga; Noli ehale omanyilisinjia amapaaro kanje.

³Undolanga kata olwa emba nekhalabananga kata nehuluukhanga; Omanyile ebikhole bianje biosi.

⁴Omalile okhumanya akenzia okhuboola kata olwa emba neshili okhuboola.

⁵Umbotokhane tsimbeka tsiosi, unindanga nobunyalibwo.

⁶Obuchesibwo khwisie nobunji muno, bushila obumanyilisi bwanje.

⁷Ndakhelukha ndatsia hena okhurula khwiwe? Ndakhelushila heena okhurula imbeliwo?

⁸Nindakhatikulukha ikulu mwikulu, oliyo. Nindakhatsia emakombe, oliyo.

⁹Nindakhapulukha okhurula Yerusalemu, ndatsia ehale okhubira ebukwe kata okhumenya ehale bwene mumbo,

¹⁰kata ebweneyo wakharanjilila okhuulayo, omukhonokwo musaatsa kwakhandilayo okhuninda.

¹¹Nindakhaboolila eshilima okhuufisa kata obulafu bumbotokhane okhwikhola eshilima,

¹²kata eshilima shineshilima khwiwe ta, nashio eshilo shilaba eshiobulafu shinga eshiteere khwiwe. Okhuba eshilima nende obulafu khwiwe biosi bili butswa nashilala.

¹³Walonga buli eshiungo shianje, wanonga halala munda mwamama wanje.

¹⁴Ekhwitsoomianjia shichila iwe okwanile okhuribwa; akokholanga koosi nakokhuhuchisia, ekamanyile nomwoyo kwanje kwosi.

¹⁵Olwa amakumba kanje kali nikakasibungwa, wakara koosi halala nobuchesi munda mwamama wanje. Olwa ndali nekhulangamwo mumasilisi, wamanya mbu endimwo.

¹⁶Wamanya olwa ndali neshili okhwibulwa. Tsinyanga tsia ndahebwa, tsiahandikwa tsiosi mushitaboshio, olwa kata ndala khutsio yali niyishili okhuchaaka okhubalwa.

¹⁷Nyasaye, amapaaroko namalayi muno khwisie, koosi namanji muno akalanyala okhubalwa tawe.

¹⁸Nindakhanyalile okhukabasia, kakhaba amanji okhushila omuyeshe. Olwa embuukha eshili butswa ninawe.

¹⁹Shiakhuha OMWAMI Nyasaye weera abamayanu! Wakhola abeinduli okhuurulakhwo!

²⁰Baboolanga amakhuwa amashiamu khwiwe, barumbulanga amakhuwa amabi khuliiralio.

²¹Iwe OMWAMI Nyasaye, isie ndasila muno abandu abakhuchaayanga iwe. Enjaayanga muno abo abakhayanga okhukhuhulila iwe.

²²Ndabasila nomwoyo kwanje kwosi, bo nabasuku banje.

²³Iwe Nyasaye, urunilisie mana omanye akali mumwoyo kwanje, unenjelesie mana omanye amapaaro kanje.

²⁴Khabilisiakhwo olole nikaba mbu obubi nibuba nibulikhwo mwisie, mana unzimilile munjila yeinziayo.