Read wanga TSITSABULI 140 Bible Online

TSITSABULI 140 - wanga bible

TSITSABULI 140

¹Iwe OMWAMI Nyasaye, umbonie okhurula khubandu ababi; Uninde okhurula khubandu abeinduli.

²Buli lwosi barechekhanga amabi mumioyo chiabwe, nende okhuyakulula obusoolo.

³Tsinimi tsiabwe tsili shinga tsinzokha tsiobufwisi obululu; nako amakhuwa kabwe shinga obufwisi bweliini.

⁴OMWAMI Nyasaye uninde okhurula khubandu abamayanu, uninde okhurula khubandu beinduli, abarechekhanga okhukwa khwanje.

⁵Abechinjimisi barechile omureko mabiswi babambuule olurimba neshireko, ne khundulo weinjila, bangasiliye omureko.

⁶Emboolela OMWAMI Nyasaye endi, “Niwe Nyasaye wanje” OMWAMI Nyasaye! Hulila okhulila khwanje okhwobuhabini.

⁷Iwe OMWAMI Nyasaye, omununuli wanje wamaani, niwe owandeetsa khunyanga yelihe.

⁸OMWAMI Nyasaye, shiolahelesia abamayanu akabekomba tawe; khandi shiolakhola akabarechekha katsiililile tawe.

⁹Shiolafuchilila abasuku banje bahule tawe. Khola amarisia kabwe khwisie kabakalushile abene.

¹⁰Amanda komulilo akayile kakhoya kabakwiila. Bakhoya basukunwa mwitikho mana bakhaywe okhurulamwo.

¹¹Abandu bachiikhanga abashiabwe shibalatsiililila tawe; amabi kakhoya karanjilila abandu bamahababa nokhubamulula.

¹²OMWAMI Nyasaye, emanyile mbu, olindanga noralisia tsinjila tsiabatakha, khandi okholelanga abatakha akabakwanile.

¹³Toto mwene abalunjishi okhuula balakhwitsoomia. Nabo abakololofu balamenya mubulindibwo.