Read wanga TSITSABULI 147 Bible Online

TSITSABULI 147 - wanga bible

TSITSABULI 147

¹Mwitsoomie OMWAMI Nyasaye! Nobulayi okhwimba nimwitsoomia Nyasaye wefwe; Olwimbo lwokhumwitsoomia nolukhoyeele, shichila ye nowobukoosia.

²OMWAMI Nyasaye aralisinjia Yerusalemu khandi; achelesinjia Abaisiraeli abali mubuhambe.

³Ahoninjia abo abemioyo chiabwe chiyenguushile, naboha amakonzo kabwe.

⁴Abasinjia obunji bwetsing'ining'ini, natsilanga buli ndala neliira liayo.

⁵OMWAMI Nyasaye wefwe nomukhongo khandi owobunyali obukhongo, obuchesibwe shibunyala okhumanyilisibwa tawe.

⁶OMWAMI Nyasaye achinguulanga abafwolungwa, natubulila hasi abamayanu.

⁷Imbile OMWAMI Nyasaye tsinyimbo tsiokhumwitsoomia, mwimbile Nyasaye wefwe tsinyimbo nimukhupa litungu.

⁸Areeranga amaleesi khwikulu nakwisilia eshialo ifula; nende okhukhola obunyasi okhumela khushikulu.

⁹Ahelesinjia tsisolo ebiokhulia biatsio, nende okhuliisia ebiminywi biamakhookho olwa bitsiula.

¹⁰Shiasangaalilanga tsifarasi tsiamaani, kata abelihe abalulu tawe.

¹¹Habula asangaasibungwa nende abamuhelesinjie oluyali, abo abesiikanga obuheelibwe oburalilu.

¹²Iwe Yerusalemu, yitsoomia OMWAMI Nyasaye! Iwe Zayuni, yitsoomia Nyasayewo!

¹³Okhuba aralisinjia ebilibwa bienywe, nende okhuhelesia abandube ikhabi.

¹⁴Akholanga tsinzakho tsienywe okhuba nomulembe, namwikusia neingano inyushe.

¹⁵Ahananga lilakolie khushialo, ne eliaboola likholwa bwangu muno.

¹⁶Akholanga itsaluchi okhufuunikha eshialo shinga obwoya bwamakondi, khandi akhola itsaluchi eyo okhusalaana shinga olufu.

¹⁷Akwisinjia amachina keifula shinga tsimbaale; ounyala okhwisimilisia omunyiri kwareeranga niwina?

¹⁸OMWAMI Nyasaye alachilisinjia, ne itsaluchi isalulukha. Areeranga omuyeka okhuhutsa, nako amaatsi kabura nikatsia.

¹⁹Arumbulanga likhuwalie khubandube, arumbulilanga Abaisiraeli amebaaloke nende amalakoke.

²⁰Shiyakholelakhwo lihanga lindi ako ta, nabo shibamanyile amalakoke tawe. Mwitsoomie OMWAMI Nyasaye!