Read wanga TSITSABULI 144 Bible Online

TSITSABULI 144 - wanga bible

TSITSABULI 144

¹OMWAMI Nyasaye, omulindi wanje, yetsoomibwe! Yanzechesinjia okhulwana niyarechekha khulwa lihe.

²Niye omulindi wanje khandi obwilushilo bwanje niye eshikhumba shianje, khandi omuhonia wanje, niye owandilushilangakhwo khulwa obulindwi. Yanyalilanga okhuhula abandu boosi.

³OMWAMI Nyasaye, omundu namundu nishiina, mbu omupaarekhwo? Omundu namundu nishiina mbu omuhendele?

⁴Omundu ali butswa shinga omuya tsinyanga tsiobulamubwe tsili shinga eshiinini eshibiranga.

⁵OMWAMI Nyasaye, yikula likulu mana wishe hasi, tiila khubikulu nabio bilarusia omwosi.

⁶Orume tsimbenu tsiomulilo tsisalaasie abasukubo, olase obuyingobwo mana obarekusie tsimbilo.

⁷Rula hekulu wishe hasi ukhwese okhurula mulutungu lwamatsi mana umbonokosie okhurula mubunyali bwabarende,

⁸abalaboolangakhwo obwatoto ta, khandi ababeyanga kata nibamala okhulia eshitsubo.

⁹Ndalakhwimbila olwimbo oluyia iwe Nyasaye, ndalakhupa litungu nekhwimbila olwimbo.

¹⁰Onyalilanga abaruchi okhuhula, mana ohonokosia omukhalabaniwo Daudi.

¹¹Umbonie okhurula mubasuku abamayanu, umbonokosie okhurula mubunyali bwabarende, abalaboolangakhwo obwatoto ta, khandi ababeeyanga kata nibamala okhulia eshitsubo.

¹²Abana befwe abasiani muburaka bwabwe bakhoya baba shinga ebirache ebikhulanga namaani. Abana befwe abakhaana bakhoya baba shinga tsisilo tsiamani, etsiakasibwa khulwa okhusiaha tsinzu tsiabaruchi.

¹³Ebiachi biefwe bikhoya bietsulamwo imele, nako amakondi akomubwayilo bwefwe kakhoya kebulana ebikhumila biebikhumi.

¹⁴Tsing'ombe tsiefwe tsikhoya tsiebulana mubunji, tsilahusa kata okhufwa tawe. Tsimbungu tsieshibeela tsilahulilikhakhwo munjila tsiomumatookho kefwe tawe!

¹⁵Nabeikhabi abanyoola tsikhabi tsino! Nabeikhabi aba Nyasaye wabwe ali OMWAMI Nyasaye!